Joshua 18 - Angami Naga CL (Re-edited) Bible (BSI)

Kijü Kepeshako Kezakecü

¹ Israel mechükehou pete vor Shilo nunu kengulie, sidi sünu rüsuopfhekiu pethoulie. Kijüu penyüpie uko mhodzünu zhüwa.

² Siro Israelko donu seyie thenie kayie uko ya ngulie kemo baluo.

³ Süla Joshua sie Israelko ki, “Nieko kichiepuo ketheda di le Jihova nieko puonuoko Kepenuopfü se nie ketsü kijüu lielie mo di pfhe ba zotuo ga?

⁴ Seyie puo nu mia sese khashülie, siro a uko ketseshü di uko bu vo kijüu rie mu whishütuo, sitse ukoe kayiekayie le di puo dze thulietuo, süsie a ki la vortuo.

⁵ Tsiu ukoe kijüu kezapie za thenie chülietuo, Judae pekhrotsa puo rüvie nu batuo, mu Josef kinukoe pesotsa puo rüvie nu batuo.

⁶ Niekoe kijüu kezapie za thenie chükelie dze thulie di, se a ki vortuo; sitse a Jihova Ukepenuopfü mhodzünu dape di kezapie nieko tsütuo.

⁷ Derei Levimiako we nieko donu kijü pie uko ya chülie lho, Jihova la zievo chükecü sü uko kayie zocü la; tsiu Gad mu Reuben yieko siro Manasseh seyie ketoupuo Jordan niathutsa uko kayie nguliete, Jihova kituou Mosae pie uko tsüshüwate.”

⁸ Sidi themiako tuoshü, mu Joshuae kijüu dze thutuo üdi tuokeshüko tarho di sie, “Vo di kijüu rieshülie, sidi puo dze thulie di a ki la vorcie, sitse ae hanu, Shilo nu Jihova mhodzüki nu nieko la dapetuo.”

⁹ Sidi themiakoe vo kijüu rieshü, sizomonyü ukoe kimhie di kijüu kezapie za thenie chülie shikecü mu rünako dze sa thupie leshüda nu shülie; sidi ukoe Shilo razhüchüu nu Joshua ki la vorlie,

¹⁰ tsiu Joshuae Shilo nu Jihova mhodzüki nu uko la dape chü, sidi kijüu kezapie Israel seyie uya ngulie mo baluocüko tsü phreshü.

Benjamin Ketsü Kijüko

¹¹ Siro dape nu Benjamin yiemia ya parlie, puotsanuo le di, tsiu Juda mu Josef yiemiako kijü donunu pie uko ya chüshü.

¹² Pesotsa uko rie Jordan nunu sede di pesotsa Jeriko kijükhru gei kho, sidi kijüthou rünau ze niakratsa va zotsu Bet-aven kijü rayhau nunu thela chü.

¹³ Sidi therieu Luz (süu Bethel) pekhrotsa va vo, di Bet-horon Kerünuotsa kijüthou pekhro-u Atarot-adar nu tsu.

¹⁴ Therieu sünunu kekreitsa va vota, sidi kijüthou hau niakratsa Bet-horon kepetsou nu pekhrotsa vatsu di Kiriat-baal (süu Kiriat-jearim), ücü Juda yiemia nadi puo nunu thela chüta. Hau pie niakratsa rie chü.

¹⁵ Pekhrotsa ro therieu Kiriat-jearim khie thela nunu sede di tsu Efron, tsiu tsu Neftoa Dzüluou tso;

¹⁶ sidi therieu Hinom razhau mhodzü tou nu keba kijüthou kela nu ker tso, süusü Refaim razhau pesotsa kela nu; sidi pekhrotsa va se Hinom razhau nu tsu, sidi pekhrotsa Jebusko naditsa nu En-rogel nu tsu.

¹⁷ Sidi pesotsa va se En-shemesh nu vo di Adumin chakhrau kepetsouu Gelilot nu kho, siro sünunu Reuben nuou Bohan Tsieu nu tsutso;

¹⁸ sidi pesotsa Bet-araba kijükhru gei kho di Araba nu tsuta,

¹⁹ di therieu Bet-hogla kijü pesotsa kho di Kesia Dzükezha pesotsa puotie kemeyau tso, sidi Jordan rüu tietshü nunu thela chü, hau pekhrotsa therieu.

²⁰ Mu Jordan pie niathutsatieu chü. Hako Benjaminnuoko, uko puotsanuo le di therie chüpie uko tsüshü.

²¹ Siro Benjaminnuoko uko puotsanuo le di peviekelie nadiko hako: Jeriko, Bet-hogla, Emek-keziz.

²² Bet-araba, Zemaraim, Bethel,

²³ Avim, Para, Ofra,

²⁴ Kefar-amoni, Ofni, mu Geba, nadi kerekenie üse uko natseko sa;

²⁵ sizomonyü Gibeon, Rama, Birot,

²⁶ Mizpe, Kefira, Moza,

²⁷ Rekem, Irpil, Tarala,

²⁸ Zela, Haelef, Jebus, (süu Jerusalem), Gibiah mu Kiriat-jearim; nadi keredia üse uko natseko rei sa. Kijü haue Benjamin yiemiako yau, uko puotsanuo le di chükeshüu.