Johan Kerieu 5 - Angami Naga CL (Re-edited) Bible (BSI)

Kijüu Mho Kuokelie

¹ Kehoupuorei Jisue Khrista ükecü peleyakezhau Ukepenuopfü nunu penuolieta zo mu kehoupuorei puo krü khrieyakezhau puo nuo rei khrieya.

² We Ukepenuopfü khrie mu puo diekhakeshüko zekelie haha geinu, we Ukepenuopfü nuonuoko khrieyakecü silieya.

³ Siro Ukepenuopfü khriekecü sü we puo diekhakeshüko chüüzekecüu zo. Mu puo diekhakeshüko re mo zo.

⁴ Kehoupuorei Ukepenuopfü geinu penuo parketau kijüu ki kuolieya. Mu kijüu ki kuokelie süusüe u kepeleu zo.

⁵ Siro Jisue Ukepenuopfü Nuou zo ükecü peleyakezhau sie kijüu ki kuolieyakezhamia suomia ga?

Jisu Khrista Dze Zhapu

⁶ Dzü mu thezie nunu kevor-u sü Jisu Khrista zo, dzü rübei nunu mo derei dzü mu thezie ze vor. Mu Ruopfüue zhapu chükeshüu, kekreilamonyü Ruopfüue ketho zo.

⁷ Siro zhapu chükeshü mha se ba:

⁸ Ruopfüu, dzüu mu thezieu, mu se hako keze puo zo.

⁹ We themia zhapu rei lieya ro, Ukepenuopfü zhapuu we süki zhakuo; kekreilamonyü Ukepenuopfüe puo Nuou dze zhapu kechü süusü puo zhapuu zocü la.

¹⁰ Kehoupuorei Ukepenuopfü Nuou pelekezhamia zhapu süu puo nou bata zo. Kehoupuorei Ukepenuopfü peleyakemomia Ukepenuopfü üse ketijüu chüwate; themia süu Ukepenuopfü puo Nuou dze zhapu chükeshüu pele motacü la.

¹¹ Mu hauha zhapuu zo: Ukepenuopfü kechachie kerhei khashü u tsü, mu kerhei hau puo Nuou nou tuo.

¹² Kehoupuorei Nuou ngulieketamia kerhei nyite; kehoupuorei Ukepenuopfü Nuou ngulie kemomia kerhei jü.

Kechachie Kerhei

¹³ A hako thukeshü nie Ukepenuopfü Nuou pelelieketa khe bu kechachie kerhei nie vieta ücü silieketuo la zo.

¹⁴ Siro puo mhodzünu u kethepfu batakecüu sü we puo medo nunu mhakehoupuorei cha ro, puo u pfhe rünyüyacüu zo.

¹⁵ Mu we puo ki chakeshü ki puo u pfhe rünyüyacü silieta ro, we puo ki chakeshüu ngulieta ücü siliete.

¹⁶ Miapuonie puo siezedzüriemia siata kesü kephouma zo kemo puo chükewa ngu ro, puo bu chacie, siliro Ukepenuopfüe siata kesü kephouma zo kemo chükewako la kerhei khapie puo tsütuo. Siata kesü kephouma rei nyi; puo bu chanukecü we süu la mo.

¹⁷ Mha puotou kemo kechü pete kephouma zo, derei siata kesü zo kemo kephouma rei nyi.

¹⁸ Ukepenuopfü nunu penuolieketako we kephouma chü zo bataya mo; derei Ukepenuopfü nunu penuolieketako rüguose bataya, sidi kesuou bu uko biewaya mo.

¹⁹ We Ukepenuopfü nuonuo ücü si bate, mu kijüu pete kerüzhüu kekuo khro ba zo.

²⁰ Ukepenuopfü Nuou vor di kesikele pie u tsü di u bu puoe ketho-u ücü silie; mu we Nuou Jisu Khristae ketho zocüu nou bate. Puoe ketho zokecüu Ukepenuopfü mu kechachie kerheiu zo.

²¹ Nhicuko, nieko terhuorhiko therhie zoliecie.