Johan 19 - Angami Naga CL (Re-edited) Bible (BSI)

¹ Süsie Pilat Jisu ze vo di puo vüwa.

² Tsiu rüpfhünuokoe zohu kechielie di tsüre puo chüpie puo tsü gei shü, süsie uko pfhenei meriemegekecü puo pie puo bu selie;

³ sidi uko puo ki phirür di sie, “Harie, Judako kediu!” Sidi uko dziezhü shüpie puo vü.

⁴ Siro Pilat la par di uko ki, “Harie, a puo kejo puorei ngulie kemo nieko bu silieketuo la a puo ze nieko ki partuoüzhie ho.”

⁵ Sidi Jisu, bu zohu tsüre pfü mu pfhenei meriemegekecüu se di tuo par. Sitse Pilat uko ki, “Themiau sü harie!”

⁶ Siro zievokezhako mu thenako puo ngushü tse, shiekhoui di, “Puo gouwacie! Puo gouwacie!” sita. Pilat uko ki, “Nieko thuo puo ze vo di puo gouwalie, a we puo pejolieketuo ca puorei ngulie mo ho.”

⁷ Judako puo ki, “Hie thezho puo ba, mu thezho süu medzi liro puo sia zhüte, kekreilamonyü puoe puo thuo puoü Ukepenuopfü Nuou üdi pute.”

⁸ Pilat hau sikelie ki, puo michie mieita.

⁹ Sidi puo kediki nu la le Jisu ketso di, “No kirapuo nu vor ga?” si. Derei Jisu puo ki mhapuorei pu la mota.

¹⁰ Süla Pilat puo ki, “No a rüchü lho me? A n khashüwalie kevi mu n gouwalie kevi kekuo bakecü si mo me?”

¹¹ Jisu puo ki, “Peso geinu kha n tsü kemo we no a gei kekuo puorei balie lheciü, süla a tepie n dzie nu keshüu kephouma rekuo.”

¹² Sitse sü yawinu Pilat puo khashüwaketuo pfhü sie, derei Judako shie di, “No themia hau khashükewa sie, no Kaisar khriethomia mote! Kehoupuorei puo thuo puo üse kedimia üyakezhau sü Kaisar kepetsoumia zo!” sita.

¹³ Pilat die hako silie tse, Jisu ze parlie, di puoe dienya kecüyakezha Ketsie Badze morei Ibri die nu Gabatha üyakezha gei thebau nu balie.

¹⁴ Sünhie Ciekevonyi la Mha kesekecü teisozha; mu süki khinhieluota. Puo sie Judako ki, “Harie nieko kediu sü!”

¹⁵ Sitse uko shiekhoui di sie, “Puo bu ba hie! Puo bu ba hie! Puo gouwalie.” Sitse Pilat sie uko ki, “A bu nieko kediu gouwatuo me?” Sitse zievokezhako sie, “Kaisar sie hie kedi kekrei jü,” sita.

¹⁶ Süla Puo uko bu Jisu gouwaketuo la puo khapie uko tsüwa. Süsie uko Jisu ze tuota.

Jisu pie Krus geinu Goukewa

¹⁷ Sidi puo bu puo krus pie di thechü puo puo za Tsütsoru, Ibri die nu Golgatha ükecü nu vota.

¹⁸ Sükinu uko puo gouwa, Jisu bu metsuo mu puo khie lutsahatsa mia kenie sa puo ze gou.

¹⁹ Pilat-e mhapuo thu sapie krus gei shü. Süu “Nazaretmia Jisu, Judako Kediu,” si.

²⁰ Judamia kekra rei thukeshü hau phrü, kekreilamonyü Jisu goukecü chüu nadiu kepenuokicü la; mu süu Ibri, Latin, mu Grik nu rei thu.

²¹ Sitse Judamia zievokezhako Pilat ki, “Judako kediu idi thu hiecie, ‘Themia hau puo thuo a Judako Kediu iya.’ ”

²² Pilat sie, “A thuwaketau thuwate,” sita.

