Joshua 11 - Angami Naga CL (Re-edited) Bible (BSI)

Jabin mu Puo Khrietho Krodi Penyükewa

¹ Hazor Kediu Jabin-e hau dze sishü tse, puoe dielie ketsepie Madon Kediu Jobab, Shimron kediu, Akshaf kediu,

² mu kedi pesotsa kijüthou rünako nu kebako, Kinerot khrotsa Araba nu kebako, kijü kerünuo nu kebako, tsiu niakratsa Nafot-dor nu niakratsa kebako,

³ mu dieliemia ketsepie Jordan khie lutsahatsa keba Kananko, mu kijüthou gei keba rüna Amorko, Hitko, Perizko, Jebusko mu Mizpa kijü nu Hermon kijüthou phi ki keba Hivko rei tsüshü.

⁴ Siro ukoe rüpfhünuo krodi kezhazha ze di par, uko rüpfhünuo sü krapie dzükezha khie huoca tuoi, siro uko kier tsiu kierbagei kekra rei sa ze di par.

⁵ Kedi hako pete keze puochü di kengulie, sidi Israel ze kegeituoü Merom dzü khie razhü chülie di sünu balie.

⁶ Ru Jihovae Joshua ki, “Uko preipie hie, kekreilamonyü sodu ha meseki a Israelmia la uko pete dukhrishü zotuo; noe uko kierko phika zawatuo, mu mi pie uko kierbageiko thewatuo.”

⁷ Süla Joshuae puo terhü themiako pete ze di Merom dzü khie uko re di uko bievü.

⁸ Ru Jihovae Israel bu uko mho kuokelie khashü, sidi Israelkoe uko whuo, gei izo pesotsa Misrefot-maim tsiu Sidon Kezhau ketso vo, mu niathutsatie Mizpa razhau ketso zo vo. Ukoe ngumvüko miapuorei perheishü mo zo di pete geiwa kemochie terhü chü.

⁹ Mu Jihovae Joshua ki diekhakeshü tuoi puo uko gei chüshü; puo uko kierko phika zawa, mu mi pie uko kierbageiko thewa.

¹⁰ Mu süki Joshuae rürei la vor di Hazor lielie di zhiecha pie kediu biewa; süteiki Hazor-e kedirüvie süko pete donu kekuotho-u zo.

¹¹ Ukoe zhiecha pie sünu keba themia pete biewa, miapuorei perheishü mo, mu mi pie Hazor thewa.

¹² Siro Joshuae nadiko pete siro süko kediko pete lielie, di dukhri phrewa, mu süko pekaperuowa, Jihova kituou Mosae diekhakeshü tuoi.

¹³ Sizorei Israelko kijü sethougei keba nadiko we puorei thewa mo, Joshuae thekewa Hazor rübei zo kemosie.

¹⁴ Siro nadi hako nunu piekelie terhü mhavako mu kicükiriko Israelkoe liepie uko vie chülie. Derei zhiecha pie themiako pete geiwa, mu mia yopuorei perheishü mo.

¹⁵ Jihovae puo kituou Mosa ki diekhakeshü tuoi, Mosa rei Joshua ki diekhashü, mu Joshuae süu dieze chü tseilie. Jihovae Mosa ki diekhakeshüko puoe puorei chü moketa jü zo.

Kijüu Pete Joshua bu Liekelie

¹⁶ Sidi Joshuae kijü süu pete, kijüthou rünako mu kerünuo nu keba pesopekhro pete, Goshen kijü pete, mu pekhrotsa kijü keso rünako, siro Jordan razhau icü lie phrelie.

¹⁷ Sidi Halak Kijüthou, rükrie se Seirtsa sieketa kinu Lebanon razha nu Balgad ketso, Hermon Kijüthou khro nu puoe uko kediko te phrelie di uko dukhriwa.

¹⁸ Joshuae kijü süki kediko ze terhü chü cha phi.

¹⁹ Gibeon nu kelhou Hivko rübei sie nadi puorei Israelko ze vitho chü mo; derei ukoe terhü chü di kekreiko pete lielie.

²⁰ Jihovae uko nou chü perepie uko bu sie Israel ze kegeiketuo chüshü, sidi uko pekaperuo tseiwa, tsiu ngumezhie moto zo di pete dukhri tseiwaketuo la. Hauha Jihovae Mosa bu chünu di diekhakeshüu zo.

²¹ Süki Joshuae vor di kijüthou rüna, Hebron, Debir, Anab, Juda mu Israel kijüthou rüna pete nu Anakimko pete biewa; Joshuae uko rünako sa di uko pete pekaperuowa.

²² Anakimmia miapuorei Israelko kijü nu ba sa mota; mia huoyo rübei Gaza, Gath mu Ashdod nu keba zota.

²³ Jihovae Mosa ki pukeshü tuoi di Joshuae kijüu pete lielie; sidi Joshuae Israel bu puo kayie chünu di kezapie seyie puopuo ya chüshü. Sidi kijüu terhü kechü nu rüleilie.