Johan 11 - Angami Naga CL (Re-edited) Bible (BSI)

Lazar Se

¹ Mia puo za Lazar ükezhau Bethani nu lhou ru mhachülieta, hau Maria mu puo dzüriepfü Martha unie rünau.

² Maria hau tier kethengu pie Niepuu kenhe di puo tha pie puo phi sükeshüpfü; mu puo prüu Lazar mhachü zhü.

³ Süla puo üpfünie dieyie ketsepie Jisu ki shü di, “Niepuu, no puo khrieyakezhau mhachüzhüte,” sishü.

⁴ Jisu die hau sikelie ki sie “Kechü hau kesiashie monyü Ukepenuopfü zayie mu sü geinu Ukepenuopfü Nuou bu zayie chülieketuo la zo,” sita.

⁵ Jisue Martha mu puo siezepfü tsiu Lazar uko khrie vor zo,

⁶ siürei puo Lazar mhachü zhüketa dielieu sikelie sie rei zha kenie puo kebachüu nu ba sata.

⁷ Süsienu puoe pethakelieko ki, “Úko Judia nu la vo khe,” sita.

⁸ Sitse puoe pethakelieko sie, “Rabi, tsiedo kinu Judako sünunu ketsie pie n vatuoü sie ze, mu no sünu la votuo le?”

⁹ Jisu sie, “Khunhie bavüdo kerekenie teiso baya mo üme? Süla khinhie gei tuoyakezhamia u phi mesüya mo, ue kijü kezieu nguyakezha la.

¹⁰ Derei teizei nu tuoyakezhamia u phi mesüwaya, kezieu uko nou tuo kemo la.”

¹¹ Mha hako pukewa sie, puo uko ki, “Úko zeu Lazar zezhüte, derei a vo puo kesou lashütuo.”

¹² Sitse pethakelieko sie “Niepuu, puo zekezhü zo liro puo mhapuoreita lho,” sita.

¹³ Jisu puo siaketa dze pu zo, derei ukoe puo zekezhü dze pu ükecü leta.

¹⁴ Süla Jisu mezhükhro uko ki, “Lazar siate,

¹⁵ mu nieko la a sünu ba mokecü a nei, nieko bu pelelieketuo la. Derei úko puo ki vo khe.”

¹⁶ Sitse Thoma, Nuobi ükezhau sie puo zeko ki, “Úko rei vo khe, puo ze sünu siashüketuo la.”

Jisu Rheilakesieu mu Kerheiu

¹⁷ Siro Jisu vorlie tse, Lazar khrukewa zha diata ükecü silie.

¹⁸ Bethani-e Jerusalem kepenuoki maildo kenie meseki ba,

¹⁹ mu Judako kekra Martha mu Marianie prüu la unie nou thupeluotuoü vor ba.

²⁰ Siro Marthae Jisu vorkezhü sishü tse vo puo ze kese, derei Maria kinu ba zo.

²¹ Sitse Martha sie Jisu ki, “Niepuu, no haki ba ro a prüu siatalie lhomu ru!

²² Derei tsie zorei no Ukepenuopfü ki mhakehoupuo cha rei puo khashü zoketuo a si ba.”

²³ Jisu puo ki, “N prüu la sielietuo.”

²⁴ Martha puo ki, “U, thelanhie rheilakesieu nu puo rei rhei la sielieketuo a si ba.”

²⁵ Jisu puo ki, “A rheilakesieu mu kerheiu zo; kehoupuorei a pelekelieu siata zorei rhei lalie zotuo,

²⁶ mu kehoupuorei rhei keba nu a pelekelieu mhakipuorei siatalie lho. No hau pele zo mo?”

²⁷ Sitse hapfü sie puo ki, “U, Niepuu, no Khristau, Ukepenuopfü Nuou kijü nu vorketuou ükecü a pele tou zo.”

Jisu Krata

²⁸ Martha hau pukeshü sie la le puo siezepfü Maria noupu di puo ki, “Kepethau vorte mu puo n kie tha ho,” sishü.

²⁹ Mu puo süu sishü tse rükri puo ki vo.

³⁰ Süki Jisu rünau nu ler moluo, mu Martha ze kesekecü chüu nu tha zoluo.

