Joshua 21 - Angami Naga CL (Re-edited) Bible (BSI)

Levimia la Rünako

¹ Sitse Levi thinuo nu puotsanuo donu thekrüko Eliazar zievo-u mu Nun nuou Joshua tsiu Israelmia thinuoko puonuoko donu krütako ki vor;

² sidi ukoe Kanan kijü nu keba Shilo nunu uko ki pu di, “Jihovae Mosa ki diekhakeshü hieko bu balieketuo nadi mu hie kicükiri la kirituo sa pie hie tsünushü.”

³ Süla Jihovae diekhakeshü ki ze Israelkoe uko kayie kijüko nunu nadi huo mu sükhie kijüko sa pie Levimia tsüshü.

⁴ Sidi dape di Kohatmia la par. Süla Levimia Aron zievo-u yieko donu Juda, Simeon mu Benjaminmia rüvie nunu nadi kerese ngulie.

⁵ Tsiu Kohatmia kekreiko dape di Efraim, Dan mu Manasseh yie ketoupuo niakratsako kinu rüna ker ngulie.

⁶ Gershonmia dape di Esakar, Asher, Naftalinuomia mu Bashan nu keba Manasseh yie ketoupuo niathutsako kinu rüna kerese ngulie.

⁷ Merarimiako uko puotsanuo le di Reuben, Gad, mu Zebulunmia kinu nadi kerekenie ngulie.

⁸ Jihovae Mosa ki diekhakeshü tuoi Israelkoe dape di nadi hako mu uko khie kijü kirituoko khapie Levimiako tsüshü.

⁹ Ukoe Juda mu Simeon yie nunu nadi puoya pukeshü hako pie,

¹⁰ Levi yiemia Aron thinuo nu Kohatnuomia ya chüshü. Dape nu uko ya nu parlie rieketa la.

¹¹ Uko Juda kijü nu keba Kiriat-arba (Arbae Anak-nuo puou) süu Hebron khapie uko tsü mu puo khie kirituoko rei sa.

¹² Derei uko nadiu lieko mu natseko we pie Jefune nuou Kaleb bu pie puo vie chü tuota.

¹³ Sidi uko Aron zievo-u yiemiako tsükeshü liro hako: Hebron, siro themou kechüko rüguoketuo nadiu tsiu puo kirituoko siro sükhie nadiko, Libna mu puo kirituoko,

¹⁴ Jatir mu puo kirituoko Eshtemoa mu puo kirituoko,

¹⁵ Holon mu puo kirituoko, Debir mu puo kirituoko,

¹⁶ Ain mu puo kirituoko, Juta mu puo kirituoko, Bet-shemesh mu puo kirituoko, sidi seyie sünie nu nadi thepfü mu kirituoko sa phre di khashü.

¹⁷ Siro Benjamin seyie nunu Gibeon mu puo kirituoko, Geba mu puo kirituoko,

¹⁸ Anathot mu puo kirituoko, Almon mu puo kirituoko di nadi dia.

¹⁹ Aron zievo-u yiemiako vie rüna kerese mu kirituoko sa.

²⁰ Siro Levi yiemia donu Kohatmiako we Efraim yiemia vie nunu rüna huo kha uko tsü.

²¹ Efraim kijüthou rüna nu keba Shekem, themou kechü rüna puo, mu Efraim kijü nu süu kirituoko sa, Gezer mu puo kirituoko sa pie uko tsü.

²² Kibzaim mu puo kirituoko, mu Bet-horon mu puo kirituoko, rüna dia.

²³ Tsiu Dan yie nunu Elteke mu puo kirituoko, Gibethon mu puo kirituoko

²⁴ Aijalon mu puo kirituoko, Gat-rimon mu puo kirituoko idi rüna dia.

²⁵ Siro Manasseh yie tietsa kinu rüna kenie, Tanak mu puo kirituo, Gat-rimon mu kirituoko sa.

²⁶ Kohatmia nadi ngukelie pete kesa rüna ker mu uko kirituoko.

²⁷ Siro Levi yiemia donu Gershonko la Manasseh niathutsako kinu Bashan nu keba Golan, themou kechü rüna puo mu puo kirituoko sa, tsiu Beshtera mu puo kirituoko idi rüna kenie.

²⁸ Siro Isakar yiemia rüvie nunu Kishion, mu puo kirituoko, Daberat mu puo kirituoko.

²⁹ Jarmut mu puo kirituo En-ganim mu puo kirituoko idi rüna dia.

³⁰ Asher yie nunu Mishal mu puo kirituo Abdon mu puo kirituoko.

³¹ Helkat mu puo kirituoko tsiu Rehob mu kirituoko idi rüna dia.

³² Siro Naftali rüvie nunu Galil nu Kedesh, themoumia la rüna puo, Hamot-dor mu Kartan tsiu kirituoko sa di rüna se.

³³ Gershonmia nadiko pete kesa di kirituoko sakecü nadi kerese.

³⁴ Siro Levimia keshako, Merarimiako, la Zebulun rüvie nunu uko ya khakeshü; Jokneam mu puo kirituoko, Karta mu puo kirituoko.

³⁵ Dimna mu kirituoko, Nahalal mu puo kirituoko idi rüna dia.

³⁶ Siro Reuben rüvie nunu Bezer mu puo kirituoko, Jahza mu puo kirituoko,

³⁷ Kedemot mu kirituoko, Mefat mu puo kirituoko idi rüna dia.

³⁸ Siro Gad rüvie nunu Gilid nu Ramot mu kirituoko, themoumia rüguoketuo rünau, Mahanaim mu kirituoko,

³⁹ Heshbon mu kirituoko, Jazer mu uko kirituoko pete kesa rüna dia,

⁴⁰ Levi yiemia keshako, Merariko tsükeshü rüna kerekenie.

⁴¹ Israelmia rüvie pete nu Levi nuomia ketsü rünako, kirituoko sakecü pete kesa rüna hiediaethetha.

⁴² Nadi hako puopuokecü uko rierhuo nu kirituo nyi phre.

⁴³ Sidi Jihovae uko puonuoko tsütuoü phrakeshü kijü pete pie Israel tsüshü, mu ukoe süu pevielie di sünu bata.

⁴⁴ Siro Jihovae uko puonuoko ki rüsekeshü tuoi puoe kuokelie tsiu kerülei kha uko tsü, mu ngumvümia puorei uko mhodzü thalie mo,

⁴⁵ Jihovae Israel kinumia gei mha kevi chüshütuo üdi phrakeshüko puorei tsei moketa chü mo; pete tseishü zo.