Johan Kenieu 1 - Angami Naga CL (Re-edited) Bible (BSI)

Kelukeshü

¹ Phichüu kinu thupie kedakeliepfü mu puo nuonuoko, ae ketho-u nunu khrieyakezhako ki shüya, mu a rübei zomonyü, ketho-u siyakezha pete rei nieko khrieya;

² kekreilamonyü ketho-u u nou baya mu kechachie u ze tuo zotuocü la.

³ Ukepenuopfü u Puou mu Puou Nuo, Jisu Khrista bu theja, ngukemezhie mu noune khapie u tsü di ketho tsiu kekhrie nunu u ze baliecie.

Ketho mu Kekhrie

⁴ N nuonuoko huomia ketho-u nunu u Puou u bu chülienukeshü mhiei tuoyakezha dze sikeshü ki kide a nei shi!

⁵ Siro tsie we, kekhrie thenupfü, a n ki chaya, a thupie n ki shüzhükecü hau diekhakeshü kesa puorei mo, derei we sietsenu ngulieketa u bu huoniehuo khrielienukecüu zo.

⁶ Siro kekhrie, puoca we puo diekhakeshüko nu tuokelie; sietse nu diekhakeshü silieketau sü hau zo, nie sünu tuoliecie.

⁷ Mia setuoyakezha kekra par kijüu nu tuote, süko Jisu Khrista üse chüüphou chüpfü di lhoukecü phraya mo; themia sikecümia sü miakesemia mu Khrista ngumvümia zo.

⁸ Tseiphrei balie, silie ro we mhatho chülieketako pejüwalie lho, derei süko la nie zhakhra ngu tseilietuo.

⁹ Kehoupuorei Khrista kepetha dieu nu balie mo di keyie votayakezhamia Ukepenuopfü vie mo; kehoupuorei kepetha dieu nu bayakezhamia Puou mu Nuou nyite.

¹⁰ Huomianie kepethadie hau se mo di nieko ki vorya ro, puo ze nie ki nu vo hie morei puo kelu rei hie,

¹¹ themia sikecümia keluyakezhamia puo mhatho kesuo kechüko ze puo chüta zo.

Thekhadie

¹² A mha kekra n ki thushüketuo ba zo ürei, a leshü mu kethudzü zomonyü a thuo n ki vor di mhotsou n ze kerüchükecü le ba, sidi u kenei bu tseilieketuo la.

¹³ Kedakelie n siezepfü nuonuoko n kelushü ho.