Joshua 13 - Angami Naga CL (Re-edited) Bible (BSI)

Pevie Saketuo Kijüko

¹ Tsie we Joshuae tsa seta, mu puo kelhouzha kho phita; sitse Jihova puo ki, “No sü tsa sete mu n kelhouzha kho phite tsiu tsie rei kijü kekra pevie saketuo baluo.

² Kijü lie saketuo hako: Filistin kijü rüvie pete mu Geshur kijü rüvie pete,

³ (Ijiptmia rie nu keba Shihor rücüu nunu kho pesotsa Ekron rie ketso pie Kanan üsiya. Siro Filistinko kedi pengouko ro: Gaza, Ashdod, Ashkelon, Gath mu Ekron nadi hako nu lhouya), siro pekhrotsa keva Avim rüvie pete;

⁴ süsie rei Kananko rüvie pete, mu Sidonmia vie Mira nunu vo Amorko rie Afek ketso;

⁵ tsiu Gebalko kijü pete; mu niathutsatie Lebanon pete, Hermon Kijüthou pekhrotsa keba Balgad nunu Lebo-hamat kharu ketso.

⁶ Lebanon kijüthouko nunu Misrefot-main ketso, kijüthou rüna Sidonmia peteko. A thuo Israelko mhodzü nunu themia hako pete whuowatuo; siro a n ki diekhakeshü tuoi, no kijüu kezapie Israel seyieko phruoshüwa ro si zo.

⁷ Süla tsie kijü hau kezapie seyie thepfüko mu Manasseh seyie tietsako phruowalie.”

Jordan Niathutsa Kijü Kezakeshü

⁸ Manasseh seyie tietsapuo, siro Reuben mu Gad yiemiako, Jihova kituou Mosae kezapie uko phruokeshü tuoi uko kayie la Jordan niathutsa kijü ngulie:

⁹ Uko rüvie, Arnon Rüu khieki keba Aroer nunu vo Medeba mu Dibon nie donu kijü kethekhra pete.

¹⁰ Süsie rei zotsu Ammonko rie ketso tsiu Amorko Kediu Sihon, Heshbon nu dikecüu nadiko pete.

¹¹ Siro Gilid, mu Geshurko tsiu Makatmia kijü pete, Hermon Kijüthou pete, siro Bashan pete nu vo Saleka ketso,

¹² sünu Refaimko donu lhiekelie Bashan nu kediu Og, puo Ashtarot nu di, siro puo Edrei nu dikecü rüvie pete rei sa; Mosae themia hako penyüwa mu uko whuowa.

¹³ Sirei Israelkoe Geshurko morei Makatko whuowa mo, sidi süko thie ketso rei Israelko donu lhou baya zo.

¹⁴ Levi seyieko rübei Mosae uko kayie pie tsü kemo zo; ukoe Jihova Israel Kepenuopfü ki kethe ruosuo khakeshü ruosuoba geinu uko ya ngulielietuo, puoe uko ki kepu tuoi.

Reuben la Kijü Rhuokeshü

¹⁵ Mosae Reuben nuonuoko puotsanuo le di, uko kayie kijü huo rhuopie uko tsüshü.

¹⁶ Uko rüvieko, Arnon Rüu khie keba Aroer nunu mu razhau metsuo nu keba nadiu, siro Medeba houpfü keba kijü kethekhrau pete;

¹⁷ Heshbon mu kijü kethekhrau gei rünako pete: Dibon, Bamot-baal, Bet-baal-meon,

¹⁸ Jahaz mu Kedemot, tsiu Mefat,

¹⁹ Kiriathaim, Sibma, mu razhau khie kijüthou gei keba Zaret-shahar,

²⁰ Bet-peor, Pisga kijütseiko, mu Bet-jeshimot.

²¹ Siro razhau nu nadiko pete mu Heshbon nu dikecü Amorko kediu Sihon rüvie pete sa, Mosae hako rübei monyü Midian, Evi, Rekem, Zur, Hur mu Reba krütako, hako Sihon nu bayakezha kediko rei penyüwa.

²² Israelko bu dukhrikewako donu themouyakezha Beor nuou Balam rei sa.

²³ Jordan mu sükhieümhouko pie Reuben yiemiako rüvie therie chü. Nadi hako mu natseko pie Reuben yiemiako puotsanuo le di pie uko phruowa.

Gad Yieko Kayie Kijü Rhuokeshü

²⁴ Mosae Gad yiemia puotsanuo le di kayie kijü pie Gadko rei tsüshü.

²⁵ Uko rüvie ro Jazer, mu Gilid rüna pete, mu Ammonmia kijü ketou puo, Raba niathutsa Aroer ketso,

²⁶ tsiu Heshbon nunu Ramat-mizpe mu Betonim ketso, siro Mahanaim nunu Debir rie nu ketso,

²⁷ mu Jordan razhau nu ro, Bet-haram, Bet-nimra, Sukot mu Zafon, Heshbon nu Kediu Sihon kedirüvie kepeshako, siro niakratsa ro Jordan mu sükhieümhouko pie therie chü di kho pesotsa Kineret Dzükezhau ketso pie uko rüvie chü.

²⁸ Gadmiako bu pie uko kayie chüketuo la nadi hako mu natseko sa pie uko phruoshü.

Niathutsa Manasseh Yiemiako Phruokeshü Rüvieko

²⁹ Mosae kayie pie Manasseh yiemia tietsapuo tsüshü, uko puotsanuo le di pie uko phruoshü.

³⁰ Uko kijüe Mahanaim nunu Bashan pete, mu Bashan nu Kediu Og kedirüvie pete, siro Bashan nu keba Jair rüna hiesorouko pete sa.

³¹ Siro Gilid ketou puo, siro Ashtarot mu Edrei, Bashan nu Og kedirüvie nadiko; hako pie uko puotsanuo le di Manasseh nuo Makir tsü, Makirmiako ketoupuo la.

³² Mosae Moab razhau nu bacü ki hakemhie di, Jeriko niathutsa, mu Jordan kijü keza phrewa.

³³ Derei Mosae kijü puorei pie Levi yieko ya chüshü mo. Puo uko ki pukeshü tuoi Jihova Israelko Kepenuopfü sü uko kayie zo.