Joshua 4 - Angami Naga CL (Re-edited) Bible (BSI)

Rükra Tuolieketuo Tsie Sekecü

¹ Seyie peteu Jordan cie pralie tse, Jihovae Joshua ki:

² “Themiako donu mia kerekenie kedaliecie, seyie puo nu mia puopuo idi,

³ sidi uko ki, ‘Jordan metsuo nunu ketsie kerekenie chülie, zievoko kethachü touu nunu, süko pie vor di tsiezhü nieko razhü chüketuo thechüu nu shülie’ idi pushüliecie.”

⁴ Sitse Joshua puo thuo kedakelie mia kerekenieko kieshü, seyie puonu mia puopuo idi;

⁵ uko ki, “Nieko Jordan metsuo nu phi di Jihova nie Kepenuopfü dietseidiekhobouu mhodzü nunu Israel seyieko le di ketsie nieko tse chüpie nieko bouka gei shülie.

⁶ Sitse mha hau nieko donu zasi puo chü tuolietuo. Sidi thiesie nie nuonuoe ‘Ketsie hako nie la kedipuo ga?’ idi ketso sie ro,

⁷ nie-e uko ki Jihova dietseidiekhobouu toupie kerü nu kephi ki Jordan dzükru dathekewa dze putuo. Siro ketsie hakoha la Israelmiako haki nu kedipuo chüte shikecü rükra sei-ilieketuo puo chütuo.”

⁸ Israelkoe Joshua kepu tuoi chülie. Siro Jihovae Joshua ki die khakeshü tuoi ukoe Israel seyieko le di Jordan metsuo nunu ketsie kerekenie chülie, sidi pie vo uko razhüchüu nu khapie zhüwa.

⁹ (Siro Joshuae Jordan metsuo nu, dietseidiekhobouu kepie zievoko thakecü thechüu nu ketsie kerekenieko seshü; ketsie süko thie ketso rei zhüya zo).

¹⁰ Jihovae themiako bu chünu di Joshua ki diekhakeshüko chü tseiwa kemochie zievokoe Jordan rüu metsuo nu tha zo, sidi Mosae Joshua ki pupie ketuo dieko chü tseilie, mu themiako bu rükri kerüu cie prata.

¹¹ Sidi themiako pete kerüu cie prata tse, Jihova dietseidiekhobouu mu zievokoe themiako mhodzü nunu tuo pralie.

¹² Siro Reuben nuomia, Gad nuomia mu Manasseh nuomia ketoupuo Mosae uko ki pukeshü tuoi ukoe rünyie se di Israelko mhodzü rie vota.

¹³ Sidi themia nyie hiedia mese terhü la u kesepfü di Jihova mhodzü Jeriko razhau nu pralie.

¹⁴ Sünhiesü Jihovae Israelmia pete mhingu nu Joshua chü pezhashü; mu ukoe Mosa khrüprei kevor tuoi, puo kerhei chie puo khrüpreilie.

¹⁵ Siro Jihovae Joshua ki,

¹⁶ “Dietseidiekhobouu kepie zievoko bu Jordan nunu partanu di diekhashücie.”

¹⁷ Süla Joshuae zievoko ki, “Jordan nunu partacie,” ishü.

¹⁸ Ru zievokoe dietseidiekhobouu pie di Jordan rüu metsuo nunu par kijü keso pralie tse, thiedzü tuoi Jordan dzü kru puothau nu la vorta di puokhie pete vulie.

¹⁹ Themiakoe thekhrü kerieu zha ker nhie Jordan cieparlie di Jeriko khie niathutsa keba Gilgal nu ukoe razhü chülie.

²⁰ Sidi Joshuae Gilgal nunu uko Jordan nu pie kepar ketsie kerekenieko seshü,

²¹ puoe Israelko ki, “Thiesie nie nuonuoe u puonuo ketso di, ‘Ketsie hako kedipuo la ga?’ iro,

²² nie-e uko ki, ‘Israelkoe Jordan cie kepar ki kerüu so di tuo parliewe,’ idi uko bu silietuo.

²³ Nie-e Jordan cieparlie kemochie, Jihova nie Kepenuopfüe Kemerie Dzükezhau chü pesokeshü tuoi, Jordan rei chü pesoshü di u bu parkelie dze se uko ki pu tuotuo.

²⁴ Sidi kijü nu themia pete bu Jihova dzie kedithede kuo shikecü silie, mu nie bu kechachie Jihova nie Kepenuopfü khrüprei tuolieketuo la,” sishü.