Johan 21 - Angami Naga CL (Re-edited) Bible (BSI)

Jisue Pethakelie Thenie Pengukeshü

¹ Mha hako sie Jisue Tiberia Dzükezhau khieki nu puo khapie pethakelieko pengu lashü; mu puo uko pengukeshü hamhie.

² Süki Simon Pitor, Thoma nuobi ükezhau, Galil Kanamia Nathaniel, Zebedi nuonie mu Jisue pethakelie kekrei kenie rei sa keze tuo.

³ Simon Pitor sie uko ki, “A tsu khuotetuo.” Sitse uko puo ki, “Hie rei n ze tsutuo,” sita. Uko tuo vo di rou puo nu pfülie, derei uko süzhü mhapuorei telie mo.

⁴ Süsieduü teiso pi par tse, Jisue dzükezha khieki keso nu tha di ngulie, derei pethakelieko süu üse Jisu ücü silie mo.

⁵ Sitse Jisu uko ki, “A nuonuoko, nieko khuo puorei telie mo me?” Uko sie puo ki, “Molie.”

⁶ Sitse puo sie uko ki, “Nieko jal kelhoupie rou tsei thezatsa shücie, sitse nieko khuo huo ngulietuo ho,” sishü. Süla uko jal kelhoupie sütsashü ru uko süu teshülie lhota, khuo krathorketa la.

⁷ Süki Jisue puo khrie kevor pethakelieu sie Pitor ki, “Puo Niepuu ta zo,” sishü, Pitor süu Niepuu ükecü silie tse puo methuo tuokecü la puo boulie selie di prou dzükezha nu leta.

⁸ Derei pethakelie kekreiko rou kecü nu lelie di khuo tshu pfüketuo jal merhashüse dzükezha khie vota, uko keso nu vorketuo thu krie kenie zie ba moketa la.

⁹ Sidi uko keso nu parlie tse, mizhü pie mi kechü siro sügei khuo mu niekhrüda kezhü ngulie.

¹⁰ Jisu uko ki, “Nieko tsie nu tekelie khuoko huo se vorcie.”

¹¹ Süla Simon Pitor vo khuo kezhazha krie di hiepengouese ketuo jal-u merhashü keso nu parlie, mu khuo süthede tuo rei jal-u rürhata mo.

¹² Jisu uko ki, “Vor di mhacüliecie,” sishü. Süki pethakelieko miapuorei puo üse “No supuo ga?” icü ketso nreita, kekreilamonyü uko puo Niepuu zo ükecü silieketa la.

¹³ Sidi Jisu vor niekhrüda chülie di pie uko tsüshü mu sümhie khuo rei pie uko tsüshü.

¹⁴ Hauha Jisue kesia nunu rheikelie sie pethakelieko pengukeshü va seu.

Jisu mu Pitor

¹⁵ Uko mhacükelie sie, Jisu sie Pitor ki, “Johan nuou Simon, no hako ki a khriekuoya mo?” Puo sie puo ki, “N zo, Niepuu no a n khrieya ücü si ba.” Jisu sie puo ki, “A kuonuoko vachüliecie,” sita.

¹⁶ Siro va kenieu va rei puo la sie puo ki, “Johan nuou Simon, no a khrieya mo?” Puo sie puo ki, “N zo, Niepuu no a n khrieyakecü si ba.” Jisu sie puo ki “A kuokoyo pfheliecie,” si.

¹⁷ Puo va seu puo ki, “Johan nuou Simon no a khrieya mo?” Pitor Jisu va se puo ki, “No a khrieya mo?” iketa la puo nousuota. Jisu sie puo ki, “A kuoko vachüliecie.

¹⁸ A n ki pu toushütuo, no n khriesaki n thuo n chie phapfü di no vo kenyüra vo ze. Derei no tsata tse n dzienie yhashü di mia bu n chie phashü di n ze no vo nyü kemora rei votuo.”

¹⁹ (Puo hau pukeshü puo kedipuo se chü di Ukepenuopfü za chü kemeyietie shicü thakeshü zo.) Süsie puo sie puo ki, “A siemedziliecie,” sishü.

Jisu mu Pethakelie Kekreiu

²⁰ Pitor reipra ru Jisue puo khrie kevor pethakelie kekreiu uko mhacü keba ki Jisu khieki mizhü vakhriepfü di, “Niepuu supuo n teshütuo üya ga?” ikeshüu puo medzi vorkezhü ngulie.

²¹ Pitor puo ngukeshü ki, Jisu üse, “Niepuu, siro themia hau bu kedipuo chü ta?”

²² Sitse Jisu sie puo ki, “A la vor kemochie puo bu ba zoketuo a medo liro, süu n la kedipuo mu? No a siemedzi zolie!”

²³ Süla pethakelieu siatalie lho ükeshü süu themia donu diekrie pu vota. Sirei Jisu puo üse siatalie lho zo üdi pu mo, derei, “A la vor kemochie puo bu ba zoketuo a medo liro, süu n la kedipuo mu?” ikeshü zo.

²⁴ Pethakelie hau mha hako dze pushü, mu süko rei sa thukeshüu, mu hie puo zhapuu ketho zo ükecü si touta zo.

²⁵ Sizomonyü Jisu mha kekrei kekra rei sa chüshü; mu süko puopuo di thutuo üro a lekecü leshüdako la kijü hanu puo chü jütatuo.