Johan 13 - Angami Naga CL (Re-edited) Bible (BSI)

Jisue Puo Siedziko Phi Khrükecü

¹ Siro Jisue kijü hau khawa di Puou ki votaketuo Puo teiu vor tso baketa Ciekevonyiu mhodzü silieta. Puoe kijü nu keba puo themiako khrie vor zo; mu süko khrie vo thela tso zo.

² Satan-e Judas Iskariot, Simon nuou bu puo sewaketuo keleu se puo nou shüwata, mu mhacü keba ki,

³ Puoue kekuo pete khapie Jisu dzie nu shüwaketa, siro puoe Ukepenuopfü kinu vor zokecü mu Ukepenuopfü ki la votaketuo puoe si ba,

⁴ süla puo mizhü geinu sielie di puo boulie peso-u rhuowa, sidi dziesüpfhe puo pie puo chie phapfülie.

⁵ Süsie dzü rupie dzieteikhou puo nu shülie di puoe pethakelieko phi khrü mu pfhe puo chie phapfü ketuo dziesüpfheu pie uko phi süsü vota.

⁶ Si vo Simon Pitor tsolie tse puo sie, “Niepuu, no a phi khrütuo le?”

⁷ Jisu sie, “No tsie a chü kebau ca si ba mo, derei no hasie nu silietuo.”

⁸ Sitse Pitor puo ki, “N bu mhakipuorei a phi khrülie lho.” Jisu sie, “A bu n khrü moliro a kitsa n ya jü zo.”

⁹ Sitse Simon Pitor puo ki, “Niepuu, a phinie zomonyü a dzie mu a tsü rei sacie.”

¹⁰ Jisu puo ki, “Kehoupuorei dzürüluwa ro puo phinie sie kekreitsa khrü sa morei vi; puo mesa tsei ba zo; siro nieko mesa ba; derei pete zo mo.”

¹¹ Kekreilamonyü puoe puo sewaketuou si ba; süla puo sie, “Nieko pete mesa zo ba mo,” idi kepu zo.

¹² Puo uko phi khrükewa sie puo pfhenei se lalie, sidi ke balie di uko ki, “A nieko gei chükeshüu nieko siliete mo?

¹³ Nieko a üse, Kepethau mu Niepuu iya, mu süu puotou zo, a süu zocü la.

¹⁴ A nie Niepuu mu kepethau zo di nieko phi khrü üro nieko rei huoniehuo phi khrü zhü zo.

¹⁵ A nie la thakie puo chüshü, süla nieko rei a nieko gei chükeshü mhie chüliecie.

¹⁶ A nie ki pu toushütuo, miadiemia puo Niepuu ki zha mo, mu mialiekechüu rei mia puo ketsekeshüu ki zha mo.

¹⁷ Nie hako si di chüüzeya liro, nieko thejakepfütho.

¹⁸ A nieko pete dze pu ba mo; ae kedalieketako a thuo si ba. Derei kethodie nu, ‘A niekhrüda kecüu puo phichapie a tsie,’ ikecüu bu tseilieketuo la.

¹⁹ Süu chüketa mhodzü a tsie nie ki puya; sitse süu chüketa ki, a süu zokecü nie bu pelelieketuo la.

²⁰ A nieko ki pu toushütuo, kehoupuorei ae ketsekeshüu zekelieu a zelieya; mu kehoupuorei a zekelieu a ketsekeshüu zelieya.”

Jisu Mia Puo Sewaketuo Pedzü Pukeshü

²¹ Jisu hau pukeshü sie puo nou kemezhie phi di, “A nieko ki pu toushütuo, nieko donu mia puo a sewatuo,” sita.

²² Süki pethakelieko sie huoniehuo meho di puo supuo pu ba shi lelie mo bata.

²³ Ru puoe pethakelieko mia puo, Jisue puo khrieyakezhau puo merü ki vakhriepfü ba.

²⁴ Sitse Simon Pitor thedo chü puo kie di puo bu Jisue supuo dze pu ba shiü ketsonuta.

²⁵ Süla Jisu khie tou nu keba puo siedzi süu reipra di puo ki, “Niepuu, süu supuo ga?” idi ketsota.

²⁶ Süla Jisu sie, “A niekhrüda huoyo petselie di pie puo tsüshüketuou sü puo zo ho.” Sidi puo niekhrüda huoyo chüpie petselie di süyo khapie Simon Iskariot nuou Judas tsüshü.

²⁷ Siro niekhrüdayo pielie mumetha Satan puo nou leta. Süla Jisu sie puo ki, “No chüketuou chü mhailiecie,” sishü.

²⁸ Sirei mizhü vakhriepfü kebako miapuorei kedipuo la Jisue hau pie puo ki pu shicü silie mo.

²⁹ Huomia sie, Judas-e uko rakabou seyakezha la, Jisue puo ki, “Thenyiu la úko se morokesuoko khrülienucü;” morei mha huo pie mhakejümiako tsünu pu ba nhiecü leta.

³⁰ Süla puoe niekhrüda pielie mu tuo mhai kitie prata. Mu süsü thevata.

Diekhakeshü Kesau

³¹ Puo praketa sie, Jisu sie, “Tsie Themia Nuou zayie chüliete, mu Ukepenuopfü rei puo geinu zayie chü bate.

³² Puo geinu Ukepenuopfü bu zayie chülie liro Ukepenuopfü rei puo geinu puo bu zayie chülietuo mu puo bu zayie chü mhaishütuo.

³³ Harie nhicuko, a nieko ze ba pechalie lhote. Nieko a pfhütuo, derei a Judako ki kepu tuoi a tsie nieko ki rei puya; ‘Nieko a kevo nu vorlie kenjü.’

³⁴ A diekhakeshü kesa puo pie nieko tsüshüzhie, nieko huoniehuo khrieliecie. A nieko khrie kevor tuoi nieko rei huoniehuo khrielie morosuo.

³⁵ Nieko huoniehuo khrielie liro, süu geinu nieko ae pethakeliemia ükecü mia pete bu silietuo.”

Jisu Pedzü Pitor Puo Phra Mvütaketuo Pukeshü

³⁶ Simon Pitor sie puo ki, “Niepuu, no kirapuo votieya ga?” Jisu sie puo ki, “A kirapuo votieya shi no tsie sünu a medzi vorlie kenjü, derei hasie no a siemedzilietuo.”

³⁷ Pitor sie puo ki, “Niepuu, kiüdi a tsie n siemedzi vorlie kenjü ga? A n la a phou khashütuo.”

³⁸ Jisu sie puo ki, “No a la n phou khashü zotuo le? A n ki pu toushütuo, no thevü kekhou mhodzü va se a melietatuo.”