Joshua 14 - Angami Naga CL (Re-edited) Bible (BSI)

Jordan Niakratsa Kijüko Kezakeshü

¹ Eliazar zievo-u mu Nun nuou Joshua, siro Israel seyie donu upuonuo puotse nu krütau sasa di Jordan niakratsa Kanan kijü pie theka kezakeshü hamhiei.

² Jihovae Mosa ki pukeshü tuoi, seyie thepfü di puotieko la we dape di kayie kezashü.

³ Siro seyie kenie di puotieko lawe Mosae Jordan niathutsa kezapie uko tsüwata, derei uko donu Leviko yawe chü mo.

⁴ Josef nuonuoko seyie kenie, Manasseh mu Efraim, siro Leviko theka pie tsü mo, uko kiriko la kirituo sa di uko bu nadiko nu lhou balieketuo ngukelie zo.

⁵ Jihovae Mosa ki diekhakeshü tuoi Israelkoe kijüu kezalie.

Hebron Khapie Kaleb Tsükewa

⁶ Siro Juda themiakoe Gilgal nu Joshua ki vor, sidi uko donu mia puo Kenizmia Jefune nuou Kaleb-e puo ki, “Kadesh-barnia nunu Jihovae Kepenuopfü themiau Mosa ki n la mu a la kedipuo pushü shikecü no site.

⁷ A a kelhouzha teicie hiedia-keta ki Jihova kituou Mosae Kadesh-barnia nunu a ketseshü di a bu vo kijü rie; mu a dietho di a kengu touu se vor puo ki pushü.

⁸ A ze kekho themiako we vor u themiako nou chü kethachüwa, derei a we Jihova a Kepenuopfü siedzi chü tseishü zo.

⁹ Tsiu Mosae sünhie rüse di pukecü, ‘N phi se zhowaketa kijüu pie kechachie la n vie mu n nuonuoko vie chütuo. Kekreilamonyü no Jihova n Kepenuopfü siedzi chü tseishü zokecü la,’ si.

¹⁰ Derei harie, Jihovae süu Mosa ki pukeshü yawinu tsie ketso cie hiediaepengoute, süu Israelkoe rayha nu rühou ketuo teikite, mu Jihovae phrakeshü tuoi thie ketso a perheise vorshüte; siro harie, a tsie cie hiethethaepengoute.

¹¹ Derei a thie rei Mosae a ketsekeshü nhie tuoi mecamekhro ba zo; tsiu terhü chüketuo la morei kehoupuo chütuo ürei a kekuo ba tsei zoluo.

¹² Süla Jihovae pukeshü tuoi, tsie kijüthou rünau a tsüwaliecie; sünhie no rei Anakimmia dahou vi sekecü nadiko nu baya ücü sishüte. Jihova a ze tuolie üro, Jihova pukeshü tuoi, a uko whuo phrewatuo.”

¹³ Sitse Joshua japie Jafune nuou Kaleb tsüshü di Hebron nadiu pie puo phruowa.

¹⁴ Sidi thie ketso rei Hebron pie Kenizmia Jefune nuou Kaleb seyieko kayie chüwa. Puoe Jihova, Israel Kepenuopfü siedzi chü tseikelie la.

¹⁵ Thiedzü we Hebron za pie Kiriat-arba üya, mu Arba sü Anakimmia nadiko donu kezhatho-u. Sidi kijüu nu terhü chü sa mo bata.