Joshua 22 - Angami Naga CL (Re-edited) Bible (BSI)

Joshuae Niathutsa Seyieko Ketsekewa

¹ Sitse Joshuae Reubenmia mu Gadmia mu Manasseh yiemia tietsapuo kie kengushü,

² di uko ki, “Nieko Jihova kituou Mosae nieko ki diekhakeshü peteko chü tseiliete, siro a nieko ki diekhakeshüko pete nu rei a die zelie.

³ Niekoe zha hatsuohade vor thie ketso rei nieko siezedzürie vawa mo, derei pecü menuo di Jihova nie Kepenuopfü nie ki diekhakeshüu chü tseiliete.

⁴ Siro puo die phrakeshü mhie, Jihova nie Kepenuopfü kerülei pie nie siezedzürieko tsüshüte, süla tsie Jihova kituou Mosae se nie ketsü kijü, Jordan niathutsa, nie ra, nie ki nu la volie.

⁵ Derei diekhakeshü mu thezho-u chüüzelieketuo la pecülie, süusü Jihova kituou Mosae nie bu Jihova nie Kepenuopfü khrielieketuo, puo cha pete nu tuolieketuo, puo diekhakeshüko zelie mu puo kutoi tuolie, tsiu nie nou pete, nie ruopfü pete se puo lie chü tuolienu di nie ki pukeshüu zo.”

⁶ Sidi Joshuae japie uko tsüshü di uko ketsewa; sitse ukoe uko pfheki nu vota.

⁷ Siro Manasseh yie tietsapuo la Mosae Bashan khashü uko bu uko vie chü, derei Joshuae kekreitsa la Jordan niakratsa uko siezedzürieko donu uko ya khashü. Tsiu Joshuae uko ketsepie uko kinu keshü ki japie uko tsü

⁸ di sie uko ki, “Kinyi kekra kicükiri, rakachü, suna, mese, thegi mu pfhemenei kekra se nie kinu volie. Ngumvümia vie vakelieko se vo nie siezedzürieko ze kezalie.”

⁹ Süsie Reuben nuoko, Gad nuoko, mu Manasseh yie tietsapuo kinu la vorta, Kanan kijü, Shilo nunu Israelmia kekreiko ze kekhota di Gilid, süu Jihovae Mosa ki diekhashü di pie uko ketsü kijüu nu voketuo la tuota.

¹⁰ Mu ukoe Kanan kijü Jordan tsatie vorlie tse; Reuben nuoko, Gad nuoko mu Manasseh yie tietsako Jordan khie nu ruosuoba kezha phi puo chüshü.

¹¹ Mu Israelkoe Reuben nuoko mu Gad nuoko tsiu Manasseh yie tietsae Kanan kijü rie nu Jordan khie Gelilot nu ruosuoba chükeshüu sishü, süu Israelko vietsa ba.

¹² Mu Israelkoe süu sishü tse, Israelmia mechüe sie uko ze terhü chüketuo la Shilo nu vor kengulie.

¹³ Sidi Israelkoe Eliazar zievo-u nuou Finehas ketsepie Reubenmiako, Gadmiako mu Manasseh yiemia tietsa Gilid kijü nu kebako ki shü,

¹⁴ mu puo sa peyumia ker, Israel seyieko donunu thinuo puo nu puopuo, mu süko pete Israel chienuo donu krütamia phre.

¹⁵ Ukoe Gilid nu vorlie di Reubenmia, Gadmia mu Manasseh yie tietsako ki,

¹⁶ “Jihova mechükehouu pete hamhie di pu, ‘Kiüdi niekoe Israelmia Kepenuopfü gei mha kesuo chü mu Jihova siekemedzi nunu rüreitatuoü, siro Jihova perhiepetsoutuo üdi ruosuoba hamhiecü chüya ga?

¹⁷ Peor nu zorei phouma pesuo sewata mo üme? Süla thepe kere Jihova themia mechüu gei vor, mu kephouma süu la thie ketso rei we mesalie mo ba zoluoe,

¹⁸ mu tsie rei nie Jihova kinu rürei latatuo üya le? Nieko thie we Jihova perhiepetsou ba, sodu puo Israel mechükehouu pete gei puo nei mo siertuo.

