Joshua 23 - Angami Naga CL (Re-edited) Bible (BSI)

Joshua Mhatho pie Krütako Pelekewa

¹ Puotei kecha vota mu Jihovae uko houpfü keba ngumvümia peteko kinu kerülei pie Israel tsüshüta, siro Joshua tsata, tsiu phichüta.

² Süla puoe Israel pete nu phichüko, krütako, capiko, tsiu kezhamiako kieshü di uko ki, “A tsie we tsate mu a kelhouzha rei kho phite;

³ siro niekoe Jihova nie Kepenuopfü nie la seyie hako gei chükeshü pete nie thuo nguwate, kekreilamonyü nie la kegeikecüu sü Jihova nie Kepenuopfü zo.

⁴ Mha hako rükraliecie, seyie keshako pie nie kayie vie chütuo üdi a thuo kezapie nie tsüwate, siro ae penyükelie seyieko sa di niathutsa Jordan nunu niakratsa Dzükezhatho-u ketso khashüwate.

⁵ Siro Jihova nie Kepenuopfü thuo nie mhodzünu uko khuwatuo, sidi nie mhinguki nu uko whuowatuo; mu Jihova nie Kepenuopfü nie ki phrakeshü tuoi nie uko kijüu pevielietuo.

⁶ Süla meteilie mu Mosa leshüda nu thezho thupie ketuo pete dieze chü menuolie, di rürei thevitsa morei thezatsa vata moliecie,

⁷ mu nie-e nie donu baluokecü seyieko ze puochü di lhouta mo mu uko rhuoko za pu, se rüse, uko lie chü morei nerhutsu rüsuota lho,

⁸ derei thie ketso nie Jihova nie Kepenuopfü kutokelie tuoi tuolie.

⁹ Jihovae nie mhodzünu seyie kezha kekuoko whuowate, mu seyieko puorei nieko mhodzünu thalie mo.

¹⁰ Nieko mia puo zorei mia nyie puo whuo petakewa chüshü, kekreilamonyü puo nie ki phrakeshü tuoi, nie la terhü chükeshüu sü Jihova nie Kepenuopfü zocü la.

¹¹ Süla Jihova nie Kepenuopfü khriekecü nu pecü seliecie.

¹² Mhanuü nieko rürei vo di lhiekelie nie donu keba seyie kekreiko penou di uko nuopfüko lie mu uko ze kesekeri ita ro,

¹³ si touliecie, Jihova nie Kepenuopfüe nie mhodzünu seyie hako whuo sashü motatuo, sikecüumonyü se nie ketsü kijü kevi hau nunu nie kaüjüta kemochie, sükoe nie la ciephrie mu kebie tsiu nie kevü seiro, mu nie mhi la zohu chü tuotatuo.

¹⁴ “Siro harie, tsie a se tei tso bate; siro Jihova nieko Kepenuopfüe nie la phrakeshü mha kevi pete puorei tsei moketa jü zo, mu hau nie melou pete se mu nie ruopfü pete se si bate, mha pete nie la tsei vorte, mhapuorei tsei moketa jü.

¹⁵ Derei Jihova nie Kepenuopfü nie ki mha kevi phrakeshüko pete nie gei vorketa tuoi, Jihova nie Kepenuopfü kijü kevi khapie nie tsükeshü hau nunu nie kaüjüta kemochie, puoe mha kesuo khe chüpie nie gei shütuo.

¹⁶ Mhanuü nie Jihova nie Kepenuopfü nie bu zenu di diekhakeshü dietseidiekho-u varhuo di terhuo kekrei lie chü mu zeretsu süko rüsuota ro, Jihova nouyie nie gei tusiertatuo, sidi Puoe pie nie tsükeshü kijü keviu nunu nie-e kaüjü mhatatuo.”