Johan Kerieu 3 - Angami Naga CL (Re-edited) Bible (BSI)

¹ Harie, u Puou kide u khrie shi leshücie, u üse Ukepenuopfü nuonuo üdi kiete; mu we si kethota zo. Kijüu u si mokecü kekreilamonyü uko puo si mocü la zo.

² A khrieko, we tsie Ukepenuopfü nuonuota zo; sirei hasie kedipuo vortie shi se pesishü moluo, we si kebau sü hau: Puo mia mhingu chü kevor ki, we puo mhietatuo, puo kedipuo mhie tou shicü we süu ngu zotuocü la.

³ Mu kehoupuorei kemerü hau pie puo gei kebamia puo mesakecü tuoi u thuo u chü kemesalieya.

⁴ Kehoupuorei kephouma chükewamia thezho-u varhuokecü la jotaya; kephoumae thezho kevarhuou zocü la.

⁵ Puoe kephouma chü setatuoücü la mia mhingu chü vorcü nie si ba, mu puo gei kephouma puorei jü.

⁶ Kehoupuorei puo gei kebamia kephouma chü zo baya mo, kephouma chüyakezhamia mhakipuorei puo ngu mo morei puo si rei mo.

⁷ A nuonuoko, mia puo bu rei nie sewa hiecie. Kehoupuorei puotouu chüyakezhamia puoe miathokecü tuoi sümia rei miatho zo.

⁸ Kehoupuorei kephouma chüyakezhamia terhuokesuou nuonuo zo; kekreilamonyü terhuokesuou sietse nu kephouma chüketa la. Hau la Ukepenuopfü Nuou terhuokesuou mhathoko pekawatuo üdi mia mhingu chü vor zo.

⁹ Ukepenuopfü nunu penuolieketamia kephouma chü motaya, kekreilamonyü Ukepenuopfü tsiau puo gei batacü la. Ukoe kephouma chü salie kenjü, ukoe Ukepenuopfü geinu penuolieketa la.

¹⁰ Ukepenuopfü nuonuoko mu terhuokesuou nuonuoko hamhie di thashüya: kehoupuorei puotou chüyakemomia morei puo siezedzürie khrieyakemomia Ukepenuopfü kinu vor mo.

Huoniehuo Khrielienukecü

¹¹ Nieko sietse nu sikelie dieu sü u bu huoniehuo khrienukecüu zo.

¹² We Kain, kesuou kinu vor di puo siezeu Abel dukhrikewau mhieta suo. Mu kiüdi puo dukhriwa ga? Puo mhatho-u kekrü mu puo siezeu mhatho-u puotouketa la zo.

¹³ Siro a kezenuoko, kijüu nie ngumecü rei nie ngota hiecie.

¹⁴ We kesia cie kerhei nu praketa si ba, kekreilamonyü we huoniehuo khrieyacü la. Kehoupuorei mia khrieyakemomia kesia nu ba zo.

¹⁵ Kehoupuorei u siezedzürie ngumecüyakecü pete mia kedukhrimia zo, mu mia dukhriyakezhamia kechachie kerhei puo nou tuo mo zo.

¹⁶ Puoe u la puo phou khakeshü geinu we kekhrie-e kedipuo shicü silie, we rei huoniehuo la u phou khashü zhü zo.

¹⁷ Derei mia puoe kijüu kinyi ba di puo siezedzürie tsopfhü ngushü, sirei u vaphi mvüta ro, kikidi Ukepenuopfü kekhrieu puo nou balie vi ta?

¹⁸ A nuonuoko, u pfhe u die nunu zomonyü mhatho mu ketho-u nunu huoniehuo khrielie khe.

¹⁹ Haha la we ketho-u nu parkecü silietuo, sidi puo mhodzünu rei u nou khrukhre tuolietuo.

²⁰ Kehoukipuorei u noue u pejo üro, Ukepenuopfüe u nou ki rei zhakuo, mu puoe mha pete rei si baya.

²¹ A khrieko, u noue u pejo mo üro, we Ukepenuopfü mhodzünu u kethepfu nyite;

²² mu we puo ki mhakehoupuo cha rei ngulieya, we puo diekhakeshüko mu puo neiko chüüzeyacü la.

²³ Mu puo diekhakeshüu sü, puo Nuou Jisu Khrista za nunu pelelie mu puo diekhakeshü mhiei di huoniehuo khriekecüu zo.

²⁴ Kehoupuorei puo diekhakeshüko chüüzeya ro puo gei baya mu puo rei süko gei baya. Mu hau la puo khapie u tsükeshü Ruopfüu geinu puo u gei ba ücü silieya.