Joel 3 - Angami Naga CL (Re-edited) Bible (BSI)

¹ Kekreilamonyü, teisozha süko nu mu süteiki, a Juda mu Jerusalem nu kedieko ze la vorkelie ki,

² a seyie pete kie kengulietuo sidi uko ze Jehoshafat razhau nu kerlietuo, sidi sünunu a uko ze dienya kecütuo, a themia mu a kayie Israel la, kekreilamonyü ukoe uko bu seyieko donu cüre tuoketa la. Ukoe a kijü kezawa.

³ Sidi a themiako la dape, mu thethenuko la thepfunuoko se thelhi chü, tsiu zu la thenunuoko zewa, sidi süu krieketuo la.

⁴ He-i Tur mu Sidon, tsiu Filistia kijükouü nu keba pete, nieko a pie kedipuo chütieya mu? Nieko mhaca huo la a zha chüshüzhie me? Nieko a zha chüpie a tsü liro, a rükri nieko mhatho-u pie nieko tsü gei lashütuo.

⁵ Kekreilamonyü nieko a rakachü siro a suna chüliete, mu a kinyi ketapfü nie rüsuokiko nu vote.

⁶ Niekoe Judamia mu Jerusalemmia zepie Grikmia ki shüwa, uko kijü rie nunu kepetse se nu shüwa.

⁷ Derei tsie we a uko bu nieko u zeshükewa thechüko khawa di tuotaketuo la uko phouse sieshütuo, mu a nieko mhathoko chüpie nie tsü gei lashütuo.

⁸ A nie nuonuo thepfuko mu thenuko zepie Judako dzie nu shüwatuo, mu ukoe süko zepie Sabiamia, kepetse phi nu ketuo seyiemia tsüwatuo, kekreilamonyü Jihova pushüwatacü la.

Jehoshafat Razhau nu Dienya Kecükecü

⁹ Seyieko donu hau pushülie: Terhüla dojülie, terhümiaviko kehüshülie. Rüpfhünuo pete bu penuo vorlie, uko bu khorlie.

¹⁰ Nie liecie jü ketsapie zhiecha chülie, mu nie charuo ketsapie rüngou chüliecie; kethachümia bu, “A terhümiavimia,” iliecie.

¹¹ Mhai vorliecie, nie seyie lukihaki ketuo pete, nie thuo vo sünu kenguliecie. He-i Jihova, n terhümiaviko ze kerliecie.

¹² Seyieko bu u thuo u hü sesierlie, sidi Jehoshafat razhau nu vorlie; sünu a balie di siezanuomia seyie pete dienya kecütuo.

¹³ Nie zhiepfhinuo chü pielie, kekreilamonyü lie mezhüte. Tuo lelie, kedeshülie, kekreilamonyü khubezu kethebou tshu bate. Zutseko tshuzie bate, kekreilamonyü uko rügerüzhükecü zhathorte.

¹⁴ Themia krodi, themia krodi, pepiketuo razhau nu bate! Kekreilamonyü pepikecü razhau nu Jihova teisozhau penuo baketa la.

¹⁵ Niakiu mu khrüu zeite, tsiu themvüko rei zieshü mote.

¹⁶ Jihova Zion geinu shiekhouizhie, tsiu Jerusalem nunu puo pfhe phrashüzhie, siro teiko mu kijüu rünie khrukhru bate. Derei Jihovae puo themiako keyau, Israel la dahou kemeteiu.

Judae Zapuzayie Chüketuo

¹⁷ Sidi niekoe a, Jihova nie Kepenuopfü, Zion gei kebau, a kemesa kijüthou gei lhou baya ücü. Siro Jerusalem mesatatuo, tsiu chazoumia puorei süu pfüthe vo salie lho.

¹⁸ Sünhie kijüthoukoe, khubezu kesa pekrushütuo, kijüthouko mithunudzü pekrushütuo, mu Juda rücüko pete dzü kruzhütatuo; Jihova kiu nunu dzüluo puo kru partuo, sidi dzü pie Shitim Razhau petseshütuo.

¹⁹ Ijipt-e ratatuo mu Edom-e rayha ruoketa puo chütatuo, uko Juda themiako gei mha kesuo chükeshü la, uko kijü nunu u kejo kejümia zie pekrukecü la.

²⁰ Derei Juda we kechachie lhou batatuo; tsiu Jerusalem-e thephou pete ba votatuo.

²¹ A uko zie khepu lietuo, mu a uko kejokemouko chü kemesalie lho, Jihova Zion gei bakecü la.