Johan Kerieu 2 - Angami Naga CL (Re-edited) Bible (BSI)

Khrista U Kekhruohiu

¹ A nuonuoko, nie bu phouma molieketuo la a hako thupie nieko ki shüya. Derei huomia phoumata üro, u la Puou ki zhapu chü kethamia puo ba, süu kemiatho-u Jisu Khrista zo;

² mu puoe u kephoumako la u ruo chükewau zo, tsiu u kephoumako la rübei monyü kijü pete kephouma la rei zo.

³ We puo silietakecü sikelie-e, we puo diekhakeshüko zeyakezha la zo;

⁴ Miapuonie, “A puo si,” idi pu, derei puo diekhakeshüko chüya moliro, süu ketijümia zo, mu sikecümia ketho-u puo nou ba mo;

⁵ derei kehoupuorei puo die zeyakezhau Kepenuopfü kekhrieu puo geinu chü tseishüya. Hau geinu we puo nou ba ücü si toulieya:

⁶ Kehoupuorei, “A puo gei ba” idi puya ro, puo mhie di tuolie zhü.

Diekhakeshü Kesau

⁷ A khrieko, a diekhakeshü kesa puorei thupie nieko ki shütuo üzhü mo, derei diekhakeshü keweu, nie sietsenu ngulieketau zo; diekhakeshü keweu sü nieko rünyülieketa dieu zo.

⁸ Sirei a diekhakeshü kesa puo thupie nie kishüzhie, süu puo gei mu nie gei rei ketho ücü si, kekreilamonyü kezeiu jütazhie mu kezie ketho-u zie bate.

⁹ Kehoupuorei sie, “A kezie nu tuoya” idi pu, sirei puo siezedzürie ngumecüya ro, tsie rei kezei nu ba zo.

¹⁰ Kehoupuorei puo siezedzürie khrieyakezhamia kezie nu lhou baya, mu themia sikecümia gei thephi kemesü tuo mo.

¹¹ Derei kehoupuorei kepelemia kekrei puo ngumecüya ro kezei nu tuo zo, mu kezeiu nu ketuo la kirapuo vozhü shi siya mo, kezeiu bu puo mhi chü peciewaketa la.

¹² A nuonuoko, puo za nunu nie kephoumako vawaketa la, a thupie nieko ki shüya,

¹³ Miapuonuoko, nieko sietsenu ketuou sikecü la, a thupie nieko ki shüya. Khriesako, nieko kesuou penyülieketa la, a thupie nieko ki shüya.

¹⁴ Nhicuko, nieko Puou sicü la, a thupie nieko kishüya. Miapuonuoko, nieko sietsenu ketuou sikecü la, a thupie nieko kishüya. Khriesako, nieko kuo, mu Ukepenuopfü dieu nieko gei baketa la, a thupie nieko kishüya, mu nieko mha kesuou mho kuoliete.

¹⁵ Kijüu morei kijü nu vieko khrie hiecie, kijüu khrieyakezhamia gei u Puou kekhrieu tuo mo;

¹⁶ kekreilamonyü kijüu nu ketuo pete, chüüphou menguko, u mhi menguko, kinyi se kemholiekecü pete, u Puou kinu monyü kijüu nunu zocü la,

¹⁷ kijüu mu süu menguko jütazhie, derei Ukepenuopfü medo chüyakezhamia kechachie lhou tuotatuo.

Khrista Ngumvü

¹⁸ A nuonuoko, thela teiu penuo bate! Siro Khrista ngumvü vortazhükecü nie silieketa tuoi tsie rei Khrista ngumvü kekra sier bate. Sü geinu thela teiu sü vor bata ükecü we silieya.

¹⁹ Süko u donunu tuo prate, derei süko u kromia mo zo; kekreilamonyü süko u kromia üro, uko u ze ba zotieciü. Derei uko u khawa di tuoketa geinu u kromia mo ücü si kemecie touta zo.

²⁰ Sirei Kemesau bu nie kenheliete, süla nieko pete ketho-u siliete.

²¹ Nie ketho-u si mo üdi a thupie nieko ki shü mo; derei nieko süu siyakezha la mu ketijü puorei ketho-u nunu parya mo ücü sicü la.

²² Ketijüu sü supuo ga? Süu Jisu üse Khrista mo üdi puyakezhau zo. Sikecümia sü Khrista ngumvüu zo, sümia Puou mu Nuou rei melieya.

²³ Kehoupuorei Nuou melieyakezhau Puou ba mo zo; mu kehoupuorei Nuou phrakezhau Puou rei phraya.

²⁴ Sietsenu silieketau pie nie nou baliecie. Nie sietsenu silieketau pie nie nou balieta ro, nie Puou mu Nuou nou rei balietuo.

²⁵ Siro kechachie kerhei hauha, puo thuo u ki phrapie kezhüu zo.

²⁶ A nieko ki nie sewaketuomia dze thushüya.

²⁷ Derei nieko la we, puo kinu nie kenhekelieu nie gei baya, süla mia bu nie petha morei vi. Derei puo nieko kenhelieketau thuo mha peteko dze pupie nie kieya, mu süu ketho zo, tsiu ketijü ba mo, süu thapie nieko kiekeshü kemhie puo gei baliecie.

²⁸ Mu tsie a nuonuoko, puo gei ba zolie, silie ro puo mia mhingu chü kevor nhie we kethepfu nyilietuo mu puo kevor nhie puo mhodzü mengatalie lho.

Ukepenuopfü Nuonuoko

²⁹ We puo miatho zo ücü si ba ro, nie kehoupuorei miathoyakezhamia puo nunu penuolie zo ücü si tou batuo.