Joshua 9 - Angami Naga CL (Re-edited) Bible (BSI)

Gibeonmiako Joshua Sekewa

¹ Jordan khie kekreitsa kijüthouu gei rei, razhau nu rei mu Dzükezhau khie pete Lebanon ketso bakecü kediko, Hitko, Amorko, Kananko, Perizko, Hivko mu Jebuskoe Israelmia kuokelie dze sishü tse,

² ukoe keze nou puo chü di Joshua mu Israel ze kegeituoü kengulie.

³ Derei Gibeon nu kelhoumiako Joshuae Jeriko mu Ai gei kedipuo chüshü shikecü sishü tse,

⁴ uko kedoda di Joshua seketuo rhülie. Sidi uko thoulakrako huo tsiu chüzhü kewe pekhuokecü pie uko gadako gei shülie,

⁵ pfhekra kerürha dzielie mu phikoukra pekhuokecü selie. Siro ukoe kecüca se ketuoko pete rei sototo tsiu khrüketa kro puo pfü sa.

⁶ Sidi ukoe Gilgal razhüchüu nu Joshua ki vor, di puo ki tsiu Israelmiako ki pucü, “Hieko rüna kepecie nunu vor, mu n bu hieko ze dietseidiekho puo chüshünu chayalie.”

⁷ Derei Israelmiakoe Hivko ki; “Kiüdi nieko ze dietseidiekho puo chülietuo dimu? nieko haki kepenuoki lhou baya rei si moe,” sishü.

⁸ Ukoe Joshua ki, “Hieko sü n kituomia zo,” ishü. Joshuae uko ki, “Nie suomia ga? Siro kirapuo nu vor ga?”

⁹ Sitse ukoe puo ki, “N kituoko thechü kepecie phi nunu vorlie, kekreilamonyü hieko Jihova n Kepenuopfü dze sishü, sizomonyü puoe Ijipt nu mhachükeshü pete sishüte,

¹⁰ tsiu puoe Jordan niathutsa keba Amor kedinie, Heshbon Kediu Sihon mu Bashan Kediu Og, Ashtarot nu kebau gei chükeshü pete siwate.

¹¹ Süla hie phichüko tsiu hie kijü nu themia pete hie ki, ‘Nie rüve la nouva kesepfülie, di vo uko ze kesecie, tsiu uko ki, “Hieko sünie kituoko zo mu hie ze dietseidiekho puo chücie,” sishülie.’

¹² Hie nie ki vortuoü tuokeshü nhie, niekhrüda haha, leme di nouva la hie ki nunu pfüpar, derei harie, tsie we sototote, mu khrü rei sate.

¹³ Hie chüzhüsü hako puo ketshu chü mu kesa ze, harie rürha phrete, mu hie pfhenei tsiu hie phikouko cha cha phikecü la puokra chü phrete.”

¹⁴ Sitse krütakoe uko ze uko nouva cülie, derei Jihova medo rüsa mota.

¹⁵ Sidi Joshua uko ze vitho chüwa tsiu uko perheishüketuo dietseidiekho chüwa, mu Israel mechükehou krütako rei dietseidiekho-u pebatuoü uko die phrashüwa.

¹⁶ Uko ze dietseidiekho chükewa zha se sie, ukoe themia süko uko zanuo ki lhou baya zo ükecü silie.

¹⁷ Süla Israelmiakoe tuoshü di zha se nhie themia süko lhou keba nadiko nu vorlie. Uko nadiko sü Gibeon, Kefira, Birot mu Kiriat-jearim.

¹⁸ Derei Israelko uko geilie suota, kekreilamonyü mechükehou krütakoe, Jihova, Israel Kepenuopfü za se di uko ki rüse shüwaketa la. Themiako pete u krütako gei mebe phreta.

¹⁹ Derei krütako sie, mechükehou ki, “Hie Jihova, Israel Kepenuopfü za se di uko ki rüseshüwate, süla we tsie uko pechülie kenjüte.

²⁰ Hie hau uko gei chüshütuo: Hie uko perheishütuo, si moro hie uko ki rüsekewa rüseu la noupfhüu u gei pfütatie.”

²¹ Siru krütakoe sie uko ki, “Uko thuo lhou balie, derei uko bu mechükehou pete la sei kedumia mu dzükeümia chütuo.”

²² Sitse Joshuae uko bu puo ki vornu kieshü, sidi puo uko ki, “Nieko hie ze zanuo ba ze, kiüdi nie sie ‘Hie kepecie phinu baya’ idi hie kedoya ga?

²³ Süla nieko tsie rüsepfüte, nie themiako pete miadie chü di, a Kepenuopfü kiu la seikedumia mu dzükeümia chütuo,” sishü.

²⁴ Sitse ukoe Joshua ki, “Jihova n Kepenuopfüe Puo kituou Mosa ki pushü di kijüu pete pie n tsüwa mu no penyü vorkezhü tuoi hanu lhou keba pete dukhri pejüwatuo ükecü hie silieketa la; mu hie-e hie kerheiro la rei michiethorta di hau chüwate.

²⁵ Hie tsie we n kekuo nu bate, süla n mhodzüki viü mu mezhü ükecüu hie ze chüliecie.”

²⁶ Süla puo uko gei hau chüshü, puoe uko kelalie mu Israelko bu uko dukhriwa molie.

²⁷ Derei teiso sünhienu Joshuae uko bu miadiemia chüta, sidi uko bu mechükehouu mu Jihova ruosuobau la seikedumia mu dzükeümia chüta. Thie ketso rei, Jihova rüsuoketuo la kedakeshü thechüu nu ukoe uko mhatho chü tuoya zo.