Jona 3 - Angami Naga CL (Re-edited) Bible (BSI)

Ninevi Thenou Kedikelie

¹ Jihova die va kenieu Jona ki vor di sie,

² “Sieliecie, Ninevi nadi kezhau nu volie, di a n ki kepu dieko pie puo ki pucie.”

³ Süla Jonae sielie di Jihova pukeshü mhiei tuo Ninevi nu vo. Ninevi-e nadi kezha se puo, puo kezha zha se chatuo.

⁴ Jonae nadiu nu lelie, sidi zha puo chatuo tuoshü, süsie puo shiekhoui di, “Ninevi pekawaketuo zha hiedia bakecü zote!”

⁵ Sitse Ninevimiako Ukepenuopfü pelelie, sidi uko kezhakecü pete, gakhropfhe dzie di mevota.

⁶ Siro dielieu Ninevi kediu ki vo tse, puoe puo kediba nunu sielie, di puo boulie rhuowa, sidi gakhropfhe se puo whelie tsiu mige nu bata.

⁷ Süsie puo Ninevi nu mha pu di: “Kediu mu puo pehüko thezho-u khashü: Themia kehoupuorei morei khunuo rei, tekuo morei thukro-u shierei u bu mhapuorei cülie lho. Süko vachü lho, morei dzü rei krielie lho.

⁸ Themiako mu khunuo pete bu gakhropfhe dzielie, sidi uko bu shie petopie Kepenuopfü ki shülie. Mu pete bu u kesuo kechü nunu mu u dzie nu mha pekatuoü bakecü pete nu rüreiliecie.

⁹ Kepenuopfü rürei vor mu puo noukedilie, tsiu puo noupfhü nunu rüreita; sidi u bu kata molie rei si momu.”

¹⁰ Siro Ukepenuopfü uko mhathoko ngukeshü ki, kimhie di uko kesuoko nunu rüreilie shikecü kenguki, Kepenuopfüe uko gei kepeka se vortuo üdi pukeshü nunu puo nou rüdita; sidi puo süu chü mota.