Johan 18 - Angami Naga CL (Re-edited) Bible (BSI)

Jisu Tekelie

¹ Jisu die hako pukeshü sie, puoe pethakelieko ze di Kidron rü lutsakhie tezie puo kebau nu vota, sidi puo mu puo siedziko rei sünu le.

² Siro Judas, puo tekeshüu rei thechü süu si ba, kekreilamonyü tsiemelie Jisu puoe pethakelieko ze thechü sünu voyacü la.

³ Süla Judas-e zievokezhako mu Farisikoe ketsekeshü rüpfhünuo mu thenamia, u rünyie kesepfü, mibou mu mitu pie ketuo kro puo ze sünu vorta.

⁴ Jisue puo gei kedipuo chü vortuo shicü pete si ba, süla puo tuo pra di uko ki, “Nieko supuo pfhüya ga?”

⁵ Uko sie, “Nazaretmia Jisu zo.” Jisu sie, “A süu zo,” sishü. Judas, puo sekewau rei uko ze süki tha.

⁶ Jisu uko ki, “A süu zo,” ishü tse uko tsiesieta mu mela tsu kijü zhüta.

⁷ Siro Jisu la sie uko ki, “Nieko supuo pfhüya ga?” Sitse uko sie, “Nazaretmia Jisu zo,” si.

⁸ Jisu uko ki “A nieko ki, a süu zo icü pushü ze, mu nieko a pfhü tuo ro, themia hako bu tuotacie.”

⁹ Hau pukeshü “Noe khapie a tsükeshüko a miapuorei pejüwa mo zo,” ikecüu bu tseilieketuo la zo.

¹⁰ Süki Simon Pitor-e zhiecha puo pfü tuo, puo süu zoupie zievokezhatho-u thekeu du di puo nyieto puo zatsa metakreiwa. Kituo süu za Malka.

¹¹ Sitse Jisu sie Pitor ki, “N zhiechau pie puokou nu shüwalie. Puou khapie a ketsü hieu a krie lho üme?”

Jisu Ze Ana ki Kevo

¹² Süki rüpfhünuoko mu uko mhokezhau, tsiu Judamia thenakoe Jisu telie di puo phalie.

¹³ Sidi ukoe puo ze Ana ki vo rie, puoe sücie zievokezhatho-u chü keba Kaifa-nuo meiu.

¹⁴ Kaifae Judako ki themia pete bu siaketau ki mia puo bu themia pete la siaketau we vikuotuo üdi tarhokeshüu zo.

Pitor Jisu Phra Mvüketa

¹⁵ Simon Pitor mu pethakelie kekrei puo Jisu medzi vozhü. Pethakelie kekrei süu zievokezhatho-u ze kesi pevikecümia puo, süla puoe Jisu ze zievokezhatho-u kitiezha nu leta,

¹⁶ derei Pitor-e chazou careu khieki tha. Süla zievokezhatho-u ze kesikecü pethakelie kekreiu par care kepfhepfü rüchüwa di Pitor ze lerta.

¹⁷ Süki care kepfhepfü sie Pitor ki, “No rei themia haue pethakeliemia puo zo die?” Sitse puo sie, “A mo zo,” sita.

¹⁸ Süki kituoko mu thenako rei mekukecü la thezhü mi chülie di süu peguo tha; ru Pitor rei uko ze mi peguo tha.

Zievokezhatho-u Jisu Ketsokecü

¹⁹ Süki zievokezhatho-u Jisu ki puoe pethakelieko dze mu puo mia kepetha dze ketsota.

²⁰ Jisu sie, “A mhotsou kijüu ki mha pu; a Judamia pete vor kenguyakezha sinagog nu mu rüsuokiu nu mia petha rei vor. A mhapuorei pekhre di pu mo.

²¹ Siüro kidi no a ketsoya ga? A die kesiko ki ketsocie; uko a kedipuo pu shi si ba.”

²² Puo die hako pushü tse, süki ketha thenamia puo dziezhü shüpie puo vü di sie, “No zievokezhatho-u ki die hakemhie putuo le?”

²³ Jisu sie, “A mha pu kekrüwa ro, kekrüüketa zhapu khashücie. Derei a pukeshüu puotou liro no kiüdi a vüya ga?”

²⁴ Sitse Anae puo bu puo phapfü zo di ketsepie zievokezhatho-u Kaifa ki shüwata.

Pitor Jisu Phra Mvü Laketa

²⁵ Süki Pitor mi peguo tha zoluo. Sitse uko puo ki, “No rei puoe pethakelieko mia puo zo mo nyü?” Puo mo üdi sie, “A mo zo,” si lata.

²⁶ Zievokezhatho-u kituoko mia puo, Pitor-e puo nyieto metakewaunuo kinumia puo, süki tha di sie, “No tezieu nu puo ze ketuo ki a n ngu mo üme?”

²⁷ Pitor moü lata, sishü tse thevü khouta.

Jisu Ze Pilat Mhodzünu Kevo

²⁸ Süsie uko Kaifa kinu Jisu ze Pilat kediki nu vota. Süki khiserünata. Tsiu ukoe kediki nu le mo, kekreilamonyü ukoe u perhuwa mo di Ciekevonyiu cüketuo la.

²⁹ Süla Pilat uko ki par di sie, “Nieko kedipuo se themia hau pejoya ga?” ita.

³⁰ Uko sie, “Themia hau themia kesuo puo zo moliro hie puo ze n ki vorlie lho.”

³¹ Pilat uko ki, “Siro nieko thuo puo ze vo nie zho-u nunu puo dienya kecüliecie.” Sitse uko sie, “Hie bu kesia siazha pie mia tsülie kevi kekuo pie hie tsü mo.”

³² (Mha hau chüketa Jisue puo kedipuo se chü di siatuo shi di pukeshüu bu tseilieketuo la zo.)

³³ Sitse Pilat la kediki nu leta, di Jisu kielie di sie, “No Judako kediu me?” si.

³⁴ Jisu sie, “No ketsokecü hau n thuo n geinu par mo, kekreimia huo n ki a dze pukeshü puo ga?”

³⁵ Pilat sie puo ki, “No a üse Judamia üya me? N themiako mu zievokezhako thuo n tepie a dzie nu keshü zo. No kedipuo chüwata ga?”

³⁶ Jisu sie, “A kedi-e kijü hau nu mo. A kedi-e kijü hau nu liro mia bu a tepie Judamia dzie nu shü molieketuo la a siedziko mia ze keperhielie zotieciü. Derei a kedi-e kijü hau nu mo zo.”

³⁷ Sitse Pilat sie, “Siro no kedimia me?” Jisu sie puo ki, “No a üse kedimia üdi pu. Hau la a penuo vor, mu hau la a kijü nu vor, ketho-u zhapu chüshüketuo la. Ketho-u kitsatie ketha kheko a die rünyüya.”

³⁸ Sitse Pilat sie puo ki, “Ketho-u sü kedipuo ga?” Puo mha hau pukewa sie, puo Judako ki la par di uko ki, “A zowe puo kejo puorei ngulie mo.

Jisu Gouwanu di Die Khakeshü

³⁹ Derei nieko zho nu a bu Ciekevonyi teiki kediemia puo khashüketuo ba, süla a bu nieko la Judako kediu khashüwa nyüya me?”

⁴⁰ Sitse uko melie u rhiechü di sie, “Themia hau monyü Barabas khashüwalie,” sita. Barabas-e miaviesekecümia puo.