Jona 4 - Angami Naga CL (Re-edited) Bible (BSI)

Jona Puo Nou meyieketa

¹ Derei hau la Jona puo nei mota, di puo nou meyieta.

² Puo Jihova ki cha di, “He-i Jihova, A a rüna nu baluokecü nu hau pushü mo me? Haha la a therie nu ta Tarshish nu voketa zo; kekreilamonyü noe mia ngumezhie mu mia khrieyakezha Kepenuopfü puo zo, n nou meyie tho, n zho vithor, tsiu siazha khashütuoü keba nu zorei n nou keditayakecü a si ba.

³ Süla tsie, he-i Jihova a geinu a kerheiro setayi, kekreilamonyü a we rhei kebau ki siaketa we vikuote.”

⁴ Sitse Jihova sie, “No n nei mokecü mese üba me?”

⁵ Süsie Jona nadiu nunu tuoprata di vo nadiu niathutsa bata, mu sünunu puo la keyachü puo chülie. Puoe süu khrü nu ba di nadi nu kedipuo chüshütie shi mehotuoü pfhe ba.

⁶ Sitse Jihova Ukepenuopfü ronyho puo bu lhou sier, sidi süu kra Jona mhogei vota, süu bu puo tsü keya chütuoü, mu ba kemezhie keba nunu puo kelashütuo üdi; süla Jonae nhau la puo nei phi ba.

⁷ Derei süsienhie teiso vor ru Ukepenuopfüe zope puo bu vor nhabo-u khrathewa, süla süu rüwita.

⁸ Sidi niakithu par tse, Ukepenuopfü niathutsa teikhrie kele puo keseshü, tsiu niakiu Jona tsü phieshü, süki puo phisiata, sitse puoe puo bu siatanu chata. Puo sie, “A bu rhei kebau ki siaketa we vikuote,” si.

Jona Pejokeshü

⁹ Derei Kepenuopfüe sie Jona ki, “No nhabo-u la n nei moketa mese üme?” Sitse puo sie, “U we, a nei mo pie sia rei nyüta zo.”

¹⁰ Sitse Jihova sie, “Noe nhabo puo la rei le ba, süu la no mhapuorei chü mo morei süu bu memie sieketuo la mhapuorei chü mo; süu khuzhü puo nu lhou sier, tsiu khuzhü puo nu suote.

¹¹ Siliro a Ninevi nadi kezhau, mia lakh puo di nyie mepfü u dzie u zatsa tsiu u vitsa si kekreilie kenjükecü ba, tsiu khunuo kekra keba rükra zhü mo üme?” sita.