Joshua 20 - Angami Naga CL (Re-edited) Bible (BSI)

Themou Kechü Rünako

¹ Jihovae Joshua ki,

² “Israelko ki pukeshü, ‘A Mosa bu nieko ki pukeshü tuoi themou kechü rüna kro puo keda kreilie,

³ sidi miapuonie puo kenyü chü mo di kekrükedeikelie nu mia biekhrikewamia bu ta süko nu volie, mu süko nie la thezie khepu kepfhüu kinu rüzhükelie chütuo.

⁴ Siro mia dukhrikewamia puoe rüna hako puo nu ta vo di kharu kinu puo dze pie rünau nu phichüko ki pushütuo; sitse uko puo ze rünau nu lelie di puo bu balieketuo thechü pie puo tsütuo.

⁵ Mhanuü thezie khepu kepfhüu puo whuo vorta rei, uko mia biekhrikewau khapie puo dzie nu shülie lho, puoe hamhodzütsa puo zanuou ngumecü tuo mo zo di puo kenyü chü mo puo biekhrikewa la.

⁶ Sidi puoe mechü mhodzünu puo dienyau kecüwa kemochie, mu süteiu nu zievokezhatho chükebau siata kemochie rüna sünu ba zotuo. Süze mia biekhrikewau puo thuo puo nadiu nu, puoe taketa puo ki nu la votatuo.’ ”

⁷ Süla ukoe Naftali kijüthou rüna Galil nu Kedesh, mu Efraim kijüthou rüna nu Shekem, tsiu Juda kijüthou rüna nu Kiriat-arba, (süu Hebron) hako kha kreipie balie.

⁸ Siro Jordan tsekepra Jeriko niathutsa Reuben yieko rüvie rayha kethekhra gei keba Bezer, mu Gad yiemia rüvie Gilid nu Ramot mu Manasseh yiemia rüvie Bashan nu Golan kedapie balie.

⁹ Nadi hako Israelmia pete la siro uko donu kelhou solhimia la rei themou kechü rünako zo, kehoupuorei puo chünyüchü mo di mia biekhrikewamia bu ta süko nu volie, mu mechükehou mhodzünu puo nyie kecüwa kemochie, sünu balie di thezie khepu kepfhüu bu puo dukhriwa molieketuo la.