Johan 15 - Angami Naga CL (Re-edited) Bible (BSI)

Jisu Khubebo Ketho-u

¹ “A khubebo ketho-u, mu a Puoe liecieu zo.

² A geinu kepar puoco kehoupuorei puosi vülieya kemo-u puo süu sawaya, mu puoco kehoupuorei puosi vülieyakezhau puo süu bu puosi vü kralieketuo la meza kemesashüya.

³ A nieko ki pukeshü dieu la nie mesa bate.

⁴ A nou balie, a rei nieko nou bakezha tuoi. Puocoe puobo-u gei ba kemosie puosi vülieya kemo tuoi, nieko rei a nou ba kemosie nie si vülie kenjü.

⁵ A khubebo-u zo, nieko we puocoko zo. Kehoupuorei a nou ba mu a puo nou bakezhamia u si vü philieya; kekreilamonyü a sa mo di nieko mhapuorei chülie kenjü zo.

⁶ Kehoupuorei a nou ba kemo-u puoco tuoi kelhouwaya, sidi kitaya; siro mia süko rhe kengulie di kelhoupie mi nu thewaya.

⁷ Nieko a nou ba mu a dieko nie nou ba ro mha nie neiko chaliecie, siro süko chüpie nie tsütuo.

⁸ Nieko si vü phikelie geinu a Puou zayie chülietuo mu sügeinu nieko ae pethakeliemia chülietuo.

⁹ A Puoe a khrieyakezha tuoi a nieko khrieya, nieko a kekhrie nu baliecie.

¹⁰ A a Puoe diekhakeshüko chülie di Puo kekhrie nu bakelie tuoi a diekhakeshüko nieko chüya ro nie rei a kekhrie nu balietuo.

¹¹ A mha hako pie nieko ki pukeshü a keneiu bu nieko nou balieketuo la, mu nie keneiu bu tseilieketuo la zo.

¹² “A nie ki diekhakeshü sü, a nieko khrie kevor tuoi nieko bu huoniehuo khrienucüu zo.

¹³ Mia puoe puo khriethoko la puo phou khakeshü hahaki kekhrie kezha jü.

¹⁴ A nie bu chünukeshüu chüya ro nieko a khriethoko zo.

¹⁵ A nieko üse kituomia üdi kie sa mote, kituomia puo niepuu kedipuo chüya shicü siya kemo la; sirei a nieko ü khriethoko üte, kekreilamonyü a a Puou kinu sikelie khe pie nie pesipengushüwate.

¹⁶ Nieko a kedalie mo, derei a thuo nie kedalie. Nieko bu vo nie si vülie mu nie si süu bu ba seilieketuo la a nieko pethoshü, mu nieko mhakehoupuorei a za nunu Puou ki cha ro puo süu chüshü nie tsütuo.

¹⁷ Nieko bu huoniehuo khrielieketuo la a die hako khashü ho.

Kijüu Jisu Ngumecütaketuo

¹⁸ “Kijüu nieko ngumecüya liro süu nieko ngumecüketa mhodzü a ngumvüketa siliecie.

¹⁹ Nieko kijüu vie üro, kijüu nie üse puo vie üdi nie khrietuo. Sirei nie kijü hau vie mo zo, derei a kijü hau nunu nieko kedaliete, süla kijüu nieko ngumecüya.

²⁰ A nie ki, ‘Kituomia u niepumia ki zha mo,’ idi pukeshüu rükraliecie. Uko a pese ro, uko nieko sa pesetuo; uko a die zeya ro uko nieko die rei ze zotuo.

²¹ Derei a za la uko nie gei mha hako pete chütuo, ukoe a ketsekeshüu siya kemo la.

²² A vor di mha hako uko ki pushü kemosie we uko phouma lhomu ru, derei tsie we uko u kephouma keprülieketuo ba jüte.

²³ Kehoupuorei a ngumecüyakezhau a Puou rei sa ngumecüya.

²⁴ A uko donunu miapuorei chüshü kemo mhathoko chüshü mo üro uko phouma lhomu ru. Derei tsie we uko mha süko ngushüte, süla a mu a Puo rei ngumecüya.

²⁵ Süu thiedzü uko zho-u nu, ‘Uko puoca kejü nu a ngumecüte,’ idi thupie kezhü dieu bu tseilieketuo la zo.

²⁶ “A u Puou kinu ketsepie nieko ki shüketuo Thukepeluou, Puou kinu kepar ketho Ruopfüu, nieko ki vorlie ro puo thuo a zhapu chülietuo.

²⁷ Nieko rei a zhapumiata zo, kekreilamonyü nieko sietsenu a ze tuoketa la.