Joshua 8 - Angami Naga CL (Re-edited) Bible (BSI)

Ai Penyükelie mu Süu Kepeka

¹ Sitse Jihovae Joshua ki, “Terhü themiako pete zelie di Ai recie; michie hie morei n ziejüta hie. Harie, ae Ai kediu, puo themia, puo nadi, mu puo kijü khapie n dzie nu shüwaketa la.

² Noe Jeriko mu puo kediu gei chükeshü tuoi Ai tsiu puo kediu gei rei chüshütuo; derei tsieu va we terhü mhavako mu puo kicükiriko se n vie chülie vi. Pekhre vo di nadiu sietsa nu peprielieketuo dojülie.”

³ Süla Joshua sielie di terhü themia pete ze kho Ai reketuo dojülie. Puoe terhümiavimia nyie ser kedalie tsiu ahza khashü di pezei zenu uko ketseshüwa,

⁴ di uko ki, “Harie, nieko rünau whuoketuo la rüshü balie, puosietsa nu, tuo pecieta hie, derei rhorhüi di dojü phre balie.

⁵ A mu a ze ketuoko tuo nadiu petsou khotuo. Siro uko themiako hieko whuo par ro kerieu va tuoi hiekoe uko mhodzünu tashütuo.

⁶ Hiekoe uko meshü ze nadiu cie par tseita kemochie uko mhodzü tashütuo. Sitse ukoe sie, ‘Kerieu va tuoi ukoe u mhodzünu tatazhie,’ icü letuo. Siro hiekoe uko mhodzünu takezhü ki,

⁷ niekoe rüshükebau nunu sielie di nadiu lielietuo; Jihova nie Kepenuopfü thuo süu pie nie dzie nu shüwaketa la.

⁸ Mu nie-e nadiu liekelie sie, Jihova pukeshü tuoi mi pie nadiu thewatuo. Harie, a nie ki die khashüte ho,”

⁹ Sidi Joshuae uko ketseshüwa; mu ukoe Ai niakratsa Bethel mu Ai unie donu rüshüchü nu volie di pfhe bata; derei Joshua we süzhü razhüchü nu bata.

¹⁰ Joshuae khiserüna sielie, di puo themiako kie kengulie. Sidi puo mu Israel nu phichüko terhümiaviko ze Ai nu kho.

¹¹ Terhü themiako puo ze di nadiu mede nu kholie, sidi Ai puotsei pesotsa nu razhüchü keselie, siro razha puo Ai mu uko donu zhü.

¹² Sidi puoe mia nyie pengou mese zelie di, uko bu nadiu niakratsa Bethel mu Ai unie donu rüshü balie.

¹³ Sizomonyü uko pete kezapie u tha u tse nu shülie, sidi miakrau bu nadiu khie pesotsa, mu kekreiko bu nadiu niakratsa nu rüshü balie. Derei Joshua we süzhü razhau nu bata.

¹⁴ Ai kediue süu ngu tse, puo mu puo themia, nadiu nu lhou kebako pete ze khiserüna sielie di Israel ze kegeituo üdi Araba mhodzünu tuo pra, derei puoe nadiu sietsa puo bietuo üdi rüshü kebau dze si tuo mo.

¹⁵ Sidi Joshua mu Israelko pete kemichie rova di tase rayhatsa va vota.

¹⁶ Sitse uko Israel whuoketuo la nadiu nu themia kie kengulieta, sidi ukoe Joshua whuo zo nadiu ze kepecie phinu vorta.

¹⁷ Ai nadiu nu keba themia pete Israelko whuo tuota, sidi nadiu kha kemethuowa mu nadiu yalieketuo miapuorei tuo mota.

¹⁸ Sitse Jihovae Joshua ki “N dzie nu ketuo rüngouu yhapie Ai tsa rüshülie; a süu khapie n dzie nu shüwaketuo la.” Ru Joshuae puo dzie nu ketuo rüngouu piesie naditsa rüshü.

