Johan 10 - Angami Naga CL (Re-edited) Bible (BSI)

Jisu Kuopfhe Keviu Zo

¹ “A nieko ki ketho-u puya, kehoupuorei careu ze tekuobouu nu le mo di cha kekrei ze meli leyakezhamia kerügumia mu mia vie sekecümia zo.

² Careu ze di leyakezhau tekuoko kepfheu zo.

³ Care kepfheu care khrüshü puo tsüya mu tekuoko puo pfhe silieya, puoe puo kuoko za kie di uko kieya, sidi cha tha ze parshüya.

⁴ Puo süko ze phre pralie ro süko mhodzü rie di uko shüta ze tuoya mu tekuoko rei puo siemedziya, kekreilamonyü sükoe puo pfhe siyakezha la.

⁵ Süko kekreimia siemedzita monyü ta sümia therütaya, süko kekreimia pfhe siya kemo la.”

⁶ Jisue uko ki dievi hau pushü, derei uko puo kepuca silie mota.

⁷ Süla Jisu la sie uko ki, “A nieko ki pu toushütuo, a tekuoko careu zo.

⁸ A mhodzü kevormia pete kerügumia mu miaviesekecümia zo; süla tekuoko süko pfhe rünyü mote.

⁹ A careu zo, kehoupuorei a geinu keleu kelalie zotuo, tsiu puo tuo ler mu tuo pratuo di puo ca ngulietuo.

¹⁰ Kerügumia rügutuoü, mia dukhrituoü mu mha pekatuoücü la rübei voryakezha zo. A zowe mia bu kerhei ngulie mu u ketshukelhuo ngulieketuo la kevor zo.

¹¹ “A tekuo kepfhe keviu zo, tekuo kepfhe keviue tekuoko la puo phou khashüya.

¹² Kuopfhemia kemo, mia bu puo zhakhrü ze ketuou tsiu tekuoko puo vie kemo-u we socie vorkezhü ngukeshü ki puo tekuoko khawa di tataya; sidi socie bu tekuoko telie mu uko phruokecürewaya.

¹³ Mia bu puo zhakhrü ze ketuou tataya, kekreilamonyü puoe tekuoko rüli leya kemo la.

¹⁴ A tekuo kepfhe keviu zo. A a vieko si mu a vieko rei a si ba,

¹⁵ a Puoe a si keba tuoi a rei a Puou si ba. Mu a we a kuoko la a phou khashütuoüzhie.

¹⁶ A kuo kro hau nu ba kemo tekuo kekrei rei ba saluo. A süko rei ze vorlie morosuo, mu süko a pfhe rünyütuo. Sidi tekuokro puo chü, kepfhe rei puotatuo.

¹⁷ Puou a khrieya, kekreilamonyü a a phou khashütuoüzhü mu a süu ngu lalietuocü la.

¹⁸ Miapuorei a kinu süu lielieya mo a thuo a medota di süu khashütuoüzhü, mu a süu khashüketuo kekuo ba mu chü lalieketuo kekuo rei ba. A a Puou kinu diekhakeshü hau ngulie.”

¹⁹ Die hako la Judako chükho kekrei lawa.

²⁰ Uko mia kekra sie, “Puo terhuokesuo zeya mu mecie mote! Kiüdi puo die rünyütuo ga?”

²¹ Kekreiko sie, “Die hako terhuokesuo bu u kebi zeketuomia die mo; kimhie di terhuokesuo puoe mhiciemia mhi chü pevishütuo ga?”

Judako Jisu Melieketa

²² Süki Jerusalem nu rüsuoki Kenyükecünyiu nyi. Süu teisei ki ta,

²³ mu Jisu rüsuokiu nu Solomon kifükhro nu tuo vozhü.

²⁴ Süla Judako vor puo houpfülie di puo ki, “No kichiepuo hie bu mhalelie kemo chü ba zotieya mu? No Khrista üliro hie ki pu kemesashücie.”

²⁵ Jisu uko ki, “A nieko ki pushüwate, mu nieko pele mote. A a Puou za nu mhachüyakezhako sü a zhapuko zo,

²⁶ derei nieko peleya mo, kekreilamonyü nieko a kuoko kemo la.

²⁷ A kuoko a pfhe rünyüya. A süko si ba, mu uko a siemedziya.

²⁸ A kechachie kerhei se uko tsüya, mu uko mhakipuorei katalie lho. Siro miapuorei a dzie nunu süko sesetalie lho.

²⁹ Mhapuorei a Puoue khapie a tsükeshüu ki kezha jü mu miapuorei Puou dzie nunu süu sesetalie lho zo.

³⁰ A mu Puou hienie sü puo zo.”

³¹ Süki Judako ketsie pie puo vatuoü lata.

³² Sitse Jisu sie uko ki, “A a Puou kinu kevor mhatho kevi kekra pie nieko kieshü. Nieko mhatho süko kiu la ketsie pie a vatuoüya ga?”

³³ Uko la sie puo ki, “Mhatho keviko la hie ketsie pie n vatuoü tha mo, derei no Ukepenuopfü ketha die pute, kekreilamonyü no themia puo zo di n thuo n chüpie Ukepenuopfü üketa la.”

³⁴ Jisu sie uko ki, “Nieko zho-u nu thupie kezhü, ‘A puya, nieko terhuomia zo,’ isi mo me?

³⁵ Ukepenuopfü die u ki kevormia üse ‘terhuomia’ üdi pu, mu kethodieu vakelie jü üro,

³⁶ siro ‘A Ukepenuopfü Nuou zo’ ikeshü la niekoe Puou thuo chü kemesalie di ketsepie kijü nu keshüu üse Ukepenuopfü thaü tuo le?

³⁷ A a Puou mhathoko chüya moliro, nieko a pele hie.

³⁸ Derei a süko chüya liro, nieko thuo a pele morei, mhathoko we peleliecie, sitse niekoe Puou a nou ba mu a rei Puou nou bakecü silietuo.”

³⁹ Sitse uko puo telietuoü la sie, derei puo uko dzie nunu tata.

⁴⁰ Siro puo la sie Jordan rü lutsakhie Johan-e therieki dzülu pie mia ketsü thechüu nu vo di sünu bata.

⁴¹ Süla themia kekra puo ki vor di sie, “Johan zowe u ngo zasi puorei chü mo, derei Johan themia hau dze kepu pete ketho phreta ze ha.”

⁴² Sidi sünu themia kekra puo pelelie.