Joshua 16 - Angami Naga CL (Re-edited) Bible (BSI)

Efraim mu Manasseh Niakratsa Kebako Ketsü Kijüu

¹ Josef kayieko tsükeshü kijüu therie pekhrotsa ro, Jeriko khie Jordan nu sede di niathutsa Jeriko dzüluo nu vo rayha tso, sidi Jeriko nunu kijüthou pfüthe zo kho Bethel tso;

² tsiu Bethel nunu Luz nu vo, mu Arkiko lhou keba Atarot pfüthe vo;

³ mu niakratsa keva Jefletko kijü Bet-horon Pekhro-u tso, sidi Gezer nu ke di dzükezhau pie puo thela chü.

⁴ Sidi Josef yiemia, Efraim mu Manasseh kayie kijü uko ya ngulie.

Efraimmia Ketsü Rüvieko

⁵ Efraimmia rieu uko pfutsanuoko le di rhuokeshü hamhie: Uko rie niathutsa ro Atarot-adar nunu vo Bet-horon Peso-u ketso,

⁶ mu sünunu Mediteranian Dzükezhau tso; pesotsa ro Mikmethat; süsie rüzie niathutsa va zo Tanat-shilo pfüthese Janoa niathutsa tso;

⁷ sidi Janoa nunu Atarot nu tsu, sidi Narah nunu vo Jeriko tso, di Jordan pie puo thela chü.

⁸ Therieu Tapua nunu niakratsa ze di Kana Rücüu tso di dzükezhau pie puo thela chü. Efraimmia rüvie, uko puotsanuo le di uko phruokeshü kijü hako,

⁹ siro Manasseh kijü rie hanu rünako mu natse huo kha kreipie kebako pie Efraimmia tsüwa.

¹⁰ Derei ukoe Gezer nu keba Kananmiako whuo petawa mo, süla Kananmiako thie ketso rei Efraim ze lhou tuota, derei uko bu miadie chü di mia bu uko kemvü chü ze mhachü tuota.