Joshua 17 - Angami Naga CL (Re-edited) Bible (BSI)

Manasseh Niakratsako

¹ Manasseh sü Josef nuo nuorieu zo, süla puo yiemiako ya rhuo pie uko tsü. Siro Makir-e Manasseh nuo nuorieu mu Gilid-nuo puou, puoe terhü themia puo zocü la Jordan niathutsa keba Gilid mu Bashan pie puo tsü.

² Sidi Jordan niakratsa pie Manasseh nuomia kekreiko, puotsanuo le di uko ya chüshü, Abiezermia, Halekmia, Asrielmia, Shekemia, Hefermia mu Shemidamia hako pete la; süko u puotsanuo lekecü, thepfumia kitsa Josef nuou Manasseh yiemia phre.

³ Tsiu Manasseh nuou Makir, süu nuou Gilid, süu nuou Hefer, süu nuou Zelofehad puo nuo thepfu jü, thenumia rübei; uko Mahla, Noah, Hogla, Milka mu Tirza.

⁴ Ukoe zievo-u Eliazar tsiu Nun nuou Joshua mu krütako ki vor di, “Jihova hieko bu hieko seyiemia mhie hie kayie ngulienu di Mosa ki diekhashü zo,” silie. Süla Jihova die khakeshü tuoi, puoe uko puo thinuomia donu kayie khapie uko tsüshü.

⁵ Sidi Jordan niathutsa keba Gilid mu Bashan kijü sa kemo Manasseh yatsa za ker ngulieta,

⁶ kekreilamonyü Manasseh nuo thenuko rei u prünuoko ze kayie we kesaketa la. Gilid kijüu zowe khapie Manassehmia thinuo kekreitsatieko tsüwa.

⁷ Manasseh rüvie Asher nunu Shekem niathutsa Mikmethat tso; sidi therieu pekhrotsa zotsu En-tapua nu kelhouko tso.

⁸ Tapua khieümhou kijüko we Manasseh rüvie zo, derei Tapua rüna Manasseh rie nu kebau we Efraimmia vie,

⁹ Sidi therieu tsu Kana Rücüu tso. Rücüu pekhrotsa keba rünako Manasseh rüvie nu ba zorei süko Efraimmia vie phre. Sidi Manasseh rieu rücüu pesotsa ze kho di dzükezhau pie puo thela chü.

¹⁰ Pekhrotsa Efraim rüvie mu pesotsa Manasseh rüvie idi dzükezhau pie unie therie chü; peso-niakratsa ro Asher mu peso-niathutsa ro Isakar ketso.

¹¹ Manasseh-e Isakar nu Asher rüvie nu keba hako pie puo vie chü; Bet-shean mu Ibliam tsiu sükhieümhou natseko, siro Dor mu puo natseko, mu En-dor, Tanak, Megido mu hako khieümhou natseko (seu ro Nafat).

¹² Sizorei Manasseh themiakoe rüna süko nu keba themiako whuolie kenjüta; süla Kananmiako bu kijü sünu lhou sei tuota.

¹³ Derei Israelkoe kuo sierlie tse, Kananmiako whuo tsei zowa mo di uko kemvü chü di uko bu mhachüta.

Efraim mu Niakratsa Keba Manasseh Yieko Kijü Penyü Sakelie

¹⁴ Josef seyiekoe Joshua ki, “No kidi kijü za yopuo rübei pie hieko ya chükecü zo ga? Niepuu japie hieko ketsü la hieko themia kekra bate.”

¹⁵ Joshuae la sie, “No themia kekra bata mu Efraim kijüthou rünau n la mereta ro, no ketsa gei kholie, sidi Perizko mu Refaimko kijüko nu n thuo n la kijü chü kemesalie.”

¹⁶ Josef seyiekoe la sie, “Kijütseiko hieko la mere zo; siro razha nu keba Kananmia pete, Bet-shean mu puo natse nu kebako rei, tsiu Jezril Razhau nu kebako rei thegi kierbagei nyi phre.”

Isakar Yiemia Ketsü Kijüko

¹⁷ Sitse Joshuae Josef thinuo, Efraimko tsiu Manassehko ki, “No seyie kekra kro puo mu n kekuo rei nyi phicü kro puo. No kijü za puo rübei pie n vie chülie lho.

¹⁸ Derei kijütseiko n vie chütuo; süu ketsa zo ürei, no süu da kemesalie di puo rie thela nunu vo kekreitsa kela ketso pevielietuo; siro Kananko sü uko thuo thegi kierbagei nyi mu kuo ba zorei, noe uko whuowatuo.”