²³ Siro rüpfhünuoko Jisu goukewa sie, puo pfhenei pielie mu süko kezapie za dia chülie di uko mia puo za puopuo lielieta. Uko puo pfhenei rei rhuolie; puo boulieu puo terhü sa mo di puo tsü nu do tsu puo phi tso.

²⁴ Süla uko kerüchü di sie, “Úko hau, rhawa hieü, supuo zanu partuo shiü pie dape khe,” silie. Hau chüketa kethodie nu “Uko thuo uko donu a pfheneiko kezalie, mu a boulieu dapeliete,” ipie kezhü dieu bu tseilieketuo la zo.

²⁵ Chüpahiko mha süko chü. Siro puo zuo, puo zuo siezepfü, Klopa kimia Maria mu Maria Magdalapfü rei krus khieki tha.

²⁶ Siro Jisue puo zuo mu puoe khrie kevor pethakelieu rei süki ketha ngu di sie puo zuo ki, “Thenupfü, n nuou sü cüge.”

²⁷ Süsie puo pethakelieu ki rei, “N zuo sü cüge.” Sü yawinu pethakelie süu süpfü bu puo kinu bataketuo la puo ze vota.

Jisu Se

²⁸ Mha hako sie Jisue mha peteko chü tseilieketa silie di (Kethodieu bu tseilieketuo la), puoe sie, “A terhüte,” sishü.

²⁹ Süki mhabou puo nu khubedzü kekhro pie tshukecü puo ba; süla uko sponj pie sünu selie di hisop sei geinu pie puo me nu khashü.

³⁰ Siro Jisu kekhrodzüu krielie tse sie “Tseite,” sishü. Süsie puo tsünge tsu di puo ruopfü khashüwa.

Rüngou pie Jisu Zekecü

³¹ Siro sünhie Mhakesekecü zha, süla Judako sabat nhie themo-u bu krus gei zha nyü mota, sabat-e teisozha kemesa puocü la. Süla uko Pilat ki uko bu goupiekezhako phi dutshewa di themoko lhouwaketuo chalie.

³² Süla rüpfhünuoko vor di Jisu sa goupiekezhanie therieu mu kekreiu phi dutshewa.

³³ Derei uko Jisu khieki phir tse puo siaketa ngulie, süla uko puo phi dutshe mota.

³⁴ Derei rüpfhünuoko mia puo puo ngou pie Jisu tie zeshü, sitse thezie mu dzü kru mha parta.

³⁵ (Nie bu pelelieketuo la mha süu chüketa kenguu thuo hau zhapu chüshü. Puo zhapu süu ketho zo, mu puo ketho-u pu ücü si ba.)

³⁶ Mha hako chüketa kethodie nu, “Puo ruko puo rei bietshewalie lho,” ipieketuo dieu bu tseilieketuo la zo.

³⁷ Süsie rei kethodie nu die kekrei puo, “Uko thuo rüngou pie zewaketau meho zotuo,” sipie zhü.

Jisu Khrukewa

³⁸ Mha hako sie, Josef Arimathiamia puo Pilat ki vor di Jisu mo-u chata, puo Jisue pethakeliemia puo, derei puo Judako keprei la pekhre tuoya. Pilat puo bu pielie kevi chüshü, süla puo vor di puo mo-u pielie.

³⁹ Nikodema, tsie mhodzü theva zenu vo Jisu ze kesekecüu rei mür mu aloes kesa sher hiepengou mese pie vor.

⁴⁰ Unie Jisu mo pielie di Judamia kesia kekhruzho-u medzi di kethengupfü sa di linen pfhe pie themo-u kezülie.

⁴¹ Jisu goukewa chü süki tezie puo ba, mu tezie sünu miapuorei khru mo zoluokecü mekhru kesa puo zhü.

⁴² Sünhie Judako Mhakesekecü teisozha, mu mekhruu süki ba zocü la unie Jisu pie sünunu khruwa.