Joshua 10 - Angami Naga CL (Re-edited) Bible (BSI)

Amormiako Penyükewa

¹ Jerusalem Kediu Adonizedek sü Joshua Ai lielie di peka tseikewa, siro Ai mu puo kediu gei rei, Jeriko tsiu puo kediu gei chükeshü mhie chüshü ükecü, tsiu Gibeon nu kebakoe Israel ze vitho chüwa di uko donu lhou bata ücü sikeshü ki,

² puoe michie phita, kekreilamonyü Gibeon-e nadi kezha puo, kedi kenyi tuoikecü puo, mu süu Ai ki rei zhakuo, siro puo themiakoe pete terhümiavimia phre.

³ Süla Jerusalem Kediu Adonizedek-e dielie ketsepie Hebron Kediu Hoham, Jarmut Kediu Piram, Lakish Kediu Jafia, mu Eglon Kediu Debir ki shü di,

⁴ “A ki khor a khruohishü di úko keze Gibeon biewa khe; kekreilamonyü puoe Joshua mu Israelko ze vitho chüwate eru.”

⁵ Sitse Amormia kedi pengouko, Jerusalem, Hebron, Jarmut, Lakish mu Eglon kediko icü uko rüpfhünuo kezulie di kho Gibeon houlie, di puo ze keperhie.

⁶ Sitse Gibeonkoe dielie ketsepie Gilgal razhüchüu nu Joshua ki shü di, “N kituoko khawa hiecie, mhai khor di hie khruohicie, di hie kelaliecie! Kijüthou rüna nu keba Amormia kediko pete kezelie di hie perhie thate.”

⁷ Süla Joshuae terhü themia pete mu puo terhümiavi kevithoko sa di Gilgal nunu tuoshü.

⁸ Tsiu Jihovae Joshua ki, “Uko preipie hie, a uko khapie n dzie nu shüwaketa la; uko miapuorei n mhodzünu thalie lho.”

⁹ Sidi Joshua teizeizha pete Gilgal nunu tuo khor di vapuochü uko bieta.

¹⁰ Mu Jihovae Amorko chüpie uko bu Israel rüpfhünuo mhodzü michie kehoukeruo chüta, Israelkoe Gibeon nunu uko dukhri kemerie chüwa, sidi uko whuo tsur Bet-horon kekho chau tso, siro Azeka mu Makeda ketso uko gei vowa.

¹¹ Ukoe Israel mhodzü ta di Bet-horon nu kekezhü ki, Jihovae teigei nu prü kezhazha pekrüshü di Azeka ketso uko vakhri vota. Israelko bu zhiecha pie uko dukhrikecüko ki rei prü bu tsur pekhrikewako we krakuota.

¹² Jihovae kuokelie pie Israelko tsüshü di uko bu Amorko mho kuokelie nhie, Joshuae Jihova rüchü; sidi puoe Israelko mhinguki nu hai di pu: “Niakio, no mele mo di Gibeon nu thatacie; mu Khrüo no rei Aijalon razhau nu thatacie.”

¹³ Ru niaki-e tsesei-i thata, mu khrü rei puotha nu zhata, seyieu bu uko ngumvümia gei u khepulie kemochie. Süu dze Jashar leshüdau nu thupie zhü mo üme? Sidi khunhie zhate mese niaki leta mo di teimeluo nu zhata.

¹⁴ Mhakipuorei sünhie kemhie Jihovae themia pfhe rünyükeshü jü zo; sümhodzü rei, mu süsie rei; Jihovae Israel la kegei zocü la.

¹⁵ Süsie Joshuae Israel rüpfhünuo pete ze di Gilgal razhüchüu nu la vorta.

Joshuae Amormia Kedi Pengou Dukhrikewa

¹⁶ Süki kedi pengouko zowe tata, di uko vo Makeda tsiepfüu nu rüshü bata.

¹⁷ Ru mia Joshua ki, “Kedi pengouko vo Makeda tsiepfüu nu rüshü ba di ngu üshü.”

¹⁸ Sitse Joshua sie, “Ketsie kezhazha ketoupie tsiepfüu tie mekawalie, siro kepfhe themia khapie bawalie.

¹⁹ Derei nieko zowe bata hie di nie ngumvümia whuo zo volie, sidi uko sietsanu uko relie. Uko bu uko rünako nu le hie! Jihova nie Kepenuopfüe kuokelie kha nie dzie nu shüwate ho,” sishü.

²⁰ Joshua mu Israelkoe uko dukhri thewa kemochie, siro mia huoyo rübei ta nadi dahou kenyiko nu lelie di lhiekelie zo,

²¹ mu themiako gei mhapuoreiwa mo di pete Makeda nu razhüchüu nu Joshua ki la vorta, mu kijü süki miapuorei Israelko kepetsou die puorei pu nreita.

