Johan 9 - Angami Naga CL (Re-edited) Bible (BSI)

Jisu mu Mhiciemia Puo

¹ Siro puo tuo vozhü tse puo mhicie di penuokelie puo ngulie.

² Sitse puoe pethakelieko puo ki, “Kepethau, themia hau puo mhicie zo di penuokelie, puo mo puo krü kephouma la ga?”

³ Jisu sie, “Puo kephouma morei puo krü kephouma la rei mo, sirei puo geinu Ukepenuopfü mhathoko pie pesipengushüketuo la hiketa zo.

⁴ Teiso keba ki úko a ketsekeshüu mhathoko chü morosuo; miapuorei mhachülie kenjütaketuo teizeizhau vorzhie.

⁵ A kijü nu keba chie a kijü kezieu zo.”

⁶ Puo hau pukeshü sie, puo mhitsiepie kijü shü, di mhitsie sapie nyoba chülie di nyoba se themia süu mhinie kenheshü,

⁷ sidi puo ki, “No vo di Siloam zieu nunu khrüwalie.” (Siloam ca Ketsekeshü). Süsie puo vo di khrüwa mu mha ngulie di la vorta.

⁸ Süla puo zanuoko mu kekreimia puo hadzü khruocü ba di kenguko sie, “Themia hau ba di khruocüyakecüu mo me?”

⁹ Huomia sie, “Puo süu zo,” si, kekreiko sie, “Puo mo, derei puo riecü puote ha!” Derei puo sie, “A süu zo,” ita.

¹⁰ Derei uko sie, “Siro no kikidi mha ngulieta ga?” sita.

¹¹ Puo sie, “Jisu ükecü themiau nyoba chülie di pie a mhinie nyhoshü di a ki, ‘No vo Siloam nu khrüwalie,’ siru a vo di khrüwa tse a mha ngu parte.”

¹² Sitse uko puo ki, “Süu kirapuo vota ga?” si. Puo sie, “A si mo,” sita.

Farisiko Shürhokelieu Dze Ketsokecü

¹³ Süla uko tsie mhodzü puo mhiciekecüu ze Farisiko ki vo.

¹⁴ Jisu nyoba chülie di puo mhi chü pevikeshü nhie sabat zha.

¹⁵ Süsie Farisiko puo kimhie di mha ngulie shicü dze ketso la. Puoe uko ki, “Puo nyoba pie a mhinie kenheshü. Süsie a vo khrüwa ru tsie we mhanguliete.”

¹⁶ Sitse Farisiko huo sie, “Themia hau Kepenuopfü kinu vor mo, puo sabat zho-u zeya kemo la,” si. Derei kekreiko sie, “Kimhie di kephoumamia puo zasi hakemhieko chülietuo dimu?” Sidi uko kediekreita.

¹⁷ Süla uko mhicieu ketso la di, “No puo üse supuo üya ga? Puo n mhi chü pevishüwate.” Puo sie, “Puo siedzekesimia puolie,” ita.

¹⁸ Sirei Judako themia süu tsie mhodzü puo mhicie di mha ngulieta ücü puo krünie kie zoshü di ketso kemo ki pele mota.

¹⁹ Sidi uko unie ketso di, “Hau nnie nuou puo mhicie di penuokelieu zo me? Siliro kimhie di puo mha ngulieta ga?”

²⁰ Puo krünie sie, “Hau hienie nuou zo, mu puoe puo mhicie di penuolie;

²¹ derei puo kimhie di tsie mhanguliete shi morei supuo puo mhi chü pevishü shi hie si mo. Puo ketsoliecie; puo rei phichüte, mu puo thuo süu dze pushütuo.”

²² Puo krünie hau puketae Judako keprei la zo, kekreilamonyü ukoe kehoupuorei Jisu üse Khrista üdi phrakecümia Sinagog nunu u whuowatuo üdi pepi se baketa la.

²³ Süla puo krünie sie, “Puo rei phichüte, puo ketsoliecie,” ikeshü zo.

²⁴ Süsie va kenieu va uko puo mhicie di penuokelieu kie lalie di sie puo ki, “Thetshe pie Ukepenuopfü tsüliecie! Puo kephoumamia puo zocü hie si ba.”

²⁵ Puo sie, “Puo kephoumamia mo mo shi a sü si mo. A mhapuo si ba, süusü a mhicie ru tsie we a mhanguliete.”

²⁶ Sitse uko puo ki, “Puo n gei kedipuo chüshü ga? Puo kimhie di n mhikecieu chü pevishü ga?”

²⁷ Puo sie, “A pushü zorei nieko rünyü mvüte. Nieko kiüdi süu rünyü la nyüya ga? Nieko rei sa puoe pethakeliemia chüta nyüya me?” sita.

²⁸ Süla uko puo kenga di sie, “No we themia süue pethakeliemia, derei hie we Mosae pethakeliemia.

²⁹ Ukepenuopfü Mosa ki mha pukeshü hie si ba, derei themia hau la we puo kirapuo nu vor shi hie si mo,” sita.

³⁰ Themiau la sie, “Mha süu, mha u ngo puote. Niekoe puo kirapuo nu vor shicü si mo, sirei puo a mhinie chü pevishü.

³¹ Ukepenuopfü kephoumamia pfhe rünyüya mo, derei kehoupuorei puo rüsuo mu puo medo-u chüyakezhamia pfhe rünyüyacü hie si ba.

³² Siro kijü chülie tsenu vor tsie ketso miapuorei puo mhicie di penuokeliemia mhi chü pevi lakeshü dze we si mo zoluo.

³³ Themia hau Ukepenuopfü kinu vor zo kemosie puo mha hakemhie chülie kenjü zo.”

³⁴ Sitse uko puo ki, “No kephouma nunu penuolie tou di hie pethatuo üya le?” Sidi uko puo whuowa.

Ruopfü Kitsa U Mhikecie

³⁵ Jisue uko puo whuowata ücü silie, mu puo ngulie tse puo ki, “No Themia Nuou pelete mo?”

³⁶ Themiau sie, “Kezhau, süu supuo ga? A bu puo pelelieketuo la a ki pucie.”

³⁷ Sitse Jisu puo ki, “No puo ngu reiwate, mu tsie n ze kerüchü kethau puo zo.”

³⁸ Sitse puo sie, “Niepuu, a pelete.” Sidi puo tsu puo rüsuota.

³⁹ Jisu sie, “A mia capi chütuoü kijü hanu vor, sidi nguya kemoko bu ngulietuoü mu nguyakezhako bu u mhicietaketuo la.”

⁴⁰ Puo khieki ketha Farisiko huo hau si di sie, “Hie mhi rei cie ücü pu tha mo nhie?”

⁴¹ Jisu uko ki, “Nie mhicie ro nie kephouma jütatieciü, derei nie ‘Hie nguya’ isiya, süla nie kephouma ba zoluo.”