Joshua 3 - Angami Naga CL (Re-edited) Bible (BSI)

Israelko Jordan Ciekelie

¹ Süsieduü khiserüna Joshua mu Israelko pete sie zilie, sidi Shitim nunu tuo Jordan nu kerlie. Sitse uko süu cie prakecü mhodzü sükinu razhü chü.

² Teisozha se sie krütakoe razhüchüko nu whi vo,

³ mu themiako ki sie, “Levi zievokoe Jihova nie Kepenuopfü dietseidiekhobouu pie kevor ngu tse, nie kebachüko nunu tuoshülie. Sidi süu medzilie.

⁴ Sitse niekoe nie voketuo chau silietuo, nie hadzü cha hanu vor mo zocü la. Sirei süu ze kepecie tuolie, thu nyie kenie kepecie nu tuolie; süu penuo vo lho.”

⁵ Joshuae sie themiako ki, “Nie chü kemesalie, kekreilamonyü Jihova sodu nie donu ungomhatho chüshütuo.”

⁶ Süsie Joshua zievoko ki “Dietseidiekhobouu toupielie di themiako mhodzü tuoshülie.” Süla ukoe dietseidiekhobouu pielie di themiako mhodzü tuoshü.

⁷ Jihovae Joshua ki, “A thie Israelmia pete mhingu nunu n chü pezha sedeshütatuo, sitse ukoe a Mosa ze ketuo tuoi n ze tuo zokecü silietuo.

⁸ Siro noe dietseidiekhobouu kepie zievoko ki pushütuo, ‘Niekoe Jordan rüu dzü khie vorlie tse, Jordan nu sei-i thalie.’ ”

⁹ Sitse Joshua themiako ki, “Penuo vorlie di Jihova nie Kepenuopfü dieko rünyüliecie.”

¹⁰ Joshua sie, “Nieko hanunu rhei tuoyakezha Ukepenuopfü nieko donu ba ücü mu nieko mhodzü nunu Kananko, Hitko, Hivko, Perizko, Girgashko, Amorko mu Jebusko whuo touwa zotuocü silietuo.

¹¹ Kijü pete Niepuu dietseidiekhobouu nie mhodzünu Jordan nu votazhie.

¹² Süla tsie Israel seyieko donunu seyie puo nu mia puopuo idi mia kerekenie kedaliecie.

¹³ Kijü pete Niepuue, Jihova dietseidiekhobouu pieketuo zievoko phizhü le dzü prashü ro, Jordan dzü pesotsa nu kru kekerko khawatuo, sidi dzü kru kerkezhüko thechü puo nu thatatuo.”

¹⁴ Sidi themiako Jordan cie praketuo la razhüchüu nunu tuo sedeshü mu dietseidiekhobouu kepie zievokoe themiako mhodzü tuoshü.

¹⁵ Siro lieyie tei pete nu Jordan nu dzü thu pra puo khie pete vuta meya, süla dietseidiekhobouu kepieko Jordan nu vor tsolie mu dietseidiekhobouu kepie zievoko vor kerüu tsolie di u phi se dzü prashü tse,

¹⁶ dzü kru kerkezhüko kru sa mota, siro pfhepfü di Zarethan kepenuoki Adam ükecü nadiu ketso khapfü thata. Sidi Araba dzükezha, Kesia Dzükezhau nu tsu kezhüko dathe tseiwata, sidi themiako bu Jeriko rütsietsa pralie kevi chülie.

¹⁷ Tsiu Israelko kerü keso nu phikezhü ki Jihova dietseidiekhobouu kepiekoe Jordan metsuo keso nu tha di themiako bu pra tseilie kemochie metei thalie.