Johan 2 - Angami Naga CL (Re-edited) Bible (BSI)

Kana nu Nuyieu

¹ Zha se nhie Galil Kana rünau nu nuyie puo chü, mu Jisu-nuo zuo sünu ba.

² Siro nuyie sünu Jisu mu puoe pethakelieko rei sa kie.

³ Süki khubezu tsatazhü tse, Jisu-nuo zuoe sie puo ki, “Uko khubezu jüte.”

⁴ Sitse Jisu sie, “Thenupfü, no a bu kedipuo chü morosuo shicü pu morei vi. Tsie rei a teiu vor moluo.”

⁵ Sitse puo zuoe chalieko ki, “Puo nieko ki mhakehoupuo pu rei chüliecie,” ishü.

⁶ Süki Judako u chü kemesaketuo zho-u la, ketsie liki sorou ba, puo nu dzü lipfhü mepfü moro ser balie vi.

⁷ Jisu uko ki, “Dzü pie likiko tshuliecie.” Sitse uko dzü pie süko tshu kho puo nyie tso phrelie.

⁸ Siro puo sie uko ki, “Tsie dzü huo thoulie di pie vo mha mezakeba krütau ki shücie.” Mu uko rei pie puo ki vo.

⁹ Süki krütaue dzü khubezu chü parketau metha, derei puo khubezu kirapuo nu se vor shicü si mo, (sirei dzü thoukeshü chalieko süu si ba), süla puoe yasau kieshü,

¹⁰ di puo ki, “Kehoupuorei therieki khubezu kevi khashü di mia krie u kelhuo chülie tse, krie kesuo khashütaya, derei no we tsie rei khubezu kevi khashü ba ze ha!”

¹¹ Jisu Galil Kana nunu zasi kerie hau chüshü di puo zayie pie pekieshü; mu puoe pethakelieko rei puo pelelie.

¹² Hau sie puoe puo zuo, puo siezeko, mu puoe pethakelieko ze di vo zha huoyo Kapernaum nu bata.

Jisu Rüsuoki Chü Kemesakecü

¹³ Judako Ciekevo teiu penuota, süla Jisu Jerusalem nu kho.

¹⁴ Sidi puo rüsuoki nu mia mithu, tekuo, paruonuo ze mu priesako keliyakezhako ba di ngulie.

¹⁵ Süla puo mhakevüro chülie di rüsuokiu nunu tekuo mu mithuko pete whuopie chazou shüwa. Süsie priesa keli kebako priesa pete bie kezakeziwa mu mizhüko phou pelawa.

¹⁶ Siro puo paruonuo ze kebako ki, “Mha hako chüsetalie! A puo ki üse lhithoki chü hie!”

¹⁷ Süki puoe pethakeliekoe “N kiu la a shürhei thuo a cü pejüwatuo” idi thupie kezhü dieu rükralie.

¹⁸ Sitse Judako puo ki vor di sie, “No hakemhie chükezha kedipuo zasi se hie pekieshülie vi ga?”

¹⁹ Jisu uko die kela di sie uko ki, “Rüsuoki hau bierhuowalie, sitse a zha se nu süu chü lalietuo.”

²⁰ Siru Judako sie, “Rüsuoki hau teicie hiediaesorou se chü, mu no zha se nu süu piesie lalietuo le?”

²¹ Derei puoe puo mo rüsuokiu dze kepu zo.

²² Süla puo kesia nunu rheikelie sie puo hau dze pushü zo ükecü puoe pethakeliekoe rükralie di uko kethodieu mu Jisu pukeshü dieu pelelie.

Jisu Themia Pete Rülikesiu

²³ Süsie puo Ciekevonyiu nu Jerusalem nu keba ki zasi chükeshüko ngu di mia kekra puo za nunu pelelie.

²⁴ Derei Jisu puo thuo zowe uko le pevi mo, puoe themia pete rüli sikecü la.

²⁵ Siro mia puo bu rei u rüli pie puo ki pu mo rei puo mia nou kedipuo ba shi si phreya.