Johan 17 - Angami Naga CL (Re-edited) Bible (BSI)

Jisue Pethakelieko la Chakecü

¹ Jisu die hako pukeshü sie, puo tosie teigei meho di sie, “Apuo, puoteiu vorte; Nuou bu n chüpie zayie chüshülieketuo la no Nuou pie zayie chüshücie,

² No themia pete mho kekuo pie puo tsüwa di puo bu kechachie kerhei pie süko tsülieketuo chüshüwaketa la.

³ Siro uko bu ketho Kepenuopfüe puo rübei zokecü mu noe puo ketsekeshü Jisu Khrista sikelie süusü kechachie kerhei zo.

⁴ No a bu chünukeshü mhatho-u chü tseiwa di a kijü nu n za chü kemeyieshüwata zo.

⁵ Süla Apuo, kijüu chükelie mhodzü a n ze zayie chü kevor tuoi tsie a bu n ze zayie chüliecie.

⁶ “No kijü hau nunu themia khapie a ketsüko ki a n zau pie pesipengushüwate. Süko n vie ze, mu no süko khapie a tsüshü, tsiu ukoe n die ze vor zo.

⁷ Uko tsie we no mha khapie a ketsü peteko n kinu vor zo ükecü siliete;

⁸ kekreilamonyü no se a tsükeshü dieko a pie uko tsüshüwate, mu uko süko zelie, sidi ukoe a n kinu vor kethota zo ükecü siliete; mu uko noe a ketseshü zo ücü pelete.

⁹ A uko sou nu chaya; a kijüu sou nu chaya mo, derei no pie a ketsüko sou nu chaya, kekreilamonyü ukoe n vie.

¹⁰ A vie pete n vie, mu n vie pete sü a vie zo; mu a uko geinu zayie chü bata zo.

¹¹ Tsiu tsie a kijü nu ba salie lhote, derei uko kijü nu ba zotuo, mu a n ki vortazhie. Kemesa Puou, no khapie a tsükeshüko, süko bu avu tuoi puo chülieketuo la no n za nunu süko rüguo ze tuoliecie.

¹² A uko ze ketuo chie no khapie a ketsüko n zau nu uko khapie baliete. A uko rüguo se tuo zo, mu kethodie bu tseilieketuo la kataketuo nuou zo kemosie miapuorei pejüwa mo.

¹³ Derei tsie a n ki vortatuoü bate, mu a keneiu bu uko ketshu chülieketuo la kijü nu baluokecü nu mhako pushüwate.

¹⁴ A n dieu se uko tsüwate, mu kijüu uko ngumecüya kekreilamonyü a kijüu nunu vor kemo tuoi uko rei kijüu nu mia mocü la.

¹⁵ A n bu kijüu nunu uko chüseta monyü kerüzhüu kinu uko rüguose balienu di chaya.

¹⁶ A kijüu mia kemo tuoi, uko rei kijüu mia mo.

¹⁷ Ketho-u se uko chü kemesaliecie, n dieu ketho zo.

¹⁸ No a ketsepie kijü nu keshü tuoi, a rei uko ketsepie kijü nu shüwate.

¹⁹ Uko bu rei ketho-u nunu u chü kemesalieketuo la uko la a thuo a chü kemesa se tuo zo.

²⁰ “A hako rübei la zomonyü uko die nunu a pelelieketuoko la rei chaya,

²¹ uko pete bu puo chülieketuo la. Sidi Apuo, a n nou ba mu no a nou keba tuoi uko bu rei avu nou baliecie; sidi kijüu bu no a ketseshükecü peleliecie.

²² Avu puo zokecü tuoi uko bu rei puo chülieketuo la no zayie pie a ketsüu a khapie uko tsüwate.

²³ A uko nou ba mu no a nou ba, süu geinu uko bu keze puo chü tseilieketuo siro kijüu bu no a ketseshü ükecü mu no a khrieyakezha tuoi uko khrieya ükecü silieketuo la.

²⁴ Apuo, no uko khashü a ketsüko a uko bu rei a kebara ba nyüya, sidi uko bu no kha a ketsü zayieu meholieketuo la, kekreilamonyü no kijüu chükelie mhodzü rei a khrie tuotakecü la.

²⁵ “Kemiatho Puou, kijüu we n siya mo, derei a we n si ba, mu no a ketseshü ükecü hako we si ba.

²⁶ A uko bu n zau siliete, mu süu mia silie zotuo, sidi no se a khrie vorkecü kekhrieu bu uko nou balie mu a bu uko nou balieketuo la.”