¹⁹ Mhanuü tsie nieko kijüu mesa mota üro, tuose Jihova pruu keba hie kijü nu vortalie; di hie ze kijü keza di lhou batalie, derei Ukepenuopfü Jihova ruosuobau kemo ruosuoba kekrei puo chü la di Jihova petsou morei hie petsou hie.

²⁰ Zera nuou Akan kenyü vie pielie di phoumakewa la noupfhüu Israel mechükehouu gei vor mo üme? Mu puo kejo la puo rübei sia mo.’ ”

²¹ Sitse Reubenmia, Gadmia mu Manasseh yie tietsakoe Israel krütako die kela di pucü;

²² “Jihova, terhuoko mho Kepenuopfüu! Jihova terhuoko mho Kepenuopfüu! Puoe si ba; mu Israel bu rei siliecie! Hauha Jihova perhiepetsoukecü mhatho puo chüta üro, thie hieko perheishü hiecie;

²³ hie-e ruosuoba puo chükelie geinu Jihova kinu rüreitatuo üro, morei hie kethe ruosuo mu telha ruosuo, morei vitho ruosuo khakeshü le di chü üro, Jihova thuo hie gei khepu lieliecie.

²⁴ Süu la mo zo! Derei thiesie nie nuosenuoyie-e hie nuosenuoyie ki, ‘Nieko we Jihova Israel Kepenuopfü ze kedipuo chüketuo ba ga?

²⁵ Jihovae Jordan pie nieko Reubenmiako, Gadmiako mu hieko donu therie chüshüwate mu Jihova kitsa nie ya puorei jü’ idi puketa keprei la, sita ro nie nuonuokoe hie nuonuo chüpie uko bu Jihova prei motalie vi.

²⁶ Süla hiekoe sie, ‘Úko keze ruosuoba puo chükecü lelie khe, süu kethe ruosuo morei ruotho la mo;

²⁷ derei hieko mu nieko donu mu uko sie kelhoumia donu zhapu puo chüketuo la, sidi Jihova mhodzünu kethe ruosuo ruothoruori siro vitho ruosuoko khashü di puo lietho chü kevor thashüketuo la; mu silie liro tsiesie nie nuonuoe hie nuonuo ki, “Jihova kitsa nie ya jü,” ikecü pu molietuo.’

²⁸ Süla hie lekecü, die sikecü pie hie ki rei morei hasie hie nuosenuoyie ki rei pusie ro hie-e, ‘Harie meholiecie, Jihova ruosuoba rhiu hie puonuokoe chükecüu, kethe ruosuo morei ruotho la mo; derei hieko mu nieko donu zhapu puo la zo.’

²⁹ Jihova perhiepetsou mu puo kinu rüreitatuo üdi Jihova ruosuoba puo pruu mhodzünu kebau rüduo ruosuoba puo chülie di kethe ruosuo, telha ruosuo mu ruothoruori khakeshü kele we hie gei vorkenyüwe,” sishü.

³⁰ Finehas zievo-u mu kehou krüta tsiu puo ze ketuo Israel puotsanuo mu peyukoe Reuben nuoko, Gad nuoko mu Manasseh nuoko diepu sipie uko neilie.

³¹ Sidi Eliazar zievo-u nuou Finehas-e Reuben nuoko, Gad nuoko mu Manasseh nuoko ki, “Jihova u ze tuo zokecü hie siliete, niekoe Jihova gei jo, cürüwa kemo la, niekoe Jihova dzie nunu Israelko kelalashüta zo” sishü.

³² Sidi Eliazar nuo Finehas mu krütakoe Gilid kijü nunu, Reuben nuoko mu Gad nuoko ze kekhota di Kanan kijü nu Israelko ki la vorta, sidi dieu se vor uko ki pushü.

³³ Ukoe dieu sipie uko neilie, di Ukepenuopfü tsheta. Süsie Reuben nuoko mu Gad nuoko ze terhü chü di uko kijüu bie pesuoketuo rhükecü die pu sa mota.

³⁴ Sidi Reuben nuoko mu Gad nuokoe ruosuobau za üse Zhapu idi kielie, “Kekreilamonyü” ukoe sie, “Úko donu zhapuu sü Jihova Ukepenuopfü zo,” sidi pu.