Joshua 6 - Angami Naga CL (Re-edited) Bible (BSI)

Jeriko Dahou Me tsuketa

¹ Jeriko nadiu sü Israelko la puo kharu khatsapfü bata; miapuorei nadiu nu le morei pra mota.

² Ru Jihovae Joshua ki, “Harie, a Jeriko, siro puo kediu tsiu puo chüpahiko pete pie n dzie nu shüwate.

³ No mu terhümiavimia pete khunhie va puo tuo nadiu whituo. No zha sorou hakemhie chütuo,

⁴ mu zievomia thenie bu tekuo kia ketsü u thetse pie di dietseidiekhobouu mhodzünu tuotuo. Mu zha thenie nhie nieko va thenie tuo nadiu whishü tse zievokoe ketsüko khoushütuo.

⁵ Siro ukoe tekuo kia ketsüko khou pecha seshütuo, mu niekoe sü pfhe si mumetha, themia pete shie peto seshütuo, sitse nadiu dahou me tsu puozha chüpfü zhütatuo. Sidi rüpfhünuo pete tuo mezhü nadiu nu lelietuo.”

⁶ Sitse Nun nuou Joshuae zievoko kieshü di uko ki, “Dietseidiekhobouu pielie, mu nieko mia thenie tekuo kia ketsüko pie di süu mhodzünu tuoshülie.”

⁷ Puoe themiako ki, “Tuoshülie; tuose nadiu whi sedelie, siro rünyie keseko bu Jihova dietseidiekhobouu mhodzünu tuoshülie.”

⁸ Siro Joshuae themiako ki die pushü tse, tekuo kia ketsü kepie zievo thenieko Jihova mhodzünu tuoshü, di ketsüko khoushü, mu Jihova dietseidiekhobouu pie uko medzi di tuoshü.

⁹ Rünyie kesekoe ketsü khouketuo zievoko mhodzünu tuo, mu puosietsa kepfheko dietseidiekhobou sie nu tuo, mu zievokoe tuo chakhrie ketsüko khou.

¹⁰ Süsie rei Joshuae themiako ki diekhashü di sie: “Nieko mepfümewhilie lho, morei mia bu nieko pfhe rei silie lho, a nieko bu shienukeshü nhie nie-e shietuo, si kemochie nie tie nunu die puorei puphra lho.”

¹¹ Sidi puoe themiako ki pushü di dietseidiekhobouu toupielie di va puo nadiu whishü; süsie uko razhüchüu nu vorlie di teizeizhau pevolie.

¹² Joshua khiserüna sielie, mu zievoko Jihova dietseidiekhobouu pielie.

¹³ Mu tekuo kia ketsü thenieko kepie zievokoe Jihova dietseidiekhobouu mhodzünu ketsüko khou pete mo di khoutuo zo; tsiu rünyie kepiekoe uko mhodzü tuo vo, mu puosietsa kepfhekoe Jihova dietseidiekhobouu sie nu tuo, zievokoe tuo chakhrie uko ketsü khoutuo zo.

¹⁴ Zha kenie nhie ukoe va puo nadiu whi voshü di uko razhüchü nu la vorta. Ukoe zha sorou hau chü voshü.

¹⁵ Zha thenie nhie ukoe teisotie sielie di hadzü kemhie tou di va thenie tuo nadiu whishü. Sünhie zocü ukoe va thenie tuo nadiu whishü.

¹⁶ Mu va thenieu va, zievokoe ketsüko khoushü tse, Joshuae themiako ki “Shieshüliecie! Jihova nadiu pie nie tsüwaketa la.

¹⁷ Nadiu mu sünu keba mha peteko pekawaketuo la pie Jihova tsüshüwatatuo. Rahab thethenupfü mu puo kinu puoze kebako rübei rheilietuo; puoe themia ketsekeshünie keviekeshü la.

¹⁸ Derei nieko miapuorei pekawaketuo vieko puorei mehou di chü lho, mhanuü nie süu chü ro nie-e kemezhiekecü tsiu kepeka se vor Israel razhüchüu nu shüshü zotuokecü la.

¹⁹ Sirei rakachü, suna, mese mu thegikhouühiebouko zowe Jihova la mesa zo, süko pie Jihova kinyibouu nu shütuo.”

²⁰ Süla ketsüko khoushü, mu themiako shieshü. Themiakoe ketsü khoukeshü sishü mumetha, ukoe mepfüshü, sitse dahouu me tsu puozha chüpfü zhüta, sidi themiakoe u thuo u mese kinu nadiu nu lelie, di nadiu lielie.

²¹ Siro uko zhiecha se nadiu nu mha pete peka lotsowa, thepfumia rei thenumia rei, phichünhicu mu sizomonyü mithu, tekuo, siro gada rei pete dukhriwa.

²² Derei Joshuae kijüu riekecünie ki, “Thethenupfü ki vo di nnie puo ki die khakeshü mhiei, puo mu puo kinu keba khe ze parlie.”

²³ Süla unie le di Rahab, puo puo mu puo zuo, puo prünuoko tsiu puo ze keba pete ze parlie, unie-e puo kikru mu puo diemiako pete rei ze par Israelko razhüchü nu khapie bawa.

²⁴ Siro ukoe mi pie nadiu tsiu sünu keba pete thewa; sirei suna, rakachü, mese mu thegi se kechü vienyako zowe pie Jihova kinyibouu nu khashülie.

²⁵ Derei Joshuae Rahab thethenupfü tsiu puo kinu kebako mu puovie keba pete kelashü, süpfüe mharienu di Joshuae ketsekeshü dielienie keviekeshü la. Puo yiemia thie ketso rei Israel nu lhoutuo zo.

²⁶ Süteiki Joshuae rüse puo pie uko gei shü, di sie, “Themia kehoupuorei sie di Jeriko nadiu chü laketuo dojükecümia bu Jihova mhodzü rüsepfücie! Kehoupuorei puomvü dzekeshüu puo nuo nuorieu pejütuo; mu kehoupuorei kharu sedekeshüu puo nuo nhicutho-u pejütuo.”

²⁷ Siro Jihovae Joshua ze tuolie; mu rüna pete nu puo za pu kemeyie phi vota.