²² Sitse Joshuae sie, “Tsiepfüu hieshülie, sidi kedi pengouko ze a ki vorlie.”

²³ Ru ukoe tsiepfüu hieshü, di sünunu kedi pengouko Jerusalem, Hebron, Jarmut, Lakish mu Eglon kediko ze puo ki vor.

²⁴ Sidi uko ze Joshua ki vorshü tse, Joshuae Israelmia pete kieshü, sidi puoe puo zekepar terhü themiako mhokezhako bu uko phi pie kediko vo kedelienu di puo diekhashü. Ru uko vor di uko phi pie uko vo kedelie.

²⁵ Sitse Joshuae uko ki, “Michiepie hie, morei nie ziejüta hie; meteilie mu thepfu zolie, Jihovae nie ngumvümia nie-e perhieyacüko gei hakemhie chüshü zotuocü la.”

²⁶ Süsie Joshua uko dukhriwa, sidi uko mo pie seibo pengou gei gouwa. Sidi thevatie ketso uko goupie zha.

²⁷ Niaki keletie ki Joshuae diekhashü di seiboko geinu kesiamoko pie kerlie, sidi süko kelhoupie uko vo rüshü keba tsiepfüu nu shü lawa, sidi ketsie kezhazha pie tsiepfüu mekawakecü thie ketso rei ba zo.

²⁸ Sünhie teiso nu Joshuae zhiecha pie Makeda tsiu puo kediu pekawa; puoe sünu themia pete dukhriwa, mu mia yopuorei lhieshü mo. Sidi Jeriko kediu gei chükeshü tuoi Makeda kediu gei rei chüshü.

²⁹ Süsie Joshua mu Israelko pete sa Makeda nu ke di Libna whuo.

³⁰ Siro Jihovae süu siro puo kediu pie Israelko dzie nu shüwa; mu puoe zhiecha pie süu biewa, tsiu sünu kelhou pete biewa, tsiu miapuorei peshashü mo, ukoe Jeriko kediu gei chükeshü tuoi sünu kediu gei rei chüshü.

³¹ Sidi Joshuae Israelko pete ze di Libna nunu Lakish nu vor süu houlie di süu re, di süu bie.

³² Tsiu Jihovae Israel bu Lakish mho kuokelie chüshü, mu puoe zha kenie nhie süu lielie. Puoe Libna gei chükeshü tuoi zhiecha se süu peka di sünu keba themia pete dukhriwa.

³³ Siro Gezer kediu Horam rei Lakish khruohituoü khor, derei Joshua puo tsiu puo themiako geiwa mu miapuorei lhieshü mo.

³⁴ Süsie Joshuae puo rüpfhünuo ze di Lakish nunu Eglon nu vo, di süu houlie di re, di süu bie,

³⁵ mu sünhie süu lielie, tsiu sünu keba pete dukhriwa, puoe Lakish gei chükeshü tuoi di .

³⁶ Sitse hau va sie, Joshua Israel pete ze di Eglon nunu Hebron nu kho; di ukoe süu re;

³⁷ sidi süu lielie, tsiu zhiecha pie sünu kediu mu themia pete dukhriwa, sü rübei monyü sükhieümhou rünako rei pete biewa. Joshuae nadiko peka lotsowa, Eglon gei chükeshü tuoi chüwa. Mia yopuorei lhieshü mo.

³⁸ Siro Joshua Israel pete ze di Debir nu la vor, di süu re, mu uko süu bie,

³⁹ sidi puoe süu lielie, puo kediu tsiu puo rünako sa lielie, sidi ukoe zhiecha pie uko bie di sünu keba pete peka tseiwa; puoe puorei lhieshü mo, puoe Hebron gei mu Libna mu puo kediu gei chükeshü tuoi, Debir mu puo kediu gei rei chüshü.

⁴⁰ Sidi Joshuae rünako pete penyüwa. Puoe kijüthou rünako mu Negeb, siro kijü kerünuoko tsiu kijütseiko tsiu uko kediko pete penyüwa. Puoe miapuorei lhieshü mo, derei mia pete dukhriwa. Jihova Israel Kepenuopfüe diekhakeshü tuoi.

⁴¹ Joshuae Kadesh-barnia pekhrotsa nu Gaza ketso, mu Goshen kijü pete üse pesotsatie kho Gibeon ketso penyüwa.

⁴² Jihova Israel Kepenuopfüe Israel la kegeikeshü la, Joshuae va puo rüwhuo nu kedi hako pete mu uko kijü lielie.

⁴³ Sidi Joshuae Israel pete ze di Gilgal razhüchü nu la vorlie.