Johan Seu 1 - Angami Naga CL (Re-edited) Bible (BSI)

Kelukeshü

¹ Phichüu kinu thupie a khrieu Gaya, a puo khrie kethoyakezhau tsükeshü.

Gaya Tshekeshü

² A khrieu, mha pete bu rei n la puotoulieketuo mu no ruopfü kitsa puotou tuoyacü tuoi n shürho sü a kecha zo.

³ U kezemia huo vor di a ki no ketho-u la dietho tuoyakezha pukeshü la a nei phi ba, no ketho-u medzi di tuoyakezha dze.

⁴ A nuonuokoe ketho-u medzi di lhou tuoyakezha dze sikelie ki mha a kenei kekrei puorei jü.

⁵ A khrieu, no u kezemiako mu chazoumia gei mhakehoupuo kechü nu rei dietho di chü keba dze si;

⁶ uko rei no mia khriekecü dze pie kehouu ki zhapu chüya. No Ukepenuopfü mhodzünu chü kezhüu chüshü di uko khruohipie ketseshü ro vituo;

⁷ kekreilamonyü uko Khrista la pelekemoko kekhruohi puorei se mo di uko rüve sedelieketa la.

⁸ Süla we themia sikecümia khruohishü zhü, sitse we ketho-u lietho kechüu nu kedzieselietuo.

Diotrifia mu Demetria

⁹ A mha huo thupie kehou tsüshüte, derei Diotrifia, krüta chü nyüyakezhau mhakipuorei hie die lie mvü.

¹⁰ Süla a vor üro süze puo hie cie hie rhakecü dieko pete kepu votuo. Sizomonyü puo u kezemia kehoutuoü kevorko rei peso mvü, mu süko pesotuoü kesieko rei kha, tsiu sicüko kehou nunu whuotaya.

¹¹ Kekhrieu, mha kesuo dorielie hiecie, derei mha kevi dorielielie. Kehoupuorei mha kevi chüyakezhamia Ukepenuopfü kinu zo; kehoupuorei mha kesuo chüyakezhamia Ukepenuopfü ngu mo.

¹² Mia pete rei Demetria pu peviya, mu ketho-u rei puo zhapuya. Hie rei süu ketho zo ücü zhapu chüya, mu no rei hie kepuu ketho zo ücü si ba.

Kelukeshü Thelau

¹³ A mha kekra n ki thushüketuo ba, derei a kethusei mu puo dzü rübei se thu nyü mo;

¹⁴ simonyü a n ze kese peziketuo merü ba, mu süzenu avu thuo mhotsou kerüchütuo.

¹⁵ Nouneu bu n ze baliecie. U kezeko rei n kelushü ho. U kezeko za kie zo di kelushücie.