Joshua 1 - Angami Naga CL (Re-edited) Bible (BSI)

Jihovae Joshua bu Kanan Penyünukeshü

¹ Jihova kituou Mosa se sie, Nun nuou Joshua, Mosa kekhruohiu ki Jihovae mha pushücü,

² “A kituou Mosa sü siate. Süla tsie sie di dojülie, no mu Israelmia pete, sidi Jordan rüu ciese a kha uko ketsü kijüu nu leliecie.

³ A Mosa ki phrakeshü tuoi, kha nie tsüshüwate mu themiako u phizhü pie zhokelie kijü pete kha nie tsüwate.

⁴ Nie kijü rieko liro rayhachüu nunu vo Lebanon tsiu kerü kezhau Eufrat rüu tsotuo; mu Hitko kijü pete nunu tsu niakratsa Dzükezhatho-u ketso nie rüvie chütuo.

⁵ No rhei ketuo chie miapuorei n penyülie lho. Ae Mosa ze ketuo tuoi n ze tuotuo. A n vajowalie lho morei n khawalie lho zo.

⁶ Meteilie mu thepfulie, kekreilamonyü noe themia hako krüta chü di ae khapie tsütuo üdi uko puonuoko ki phrakeshü kijüu welietuocü la.

⁷ Meteilie mu thepfulie, a kituou Mosae thezho kha n ketsü pete dieze chülieketuo le tou zolie. Süu nunu rürei thezatsa morei thevitsa vata hie, n kevo cha pete nu vikehielieketuo la.

⁸ Thezho leshüdau bu n tie tseta hie. Süu tezeiteiso phrü mu le medo ba zolie tsiu sünu thupie ketuo pete chüüze tsei zolie. Silie liro no vikehielietuo mu n mhatho chü khrielietuo.

⁹ A n bu meteilie mu thepfulienu die khakeshü rükra zolie! Michie morei n ziejüta hie, kekreilamonyü Jihova n Kepenuopfü, no kehoura vo rei n ze tuo zotuokecü la.”

Joshua Themiako ki Die Khakeshü

¹⁰ Süsie Joshuae krütako ki diekhashü di,

¹¹ “Razhüchüko nu whi voshülie di themiako ki pushülie: ‘Kecüca huo dojüliecie, kekreilamonyü nie-e zha se donu Jordan cie pra di Jihova nie Kepenuopfüe kha nie tsüpie kezhü kijüu pevielieketuo la.’”

¹² Joshuae Reubenko mu Gadko siro Manasseh yiemia ketou puo ki mha pu di,

¹³ “Jihova kituou Mosae nie ki diekhashü di, ‘Jihova nie Kepenuopfüe kijüu nie tsü di pie nie kerülei chü chütuo ükeshüu rükraliecie.’

¹⁴ Nie nupfünuoko, nie nuonuoko mu nie kicükiriko khapie haki balie, derei nie rüpfhünuoko, terhü la rünyie keseko, nie siezedzürie Israelko mhodzü tuo pratuo, uko khruohilieketuo la,

¹⁵ nie-e Jihova nie Kepenuopfüe khapie uko ketsüu pevielie kemochie tuo zo votuo. Sidi puoe khrukhrekecü tei khapie Israel seyieko tsüshüta ro, süze nie-e Jihova kituou, Mosae kha nie ketsü Jordan niathutsa nie kijü haki la vor lhoulietuo.”

¹⁶ Ukoe Joshua die kela di sie, “No mhakehoupuorei hie ki kepuko chütuo mu no kehourapuo vonu hie ketse shierei hieko votuowe.

¹⁷ Hieko Mosa die keze tuoi, n die ze zotuo, mu Jihova n Kepenuopfü Mosa ze ketuo tuoi puo bu n zetuokelieu chüliecie!

¹⁸ Kehoupuorei n petsou morei no diekhakeshüko yopuorei ze mvü ro puo bu siatuo. Meteilie mu thepfu tha zolie!”