³¹ Puo kinu ba di puo nou thupeluo keba Judakoe Maria rükri sie tuoketa ngu. Sitse uko rei puo siemedzi vo, ukoe puo tuo mekhruchüu nu vo di kratuo üzhü nhiecü le.

³² Maria vo Jisu chüu tsolie di puo ngulie tse tsu puo mhodzünu khoutoulie di sie, “Niepuu, no haki ba üro a prüu siatalie lhomu ru!”

³³ Siro Jisue Maria mu puo ze ketuo Judako kra ketuo ngushü di puo nou chütei vorta mu puo nou suothorta.

³⁴ Sidi puo sie, “Nieko puo pie kirapuo zhü ga?” Uko sie puo ki, “Niepuu, vor di mehocie,” sishü ru

³⁵ Jisu krata.

³⁶ Süla Judako sie, “Lere-i, puo kedipfü puo khrie vor shi ha!” si.

³⁷ Derei huomia sie, “Mhicieu mhi chü pevikeshüu, kesia nunu themia hau rei chü perhei lashü lho üme?” sita.

Lazar Chü Perheikelie

³⁸ Süsie Jisu puo nousuo phi di mekhru ki vor. Süu kecieki puo mu ketsie pie mekapie ba.

³⁹ Jisu sie, “Ketsieu phouwacie!” Sitse siaketau üpfü Martha sie, “Niepuu, puo menazhütatie, puo siaketa zha diate eru!”

⁴⁰ Sitse Jisu puo ki, “A n ki no pele liro, no Ukepenuopfü zayie ngutuo, ishü mo üme?”

⁴¹ Süla uko ketsieu phouwa. Tsiu Jisu tosie di, “A puo, no a kecha rünyülieketa la a n thezieya.

⁴² No a pfhe rünyü seiyakecü ae si, derei haki ketha krodiu bu noe a ketsekeshü pelelieketuo la a hau kepu zo.”

⁴³ Puo hau pushü di shie puo rhiechü di sie, “Lazar, parlie.”

⁴⁴ Sitse siaketau puo phi puo dzieko pfhe se kezipfü mu pfhe yopuo se puo zie kezipfü, di par thata. Jisu sie uko ki, “Puo phreishü di puo bu tuolie,” sishü.

Jisu gei Ngumvü do Rhükecü

⁴⁵ Süla Maria ze kevor Judamia kekra Jisue kedipuo chüshü shicü ngu, di puo pelelie.

⁴⁶ Derei süko huo Farisiko ki vo di Jisue kedipuo chüshü shicü pushü.

⁴⁷ Süla zievokezhako mu Farisiko vo mechükehouu kieshü di sie, “Úko kedipuo chü ro vi ta? Themia hau zasi kekra chüshü baketa la.

⁴⁸ We puo bu hi zo vo liro themia pete puo peletatie, mu Rommia vor rüsuokiu mu u seyie pekawatie,” sita.

⁴⁹ Derei uko donu Kaifa, sücie zievokezhatho chü kebau, sie, “Nieko mhale mo pie kizo ga?

⁵⁰ U themia pete pekakewau ki mia puo bu siaketawe vikuoketuo nieko le mo me?”

⁵¹ Derei puo hau kepu puo thuo puo geinu monyü, sücie zievokezhatho chü keba ki ze Jisu bu seyieu la siashüketuo siedzedie pukeshü zo.

⁵² Mu seyieu la rübei zomonyü cüre tuoketa Ukepenuopfü nuonuoko ze vor puo chülieketuo la.

⁵³ Süla sünhie yawinu uko puo dukhriwaketuo rhü tuota.

⁵⁴ Süla Jisue Judako donu mia mhingu chü sa mo di vo rayha kepenuoki Efraim ükecü rünau nu pethakelieko ze di sünu bata.

⁵⁵ Süki Judako Ciekevonyiu penuota, mu themia kekra thenyiu mhodzü u chü kemesaketuo la rüna nunu tuo Jerusalem nu vota.

⁵⁶ Sitse uko vo rüsuoki nu tha, mu Jisu pfhü di huoniehuo ki, “Nie kedipuo le ga? Puo thenyi nu vor lho zo die mu?”

⁵⁷ Sidi zievokezhako mu Farisiko Jisu telieketuo la puo kirapuo ba shi puo dze kesimia kehoupuo bu rei süu se uko ki punuta.