Jona 2 - Angami Naga CL (Re-edited) Bible (BSI)

Kethezie Tsali

¹ Sitse Jonae khuou vadi nunu puo Kepenuopfü ki puo mezhiemelovü,

² di sie, “A kemezhiekelie nunu Jihova kieshü, siru puo a pfhekhoshü; ae Sheol vadi nunu melieshü, siru no a pfhe silie.

³ No a kelhoupie kesou nu, dzükezha melou nu shüwa, tsiu dzü rüpfhü thuo a khie a mhou houlie; n mele tsiu n rüpfhü a mho vote.

⁴ Sitse a sie, ‘N mhinguki nu a ketsewate; kimhie di a n kemesa rüsuokiu meholie ta?’

⁵ Dzüko a vupfüliete; kesouu a houpfülie; nhako kezipie a tsü zepfü ba,

⁶ a kijüthouko phi nunu. A kijü puo cahou kechachie a khapie kebau nu tsu; sishierei no kheho nunu a kerheiro se parshüte, he-i Jihova a Kepenuopfü.

⁷ A mezie voketa ki, a Jihova rükralie; mu a kecha n ki vo, n kemesa rüsuoki nu vo.

⁸ Kemethuo miarhi rüsuoyakezhako, u thuo u kemiatho-u khawa.

⁹ Derei a ketshe pfhe se ruosuo chü n ki shütuo; a phrakeshüu chüshütuoü. Shüphrakeshü sü Jihova vie zo!”

¹⁰ Sitse Jihovae khuou ki pushü, ru süue Jona melou pie kijü keso nu shüwa.