Joshua 5 - Angami Naga CL (Re-edited) Bible (BSI)

Gilgal nu Israelko Zhükere mu Ciekevonyi

¹ Jordan niakratsa keba Amor kediko pete mu dzükezha khie keba Kanan kediko pete Jihovae Jordan chü pesoshü di Israelko bu cie pralie ükecü dze sishü. Sitse ukoe Israelko la u melou suo mu michie phi bata.

² Süki Jihovae Joshua ki, “Tsiekhrü puoü vikecü chülie, sidi va kenieu Israelko zhürewalie,” sishü.

³ Süla Joshuae Jihova kepu tuoi tsiekhrü puoü kevi chülie, sidi Gibit-haralot nunu Israelko zhü rewa.

⁴ Mu Joshua uko zhürekecü puoca hau, Ijipt nunu kepar thepfumia pete, terhü themia pete, ukoe Ijipt nunu parkelie sie nu rayha nu, chala nu siata.

⁵ Ijipt nunu keparko pete u zhürewata zorei, Israel-e Ijipt nunu parkelie sie, rayha nu ketuo ki penuokelieko zhüre mo.

⁶ Ukoe Jihova pfhe rünyü kemo la, Israelkoe cie hiedia rayha nu rühou di Ijipt nunu parkelie terhümiaviko pete siata; Jihovae mithunudzü mu mepfhidzü krukezhü kijü puo khapie u tsütuo üdi uko puonuoko ki rüsekeshü uko bu we ngulie lho üdi Jihovae rüsewa.

⁷ Süla Joshuae uko zhürekeshüko, puoe uko sou nu sesierkeshüko nuonuoko zhürewa; chala nu uko zhüre mo zoluokecü la.

⁸ Seyie pete u zhürekewa sie, vi lalie kemochie razhüchü nu ba zo di menekelie tso.

⁹ Jihovae Joshua ki, “A, thie, nieko Ijiptmia khrükhro ketuo thengau chü kelhouwate,” isi. Süla thie ketso rei, thechüu za pie Gilgal üdi kiete.

¹⁰ Israelkoe Jeriko razhau khieki nu Gilgal nunu razhü chü keba ki, zha keredia nhie thevatie ciekevonyiu nyilie.

¹¹ Ciekevonyiu sienhie ukoe Kanan kijü nunu pelhoukelie vie cü kerietho chü; lhako kethuokecü mu khreiüshükemo niekhrüda cülie.

¹² Sidi ukoe kijüu nu lhoukelie vie cükelie sienhie manna tsur sa mota; mu Israelko manna cü sa mota, sidi teicie süu nu Kanan nunu ciekelie vie cüta.

Joshua mu Zhiecha Pie Ketha Themiau

¹³ Va puo Joshuae Jeriko khieki keba ki puoe tosie ru themia puo zhiecha puo pie di puo mhodzünu ketha ngu. Sitse Joshuae puo ki kho puo ketso di, “No úko puo zo me, mo, hie kepetsoumia ga?”

¹⁴ Sitse puo sie, “Puo la rei mo, derei a krodiko Jihova rüpfhünuoko mhokezhau chü di tsie vor ketha zo.” Ru Joshua tsu kijü zerepfü zhülie di puo rüsuota di sie puo ki, “A niepuu puo kituou bu kedipuo chü nyüya ga?”

¹⁵ Sitse Jihova rüpfhünuo mhokezhaue Joshua ki, “N phi geinu n phikouu rhuowalie; no ketha chüu mesakecü la.” Mu Joshuae sükemhie chülie.