Johan 14 - Angami Naga CL (Re-edited) Bible (BSI)

Puou Ki Kevo Chau Sü Jisu Zo

¹ “Nieko noukemezhieta suo, Ukepenuopfü pele balie, a pele rei balie.

² A Puou kinu themia ba ba phi. Simo ükecü siewe a nieko ki pushüwata zotuoweü, siro a vo nieko ba kesetuoü batacü la.

³ Siro a vo di nieko ba keselieta ro a la vor di nieko ze a ki votatuo, sidi nie bu rei a kebara balietuo.

⁴ Siro nieko a voketuo chau si ba.”

⁵ Thoma sie puo ki, “Niepuu, no kirapuo votieya shi hie si mo. Hie kikemhie di cha süu silie ta?”

⁶ Jisu sie puo ki, “A chau, ketho-u mu kerheiu zo. A geinu zo kemosie miapuorei Puou ki vorlieya mo.

⁷ Nieko a si liro, a Puou rei si zotuo. Nieko tsie we puo siliete mu puo ngu reiwate.”

⁸ Filip sie, puo ki, “Niepuu, Puou pie hie pengushücie, siro hie nei tseitatuo.”

⁹ Jisu sie puo ki, “A puotei hachie nieko ze tuota rei Filip, no a si mo le? Kehoupuorei a nguwaketamia, Puou rei nguwate. Siro no kiüdi ‘Puou pie hie pengushücie,’ iya ga?

¹⁰ A Puou nou ba mu Puou a nou bacü no pele mo me? A nieko ki pukezha dieko a thuo a die monyü a nou keba Puou thuo puo mhathoko chü tuoyakezha ze.

¹¹ A Puou nou ba mu Puou a nou bakecü peleliecie; si mo ürei, mhathoko la zorei a peleliecie.

¹² A nieko ki pu toushütuo, kehoupuorei a pelekelieu a chüyakezha mhathoko chütuo, mu puo süko ki rei zhakuokecü mhatho chütuo, kekreilamonyü a Puou ki votatuoü bate.

¹³ Tsiu nie a za nunu mhakehoupuorei cha ro, Nuou geinu Puou bu zayie chülieketuo la a süu chüpie tsü zotuo.

¹⁴ Nieko a za nunu mhakehoupuorei cha ro, a süu chüshü zotuo.

Phrapie Kezhü Kemesa Ruopfüu

¹⁵ “Nieko a khrieya ro, nieko a diekhakeshüko zetuo.

¹⁶ Siro a Puou ki chatuo, mu puo Thukepeluo kekrei puo khashütuo, mu puoe kechachie nieko ze tuo zotuo.

¹⁷ Hauha ketho Ruopfüu, kijüu puo zelie kenjükecüu zo, süue puo nguya mo, morei puo si reiya kemo la. Niekoe puo si ba, puo nieko ze tuoya, mu nieko nou tuo zotuocü la.

¹⁸ “A nieko kha kemerüwalie lho zo; a nieko ki vortuo.

¹⁹ Zha keduoyo sie kijüu a ngu sa motatuo, derei nieko we a ngutuo, a rhei ketuo tuoi nieko rei rheituo zotuocü la.

²⁰ Sünhiesü a Puou nou tuokecü, tsiu nieko a nou tuokecü mu a nieko nou tuokecü silietuo.

²¹ Kehoupuorei a diekhakeshüko ngulie di süko chüüzeyakezhamia a khrieya; mu a khrieyakezhamia a Puou rei sümia khrietuo mu a thuo a pie uko pengushütuo.”

²² Judas, (Iskariot kemo-u) sie, puo ki, “Niepuu, no n thuo n pie kijüu monyü hie pengushüketuo kikidi silie ta?”

²³ Jisu sie puo ki, “Kehoupuorei a khrieyakezhamia a die zetuo, siro Puou rei sümia khrietuo, mu hienie sümia ki vo di sümia ze batatuo.

²⁴ Kehoupuorei a khrieyakemomia a dieko rei zeya mo; mu nie silieketa die süu a die mo, derei a ketsekeshü Puou die zo.

²⁵ “A nieko ze keba nu die hako pie nie ki pushüwate ho.

²⁶ Derei Thukepeluo, Kemesa Ruopfüu, Puou a za nunu ketseshüketuou thuo mha pete pie nie pethalietuo, mu a nie ki pukeshü pete nie bu rükralietuo.

²⁷ A nouneu khapie nieko tsüya, a thuo a nouneu khapie nie tsüya. Kijüue khapie mia tsüyakezha tuoi a pie nie tsütuoüzhü mo. Nie noukemezhieta suo mu michie rei ta hie.

²⁸ A nieko ki, ‘A tuotatuo, derei a nieko ki la vortuo,’ ikeshüu siliete. Nieko a khrieya liro, a Puou ki votatuoükeba la nie neituo, Puou a ki zhakuokecü la.

²⁹ A mha süko chüketa mhodzü tsie se nieko ki pushüwate, süu chüketa ki nieko bu pelelieketuo la.

³⁰ A nieko ze kerüchü pecha ba salie lhote, kijü hau kediu vortazhücü la. Puo a mho puo kekuo ba mo;

³¹ derei a a Puou diekhakeshü kemhie chüya, kijüu bu a Puou khrieyacü silieketuo la. Úko sie di tuoshüta khe.