Joel 2 - Angami Naga CL (Re-edited) Bible (BSI)

¹ Zion nu ketsüu khoushülie; a kijüthou kemesau gei kemichie vorkezhü pfhe khoushülie! Kijü nu lhouketuo pete bu pekhrukhru batalie, kekreilamonyü Jihova teisozhau vorzhie, süu penuo bate;

² teisozha kezei puo mu thedzükekou teisozha puo, kimhou shübouikecü tsiu zeibouikecü teisozha puo! Teimekiekecü tuoi di kijüthouko zepfülietuo, zha mu kuo phikecü rüpfhünuo vortuo; thiedzü rei uko mhiekecü vor mo, morei hasie rei uko mhiekecü vorlie lho.

³ Uko mhodzünu mi-e mha pekatuo, tsiu uko sietsa miü tu ba. Uko mhodzünu kijüue Iden zieu kemhietuo, derei uko sietsa rayha kemethuo zhütuo, mhapuorei uko kinu tatalie lho.

⁴ Ukoe kier rhi tuoi, tsiu terhü kier tuoi ukoe tatuo.

⁵ Kierbagei taketuo pfhe tuoi, uko kijüthou mezüko geinu proutuo, mi-e rüguko thekezha pfhe tuoi, rüpfhünuo kuo phicü terhü la dojü sekethamia mhie zo.

⁶ Uko mhodzünu themiako kemezhie phi, u zie pete teimekie.

⁷ Terhümiavimia tuoi uko ta, chüpahimia tuoi uko sozha meli. Mia puopuokecü u thuo u cha nu vo, ukoe uko chako vajolie lho.

⁸ Uko miapuorei mia puo khulie lho, mia puopuokecü puo thuo puo chau ze tuo zotuo; uko terhünyieko pfüthe vo zorei mhapuorei u chakhalie lho.

⁹ Uko nadiu gei proushütuo, uko sozhako gei ta votuo; uko kiko nu meli letuo, ukoe kerügumia tuoi di khirki nu gou letuo.

¹⁰ Uko mhodzünu kiükishütatuo, teiko perüsütatuo. Niaki tsiu khrü zeitatuo, tsiu themvü rei zieshü motatuo.

¹¹ Jihova puo rüpfhünuoko mhodzünu puo pfhe phrashütuo; puo krodi kide zha shi! Puo diekhakeshü zeyakezhako phrü hulie lho zo. Ketho zo, Jihova teisozhau zha; merie se zo, supuonie süu nu thalie ta?

¹² Sishierei tsie Jihovae puya, nie nou pete se rürei a ki vorliecie, mevo, kra, mu thekrü chü di,

¹³ nie pfhenei mo di nie melou cierhashülie. Jihova nie Kepenuopfü ki rürei volie, puoe mia khrie mu mia ngumezhieya, puo nou meyie tho, tsiu puo kekhrie zha zo, siazha khashüketuo nu rei puo nou keditaya.

¹⁴ Puo rüreilie tsiu puo noukedilie di, theja pie puo sietsatie shüwa, lhacülhale ruosuo mu kekrie ruosuo khapie, Jihova n Kepenuopfü tsü rei supuo si ta?

¹⁵ Zion nu ketsüu khoushülie; mevo kemesalie; kemesü kehou puo kieshülie;

¹⁶ themiako kie kengulie. Mechükehou chü kemesalie, phichümiako kie kengulie; nhicuko pfhü kengulie, tsiu nuyakezhako rei. Yasau bu puo kibou nunu tuo pratalie, mu yasapfü bu rei puo zhü nunu pratalie.

¹⁷ Zievoko, Jihova liethoko bu kifükhro mu ruosuobau donunu kraliecie. Uko bu “N themiako kelashücie, he-i Jihova, mu n kayieko bu mia krenyü, tsiu seyieko donu mia dzeüse puo chüta hieyi. Kiüdi mia bu themia donunu sie, ‘Uko Kepenuopfü kirapuo ba ga?’ isitatuo mu!”

Ukepenuopfü Uko Pfhekhoshü mu Phrakeshü

¹⁸ Sitse Jihovae puo kijüu la puo rota, sidi puo themiako ngumezhieta.

¹⁹ Jihovae puo themiako die kela di sie: A nieko ki telha, khubedzü, tsiu tier ketseshüzhie, mu nieko kelhuo chülietuo; siro a nieko bu seyieko donu miakrenyü chü salie lhote.

²⁰ A pesotsa rüpfhünuou chü kedipie nie ze kepeciewatuo, sidi puo whuopie kijü keso tsiu razhüketara shüwatuo, puo mhodzütsa bu niathutsa dzükezhatsa votatuo, tsiu puo sietsa bu niakratsa dzükezhatsa votatuo; puoe cie mena di puore kesuoko mena siertatuo. Puoe mha kezha phi chüshü tou zeru.

²¹ Michie hie, he-i kijüu; nie neilie mu nie noumvülie, kekreilamonyü Jihova mha kezha phi chüshüte!

²² Michie hie, nie lie nu khunuoko, kekreilamonyü rayha nu nhako pejozhüte; seibo puo si vüliete, chiedebo tsiu khubebo vi bate.

²³ He-i Zion nuonuoko, Jihova nie Kepenuopfü nunu nie neilie mu nie noumvülie; kekreilamonyü puoe teirü kerieu puotei tou ki nie la khashüte, puo nie la teirü perü phishüte, teirü kerieu tsiu teirü kenuou hadzü kemhie di khashü.

²⁴ Sieko nu telha thuo tshupfhütatuo, mhabouko nu tier mu khubezu thuo krurüyo partuo.

²⁵ Ae pruo ketuo ku kro-u, zopeu, kepekau mu keluu bu cülieketako, a rüpfhünuo kekra ketsepie nieko petsoukeshü teicieko sou chü lashütuo.

²⁶ Nie mha kekra cüükrie di nie kelhuo chülietuo, sidi Jihova nie Kepenuopfü nieko gei mha u ngo chükeshüko tshelietuo. Siro a themiako bu mhakipuorei thenga chü salie lho.

²⁷ Nieko a Israelko donu keba, tsiu a Jihova nie Kepenuopfü mu kekrei puorei tuo mo ücü silietuo. Siro a themiako bu thenga chü salie lho.

Ukepenuopfü Ruopfüu Rukeshü

²⁸ Siro kenuotsa a Ruopfü rupie chüüphou pete gei shütuo, nie nuo thepfuko mu thenuko rei siedzedie putuo; phichüko u mho pematuo, tsiu nie khriesako ziemho ngutuo.

²⁹ Siro süki miadie kechü thepfuko tsiu thenuko gei rei a Ruopfü rushütuo.

³⁰ A teiko gei mu kijü nu zasi chü pekieshütuo, thezie mu mi tsiu mikhu kemeriekecü batatuo.

³¹ Niakiu zeitatuo, mu khrü thezie mevitatuo, Jihova teisozha kemeriekecüu kevor mhodzü.

³² Sitse kehoupuorei Jihova za kiekeliemia kelalietuo; kekreilamonyü Jihova pukeshü mhie, Zion kijüthou gei mu Jerusalem nu takelieko tuo, mu lhiekelieko donu Jihova thuo kiekelieko tuotuo.