Johan Kerieu 4 - Angami Naga CL (Re-edited) Bible (BSI)

Ketho mu Ketho Kemo Ruopfü

¹ A khrieko, ruopfü kehoupuorei peleta hie, derei ruopfü süko Ukepenuopfü kinu vor mo mo shicü rie menuoliecie; ketijü siedzekesi kekra par kijüu gei tuotacü la.

² Nie hau geinu Ukepenuopfü Ruopfüuta ücü silietuo; ruopfü kehoupuorei Jisu Khrista üse chüüphou chüpfü vorkecü phrayakezha khe Ukepenuopfü kinu vor zo,

³ mu ruopfü kehoupuorei Jisu phraya kemo khe Ukepenuopfü kinu vor mo zo. Mu hauha Khrista ngukemvü ruopfüu zo, süu vor zotuoücü nieko puo dze siliete; mu süu tsie vor kijü bate.

⁴ A nuonuoko, nieko Ukepenuopfü kinu vor zo, mu süko penyüliete, kekreilamonyü nie nou baketaue kijü nu kebau ki zhakuocü la.

⁵ Sükoe kijü nunu vor; süla uko kepukoe kijü nu dzeko puya, mu kijüu rei uko pfhe rünyüya.

⁶ Úko we Ukepenuopfü kinu vor zo. Kehoupuorei Ukepenuopfü siyakezhako u die rünyüya, mu kehoupuorei Ukepenuopfü kinu vor moro u die rünyüya mo. Süla we hau geinu ketho ruopfü mu ketho kemo ruopfüu si kekreilieya.

Ukepenuopfüe Kekhrieu Zo

⁷ A khrieko, úko huoniehuo khrielie khe, kekreilamonyü kekhrie-e Ukepenuopfü kinu vor zo; siro mia khrieyakezha khe Ukepenuopfü geinu u penuolieta zo mu Ukepenuopfü siya.

⁸ Mia khrieyakemomia Ukepenuopfü siya mo; kekreilamonyü Ukepenuopfüe kekhrieu zocü la.

⁹ Hamhie di Ukepenuopfü kekhrieu thapie u kieshü: Ukepenuopfü puo Nuo pfuliu ketsepie kijü hanu keshüe u bu puo geinu kerhei ngulieketuo la zo.

¹⁰ Kekhrie süu hau, we Ukepenuopfü khrielieta monyü puo thuo u khriekelie geinu u kephoumako ruotho la puo Nuou ketseshü.

¹¹ A khrieko, Ukepenuopfüe u khriepie hathede chüshü üro, we rei huoniehuo khrielie zhü.

¹² Miapuorei Ukepenuopfü ngu chie mo; we huoniehuo khrieya ro, Ukepenuopfü u nou bate, mu puo kekhrieu u geinu tseilieya.

¹³ Hau geinu we puo nou baketa mu puo rei u nou baketa silieya, puoe puo Ruopfü khapie u tsüwaketa la.

¹⁴ Puoue puo Nuo ketsepie kijü Kelakelieu chükeshü nguwate mu hie süu pie mia ki rei zhapu chüya.

¹⁵ Kehoupuorei Jisu üse Ukepenuopfü Nuou zo üdi phrayakezhamia Ukepenuopfüe sümia nou baya, mu sümia rei Ukepenuopfü nou baya.

¹⁶ Siro hie thuo si mu pelekecü sü Ukepenuopfü kekhrieu u la zo. Ukepenuopfüe kekhrieu zo, mu kehoupuorei kekhrieu nu bayakezhamia Ukepenuopfü nou baya, mu Ukepenuopfü rei puo nou baya.

¹⁷ Kekhrieu bu u donunu tseilieyakezhae hamhie: U bu thepfu di mia ketsoketuo nhie thalieketuo la, sidi we kijü hanu ba zoluo shierei puo mhie di balieketuo la.

¹⁸ Kekhrie nu kemichie puorei baya mo, vi tseikecü kekhrie-e kemichie whuowaya; kemichie-e puo siazha ba, mu kehoupuorei michieyakezhamia kekhrieu nu tseilieya mo.

¹⁹ Puo u khrie riekeshü la we mia khrieya.

²⁰ Miapuonie, “A Ukepenuopfü khrieya” isi di puo siezedzürie ngumecüya ro, sümia kemedamia zo; kekreilamonyü puoe nguyakezha puo siezedzürie khrielie moliro, nguya kemo Ukepenuopfü khrielie kenjü.

²¹ Puoe u ki diekhakeshüu sü hau: Kehoupuorei Ukepenuopfü khrieyakezhamia puo siezedzürie khrielie morosuo.