Johan 3 - Angami Naga CL (Re-edited) Bible (BSI)

Jisu mu Nikodema

¹ Farisimia Nikodema ükecü puo tuo, puoe Judamia krüta chüya.

² Puo theva ze Jisu ki vor di puo ki, “Kepethau, no ha Ukepenuopfü kinu kevor kepethamia puo ükecü hie si ba; Ukepenuopfü u ze tuo kemosie miapuorei noe chükeshü zasi hako chülie kenjü zocü la.”

³ Jisu sie puo ki, “A n ki pu toushütuo, penuo kesa la kemosie miapuorei Ukepenuopfü kedi ngukelie jü.”

⁴ Nikodema sie puo ki, “Kimhiei di phichüketa ze mia puoe penuo lalietuo mu? Puo puo zuo va nu la le di penuolie vi me?”

⁵ Jisu sie, “A n ki pu toushütuo, dzü mu Ruopfü nunu penuo la kemosie miapuorei Ukepenuopfü kedi nu lekelie jü zo.

⁶ Chüüphou nunu penuokelie sü chüüphou zo, mu Ruopfü nunu penuokelie sü ruopfü zo.

⁷ A n ki ‘No penuo kesa la morosuo bei’ ikeshü la n ngo hiecie.

⁸ Tei rükhriese puo thuo puo neira voya; no süu pfhe siya, derei no süu kirapuo nu vor shi morei kirapuo votaya shicü siya mo. Süla kehoupuorei Ruopfü nunu kepenuo rei sümhie zo.”

⁹ Nikodema sie puo ki, “Kimhiei di silietuo mu?”

¹⁰ Jisu sie puo ki, “No Israelmia kepetha puo chü tuo di mha hako si mo le?

¹¹ “A n ki pu toushütuo, hie si kebau puya mu hie kenguu dze zhapu chüya; sirei nieko miapuorei hie zhapuu lielieya mo.

¹² A kijüu dzeko kepu thuo rei nie pele moliro, kimhie di a teigei dzeko pu ro pelelietuo ga?

¹³ Themia Nuou, teigei nu keker-u zo kemosie miapuorei teigei sie chie mo.

¹⁴ Thiedzü Mosae rayha nunu tinyhü pie kesie tuoi, Themia Nuou rei mia bu puo piesie morosuo,

¹⁵ süu geinu puo pelekelie kehoupuorei kechachie kerhei ngulieketuo la.

¹⁶ “Siro Ukepenuopfü kijüu khriethor zo di puo Nuo pfuliu khashü zo, kekreilamonyü themia kehoupuorei puo pelekelieu kaüjüta mo di kechachie kerhei ngulieketuo la.

¹⁷ “Siro kijüu bu jotatuo üdi Ukepenuopfü puo Nuo ketsepie kijü nu shü monyü, kijüu bu puo la kelakelie ngulieketuo la zo.

¹⁸ Puo pelekeliemia pejolie lho; derei pelekemomia tsie rei pejopie bata zo, ue Ukepenuopfü Nuo pfuliu za nunu pelelie moketa la.

¹⁹ Siro kepejo die süu, kezieu kijü nu vor, derei themiako kezieu ki rei kezeiu khriekuota, uko mhatho mezhü moketa la.

²⁰ Kehoupuorei mha kesuo chüyakezhamia kezieu ngumecüya, ue u mhatho kesuo kechüu thashü mia kie moketuo la.

²¹ Derei ketho chüyakezha kehoupuorei u mhathoko Ukepenuopfü la chülie zo ücü pie pekieshüketuo la kezieu ki vorya.”

Johan Jisu Zhapu Kechü

²² Süsie Jisu mu puoe pethakelieko tuose Judia kijü nu vor mu puoe uko ze sünu ba di mia dzülu khashü.

²³ Johan rei Salim kepenuoki Ainon nu dzü ba phikecü la dzülu khashü mia tsü ba; mu themiako puo ki vor di dzülupfülieya.

²⁴ Süki Johan tepie kedie chüwa moluo.

²⁵ Siro Johan-e pethakeliekoe Judamia puo ze u chü kemesakecü dze kepu tha.

²⁶ Süla uko Johan ki vor di puo ki, “Kepethau, mia puo Jordan rü khie niathutsa nu n ze ketuou, no puo zhapukechüu, harie, süu mia dzülu khashü tuote mu themia pete puo ki votazhie.”

²⁷ Sitse Johan sie, “Teigei nu khashü puo tsü kemosie miapuorei mhapuorei ngulie kenjü.

²⁸ ‘A Khristau mo, derei puo mhodzü a ketsekeshü zo,’ isi di a hadzü pukeshü nieko thuo zorei a zhapu ba zo.

²⁹ Yasapfü sü Yasau vie zo. Yasau zeu tha di puo pfhe rünyü di puo pfhe sikeshü la puo nei phi thaya. Süla a kenei süu tseiliete.

³⁰ Puo zha miemieta morosuo derei a we cü miemieta morosuo.”

Teigei nu Kevor-u

³¹ Peso geinu kevor-u peteko mho zo, kijü nunu kepar-u kijüu vie zo, mu kijüu die puya, teigei nu kevor-u peteko mho-u zo.

³² Puoe puo kesikenguko puya, derei miapuorei puo zhapu die lielie mo.

³³ Sirei kehoupuorei puo zhapu die liekelieu Ukepenuopfü ketho pu zo ükecü zasi vüpfülietaya.

³⁴ Ukepenuopfüe ketsekeshüu Ukepenuopfü die puya, puoe mejü mo zo di Ruopfüu khashüyakecü la.

³⁵ Puoue Nuou khrieya mu mha pete khapie puo tsüwate.

³⁶ Kehoupuorei Nuou pelekelieu kechachie kerhei bate, kehoupuorei Nuou die ze kemo-u kerhei ngu lho, derei Kepenuopfü noupfhüu puo gei bataya.