¹⁹ Tsiu puoe puo dzie yhashü mu chakhrie rüshü kebako u chü nunu mhai sielie, di ta nadiu nu le süu lielie; sidi rükri mi pie nadiu thewa.

²⁰ Süki Ai themiako u sietsa mehoshü ru nadiu nunu mi khusiekezhü nguta. Derei ukoe mhatsa puorei valie kenjüta, kekreilamonyü tase rayha vaketakoe rürei vor uko petsouketa la.

²¹ Siro kekreikoe nadiu lielie tsiu thewa, mu mi khukesie Joshua tsiu Israelkoe süu ngushü tse, ukoe rürei la vor Ai themiako gei sedevü.

²² Sizomonyü nadiu nu keba Israelko rei rüyachüu nu kelie. Süla Israelko bu uko hou toupfülie, huomia lutsa mu huomia hatsa idi uko pete gei zo vowa, süla uko miapuorei rheilie morei talie mo.

²³ Derei Ai kediu zowe perhei telie di puo ze Joshua mhodzünu vor.

²⁴ Israelkoe Ai themiako whuo vo terha mu rayha nu uko gei phrewa, tsiu zhiecha pie uko pete bie pejüwa tse, Israelmia peteko Ai nu la vor di zhiecha pie süu biewa.

²⁵ Siro sünhie bie kevo thepfu rei thenu rei, Ai nu themiako pete kesa nyie kerekenie.

²⁶ Israelkoe sünu themiako gei tseiwa kemochie Joshuae Ai petsou di puo ngou pie kethau puo dzie nu rhü lashü mo zo.

²⁷ Jihovae Joshua ki pukeshü tuoi, Israelkoe nadiu nu kicükiriko mu mhavako rübei liepie uvie chülie.

²⁸ Sidi Joshuae Ai thewa, mu pekaperuowa, süu thie ketso rei pekakewa nhie kemhie zhü zo.

²⁹ Tsiu puo seibo puo geinu Ai kediu goupie zha thevatie tso; sidi niaki keletie ki Joshuae diekhashü, di ukoe seibo geinu puo mo-u pie kerlie, di kelhoupie nadiu kharu tieki shüwa. Sidi süu mho tsiepfhe kezha puo pfhewa, süu thie ketso rei ba zo.

Dietseidiekhodieu Phrü Lakeshü

³⁰ Süsie Joshuae Ebal Kijüthouu geinu Israel Kepenuopfü Jihova ki khashüketuo ruosuoba puo chülie,

³¹ puoe Jihova kituou Mosae Israelko ki kepu tuoi chüshü, süu Mosa zho nu pukecü “Ketsie phro kemo, miapuorei theginya pie kou chie kemo ketsie pie ruosuoba kechü,” idi thupie keba tuoi. Sügeinu ukoe kethe ruosuo chüpie Jihova ki shü, mu vitho ruosuo rei khashü.

³² Tsiu Israelmia mhodzü nunu Joshuae ketsieko gei Mosa thezho thukeshüu thu lashü.

³³ Siro Israelko pete, phichüko, kezhako, capimiako tsiu khenumia mu solhimiako rei sa ze di Jihova dietseidiekhobouu khie lutsa mu süu kepie Levimia zievoko mhodzünu vo tha phrelie, ketou puo Gezirim Kijüthou phi nu mu ketoupuo Ebal Kijüthou phi nu idi thalie, Jihova kituou Mosae hamhodzü uko bu theja lieketuo ki sümhie di chülienukecü die khapie kezhü la.

³⁴ Süsie Joshuae thezho dieko pete phrüshü, thejako rei mu rüseko rei thezho leshüda nu thupie keba tuoi di pete phrüshü.

³⁵ Joshuae Israel mechükehou thenumia rei nhicunuoko rei siro solhimia uko donu keba pete mhodzünu Mosae diekhakeshü pete phrüshü, mu dieca puorei phrüshü mota mo.