Joshua 7 - Angami Naga CL (Re-edited) Bible (BSI)

Akan Phoumakewa

¹ Derei Israelko kenyü vie nu kejo chüwa. Süu Akan ükecü Karmi nuou mu Zabdi tsuu zo, siro Juda yiemia donu Zera chienuomia puo kenyü vie chülieketa la Jihova noupfhü Israel gei tu sierta.

² Joshuae Jeriko nunu themia ketsepie Bethel niathutsa Bet-aven khieki Ai rüna nu shü di uko ki “Kho di kijüu rieshücie,” si. Süla themiakoe kho Ai rieshü.

³ Sidi uko la vor Joshua ki pucü: “Mia pete kho Ai whuo zo morei vi, mia nyie kenie moro nyie se kholie ro mhamo. Themia pete bu kemezhie di sünu kho ba hie, Ai nu kebako keduoyo zo.”

⁴ Süla mia nyie se mese sünu kho ru ukoe Ai themiako mhodzü nunu tata.

⁵ Ai themiakoe rünau kharu nunu uko whuo zotsur ketsie tsau Shebarim tso di kijüthou phi chasu kinu uko mia seresorou geiwa. Ru themiako melou thachüta mu thachü zo vo mekuteta.

⁶ Sitse Joshua tsiu Israelmia phichüko upfhe cierha mu uzie pie kijü zerepfülie di Jihova dietseidiekhobouu mhodzünu zhü thevatie tsota, siro nyophe pie uko tsügei shüpfü.

⁷ Sidi Joshuae sie, “Hou, Niepuu, Jihova! Kiüdi no hieko ze Jordan cie parshü di, hieko pekawaketuo la hieko khapie Amorko dzie nu shüwatuo ga? Hieko Jordan khie lutsa batakecü we vikuotuomu ru!

⁸ He-i Niepuu, a kedipuo pu salietuo dimu, Israel-e uko ngumvüko mhodzü taketa siesü!

⁹ Cüsie tsie we Kananmiako tsiu rünaü nu kelhou pete süu si votie, mu hie houpfü di hie krenyü mu kijüu nu hie za pejüwatie! Sita ro no n za kezhau la kedipuo chü ta?”

¹⁰ Sitse Jihovae Joshua ki, “Sielie! Kiüdi zerepfü hizhü zo ga?

¹¹ Israel-e phoumawate; ukoe a uko ki diekhakeshü dietseidiekho-u varhuowate. Ukoe kenyü vie huo chüliete; ukoe rügulie zorei meda di pie uko nya donu shüliete.

¹² Süla Israelkoe uko ngumvümia mhodzü thalie mote; ukoe rünoupie uko ngumvümiako tsüshüte, kekreilamonyü uko tsie we rüsekepfü puochü di pekawaketuo nu thaketa la! Nieko chükelie vienyako bie pesuowa kemochie, a nieko ze tuo sa motatuo.

¹³ Sieliecie, themiako chü kemesalie, sidi uko ki, ‘Sodu la nie thuo nie chü kerünuolie; kekreilamonyü Jihova Israel Kepenuopfüe pucü, “He-i Israel; no n geinu kenyü vieko khawa kemochie n ngumvüko mhodzü thalie kenjü!”

¹⁴ Süla nieko khise nie seyie mu seyie di vortuo. Sidi Jihovae seyie tekelieu chienuochienuo idi penuo vortuo, Jihovae chienuo tekelieu kikrukikru idi penuo vortuo; mu Jihovae kikru tekelieu mia puopuo idi penuo vortuo.

¹⁵ Sidi kenyü vie sa puo tekelieu mi pie puo thewatuo, puo mu puo keba pete, puo Jihova dietseidiekho-u varhuowa tsiu kenya mhatho se Israel gei vorwaketa la.’ ”

¹⁶ Süla Joshua khiserüna sielie di seyieseyie di Israel ze vor; sidi Juda yiemia telie.

¹⁷ Sidi puo Juda chienuomia ze vor ru Zera chienuo telie, siro Zera chienuoko kikru mu kikru ze vor di Zabdi kikru telie.

¹⁸ Siro puo Zabdi kikruu nu mia puopuo idi ze vor ru Zabdi tsuu, Karmi nuou Akan, Juda yieu telieta.

¹⁹ Sitse Joshuae Akan ki, “A nuou, no zayie pie Jihova Israelmia Kepenuopfü tsülie, sidi puo ki n kejo phralie, mu no kedipuo chüwa shiü, kevieta hie di a ki pushücie.”

²⁰ Akan-e Joshua ki, “Kethote, a Jihova Israel Kepenuopfü mhodzünu phoumawate. A hau chüwate.

²¹ A terhü mhavako donu Shinar nunu kechü pfhe kezivi mu rakachü shekel krie kenie, tsiu suna shekel hiepengou mesi bakecü puo ngushü tse, a süko mehoute, di süko pieliete. Mu harie, a pfheki nu rakachü bu pekhro di kijü nu süko keviepie zhü ho.”

²² Sitse Joshuae dieliemia ketseshü, di ukoe ta pfheki nu vo ru rakachü bu pekhro di mha süko pfheki nu khrupie zhü ngulie.

²³ Ru ukoe pfhekiu nunu süko chülie di se Joshua mu Israelko pete ki vor di khapie Jihova mhodzünu shü.

²⁴ Sidi Joshua tsiu Israelmia peteko Zera nuou Akan mu rakachüu, pfheu, sunau, puo nuo thepfuko tsiu thenuko, puo thudoko, gadako, tekuoko, puo pfheki, mu puo vie ükecü pete telie; di süko se Akor Razhau nu vorlie.

²⁵ Sitse Joshuae sie, “No kiüdi mha kere haikecü se vor úko gei shü ga? Jihovae thie mha kere pie n gei shütuo,” si. Sidi Israelmia pete ketsie pie Akan mu kekreiko pete vakhriwa di uko vienyako sa thewa.

²⁶ Sidi uko puo mho geinu tsiepfhe kezha puo pfheshü; süu thie ketso rei baya zo. Sitse Jihova nouyie tu kebau rükreta. Mu thechü süu za pie Akor Razhau chüta.