Johan Kerieu 1 - Angami Naga CL (Re-edited) Bible (BSI)

Kerhei Dieu

¹ Hie nie ki sietsenu ketuo kerhei dieu, hie thuo sikecüu, hie mhipie ngu, hie thuo meho mu hie dzie pie bie zokecüu dze puya,

² kerhei hau ngulie kevi chüshü, hie rei ngu zo, süla hie süu dze zhapu chüya, mu kechachie kerhei u Puou ze ketuo, hie pesipengukeshüu dze pie nie ki puya.

³ Nie bu rei hie ze kekrotholieketuo la hie ngu mu sikelie dze pupie nie kieshü ho; mu hie zowe u Puou mu puo Nuou Jisu Khrista ze kekrotho tuo zo.

⁴ Siro úko keneiu bu tseilieketuo la hie nie ki hako thushüya.

Ukepenuopfüe Kezieu Zo

⁵ Hie puo kinu sikelie dielieu mu pu nie kieyakezhau hau, Ukepenuopfüe kezieu zo, mu kezei puorei puo nou tuo mo.

⁶ Siro we puo ze kekrothoya üdi kezei nu tuoya ro, we medate mu ketho-u chüüzeya mo;

⁷ derei puo kezie nu tuoyakezha tuoi we rei kezieu nu lhou tuoya ro, we huoniehuo ze kekrothoya mu Nuou Jisu zie thuo kephouma pete nunu u chü kemesalieya.

⁸ Mhanuü we phouma mo üdi puya ro, we u thuo u se tuoyakezha zo, mu ketho-u u nou ba mo.

⁹ We u kephoumako pu phrashü ro, puo zowe dietho mu miatho di u kephoumako vashütuoü tsiu miatho kemo kheko nunu u chü kemesalietuoü ba zo.

¹⁰ We phoumata mo ükecü puya liro, we puo üse ketijüu chüya, mu puo die rei u nou ba mo.