Jona 1 - Angami Naga CL (Re-edited) Bible (BSI)

Jona Ukepenuopfü Ki nu Tatatuoü Kesie

¹ Siro Jihova die Amitai nuou Jona ki vor di sie,

² “Ninevi rüna kezhau nu mhai voliecie, sidi süu petsoukecü shieshülie, kekreilamonyü uko kerüzhü a mhodzünu khor bate.”

³ Derei Jonae Jihova mhodzü nunu ta rüshü Tarshish nu votatuo üsie. Sidi puo Jopa nu kelie tse rou puo Tarshish nu votuoü ketha ngulie; süla puo rou zha chüwa mu Jihova mhodzü nunu tatatuo üdi mia ze Tarshish nu voketuo la sügei pfülie.

⁴ Derei Jihovae khriedi ketsepie dzükezha mho shü, sidi dzükezha nu teirükrierükhrie pie kemerie chü rouu hetshawa thenyüsie zota.

⁵ Sitse rou kethumiako michieta, sidi u thuo u rhuou kie phreta. Siro rouu bie kemedzalieketuo la uko mhanyako kelhoupie dzükezha nu shüwa, sirei Jona we rouu nu lelie, sidi zetshüi zhüta.

⁶ Sitse rou nu kezhau puo ki vor di sie, “No kiüdi zetshüizhü zo ga? Sielie di n Kepenuopfü kieliecie! Siliro Ukepenuopfü u dze rükrashü di u bu kata molietuo nhie.”

⁷ Siro routhuko sie huoniehuo üse, “Vorlie, úko dape khe, sitse supuo la mha kesuo hau u gei vorte shi silietuo.” Süla uko dape sitse Jona zanu parta.

⁸ Sitse uko puo ki “Kiüdi mha kesuo hau u gei vorte shi hie ki pushücie. No mhatho kikecüpuo chüya ga? No kirapuo nu vorzhü ga? N seyie kikecüpuo ga? Siro no kiramia ga?”

⁹ Sitse puo sie, “A Ibrimia puo, A Jihova, teigei ketuo Ukepenuopfü dzükezha mu kijü keso chükeshüu rüsuoya.”

¹⁰ Sitse themiako michie kechüta, di sie puo ki, “No chüwaketa hau kedipuota ga?” Kekreilamonyü themiakoe puo pukeshü mhie di puoe Ukepenuopfü mhodzü nunu tatakezhü silieketa la.

¹¹ Sitse uko puo ki, “Dzükezhau bu hie gei menelieketuo la hieko bu n pie kedipuo chüwatuo ga?” Kekreilamonyü dzükezhau rüpfhü kemerie chü miemieketa la.

¹² Sitse puo uko ki, “A chü kelhoupie dzükezha nu shüwacie, sitse dzükezhau nieko la zeitatuo, tei rükrierükhriekecü hau a la nieko gei vortacü la.”

¹³ Sishierei themiako süu bu kijü keso nu vorlietuoü rou thu thethochü, derei uko chülie lhota, kekreilamonyü dzükezhau rüpfhü uko gei re miemieta.

¹⁴ Sitse uko Jihova ki shie di, “He-i Jihova, hie n ki chaya, hie ngumezhie di themia hau la hieko bu kaüjüta hiecie, siro kejo kejü thezieu pie hieko gei shü hiecie, kekreilamonyü no, he-i Jihova, n medo mhiei chüwate.”

¹⁵ Süla uko Jona chülie, sidi puo kelhoupie dzükezha nu shüwa ru dzükezha rüpfhüu la zeita.

¹⁶ Sitse themiako Jihova prei kechüta, tsiu uko ruosuo chüpie Jihova tsü, sidi uko die phrashü.

¹⁷ Derei Jihovae Jona mezulieketuo la khuokezha puo keseshü; mu Jonae teisozha se tsiu teizeizha se khuou vadi nu zhü.