Joshua 2 - Angami Naga CL (Re-edited) Bible (BSI)

Joshua Themia Ketsepie Jeriko Riekecü

¹ Siro Nun nuou Joshua pekhre di mia rücieketuo la Shitim nunu mia kenie ketseshü di sie, “Vo di Kanan kijüu ba hurei Jeriko rieshüliecie,” si. Süla unie rünau nu vorlie di süzhü teizeizhau la Rahab ükecü thethenumiapfü puo kinu balie.

² Mu mia Jeriko kediu ki pu di, “Israelmia kro puo tsiezhü kijüu rieketuo la vorte,” sita.

³ Süla puoe dielie khapie Rahab ki shü di sie, “U kijü peteu rieketuo la n kinu mia huo lete, süko ze parcie!” sita.

⁴ Derei thenupfü unie zelie di unie keviewa. Sidi hapfü sie, “Themianie a kinu vor zowe, derei unie kirapuo nu vor shiü a si mo.

⁵ Unie niaki keletie ki nadiu care khacü mhodzü tuote. Unie kitsatie vote shiü a ngu sa mote. Rükri unie siewhuo vo ro, unie telie vi ho,” ishü.

⁶ Derei hapfüe umianie ze kikhru gei kholie di, flaxbo kengupie keba khronu unie keviepie bawa.

⁷ Siro themiako nadiu nunu prata tse, kharuu khawa. Ukoe themianie whuo zo Jordan pfüthekecü chau ketso vo.

⁸ Unie zhüketa mhodzü, hapfüe unie ki kho di pukecü,

⁹ “Jihovae kijü hau pie nie tsüwaketa a si bata zo. Siro nie kepreie hie gei bate, mu kijü hau nu kelhou pete nnie la michie kemerie chü bate.

¹⁰ Kekreilamonyü nie-e Ijipt nu ta kepar ki kimhie di Jihova nie la Kemerie Dzükezhau chü pesoshü shikecü, mu nie kimhie di Jordan niathutsa keba Amorko kedi, Sihon mu Og unie peka lotsowa shikecü rei hie sishüte.

¹¹ Hieko süu dze sishü tse michie phre bate; nieko la hie pete hie kethepfu tuo mote. Jihova nie Kepenuopfü sü tei pesogei mu kijü nu rei Kepenuopfü zo.

¹² Mu süla tsie, ae nnie gei vikeshü mhiei a kinuko gei rei vishüketuo Jihova za se a ki rüseshücie, mu a bu nie peleketuo zasi huo khashücie,

¹³ sidi a puo mu a zuo, a prünuoko mu siezedzürieko, siro uko kinuko pete rei sa kelashücie, sidi kesia nunu hie kelashü zocie!” si.

¹⁴ Sitse unie-e puo ki, “Hie nie sou nu hie kerheiro khashü zotuo! Siro mhanuü noe hienie mhathoko se mia puo ki rei pu molie ro, hie rei Jihovae kijü hau kha hie ketsü nhie, n gei tseiüvi mu diethoshü zotuo,” sishü.

¹⁵ Siro puoe dahou kukecü kipuo lhou ba, süla puoe unie bu khirki nunu kero puo teshü di kelie.

¹⁶ Sidi puoe sie unie ki, “Kijüthoutsa khotalie, sitse nnie whuo ketuoko nnie ngulie motatuo. Uko la vorta kemochie zha se sükinu rüshü batalie. Süsie we nnie thuo nnie cha nu volie vitatuo,” siwa.

¹⁷ Themia nie-e puo ki, “No hienie bu n ki rüsekeshüu nu we, hienie jowalie lho,

¹⁸ hieko nie kijü penyü kevor ki, kero kemerie hau pie no hienie bu kekelie khirki nu kheshülie. Siro n puo mu n zuo, n prünuoko siro n puo kinumia pete kengupie n kinu shülie.

¹⁹ Mhanuü mia puoe kiu cie pra di siata ro puo thuo puo tsügei zotuo, mu kejo-u hie pfülie kenjü; derei mhanuü kinu kebako mia puo gei rei thedzie khashüwa ro hie kejo-u pfü zotuo.

²⁰ Sirei noe hienie mhatho hau puwa ro, hienie rei no hienie bu n ki rüsekeshü dieu gei jo motatuo,” si.

²¹ Ru puoe, “Nnie die kemhiei chüliecie,” sishü. Sidi puo unie ketsewa. Siro unie tuota tse, puoe khirki geinu kero kemerieu khepie zhawa.

²² Themianie kijüthou gei kho di zha se rüshü bata. Siro unie kewhuoko nadiu mu sükhieümhou pete nu unie pfhü derei ngulie mota di la vorta.

²³ Sitse unie-e kijüthou geinu kerlie, di kerüu cieparlie di Nun nuou Joshua ki vorta. Mu unie dze pete se puo ki pushü.

²⁴ Siro unie puo ki pu sakecü, “Jihovae kijüu pete pie úko tsüwaketa hie si touta zo, mu harie, sünu kelhouko pete u prei di michie bate,” sishü.