Jeremia 9 - Angami Naga CL (Re-edited) Bible (BSI)

¹ He-i a tsüe dzüluo chü, tsiu a mhi-e mhidzü rü chüücü we, a teisoteizei a themia kejüko mia u dukhrikewako la kralietuomu ru!

² He-i kijükesia nu rüvemia la pru puo ba ücü we, a themia khawa di süko kinu tuotatuomu ru! Kekreilamonyü uko pete rei pieü kechümia, kelhiekecü kro-u zo.

³ Ukoe theü tuoi u meü kekhrelieya; ukoe kijüu nu kethotsa mo di, kesuo kechütsa meteilie; kekreilamonyü ukoe kesuo kechü sie chü tuoya, sidi uko a siya mo, Jihovae siya.

⁴ Nie zanuomia kinu menuolie, mu nie seyiemia puorei pele hie; nie seyiemia pete mha sekedoyakezhamia phrecü la, tsiu zanuo pete rei mia pejoyakecümia mhie tuoya.

⁵ Uko pete rei u zanuomia sekedoya, sidi miapuorei ketho-u puya mo; uko meü pie kemeda putuoü pethapfüliete; ukoe kephouma chü tsiu thenoukedituoücü u cha meziethor.

⁶ Mia pesekecü sie pese, mha sekedokecü sie kedo! Ukoe a silie mvüte, Jihovae siya.

⁷ Süla krodiko Jihovae puya: A tsie uko ketso kemesa di uko dojütuo, kekreilamonyü a themia kephoumako la kedipuo chü sa ta?

⁸ Uko meüe theü ciekeshü tuoi; u me nunu kemeda pu par. Uko pete rei u zanuou ki we khrietho die pu, derei thenoutsa we kebie pethoupie mawatuoü rhü tuoya.

⁹ Mha hako la a siazha pie uko tsü zhü mo üme? Jihovae siya; tsiu seyie haikecümia gei a khepukecü mese mo üme?

¹⁰ Kijüthouko la kra mu thekrü chücie, tsiu rayhau nu nha kepejoko la thekrü chücie, kekreilamonyü süko vawatuo miapuorei süko pfüthe volie lho, siro periko mokecü pfhe rei silie lho; teirako tsiu khunuoko tate di tuo mote.

¹¹ Ae Jerusalem pekapie puo bu puo kro chüpfü zhütatuo, meseru ki chüwatuo; tsiu Juda rünako chü kemethuowatuo, miapuorei lhou motatuo.

¹² Supuonie mhasi di hau ca silie vi ba ga? Jihova tie puo ki pukeshü themiau supuo ba di süko pesishülie vi ba ga? Kiüdi kijüu pekawa mu chü kemethuo pie rayha tuoi, miapuorei bu süu pfüthe vo mota ga?

¹³ Siro Jihovae pucü: Kekreilamonyü a thezho khapie uko mhodzünu keshüu ukoe khawate, sidi a pfhe ze mo, morei sünu tuolie mo,

¹⁴ derei uko nou kekhrü la uko puonuoko u pethakeshü mhie u thuo u noudo tsiu Baal siemedzi tuote.

¹⁵ Süla krodiko Jihova, Israel Kepenuopfüe puya. A tsiena pie themia hako vachütuo, tsiu therei dzü pie uko bu krietuo.

¹⁶ A uko kezapie pelekemoko uko rei uko puonuoko rei si kemo seyieko donu shüwatuo; tsiu a uko pekawa kemochie zhiecha ketsepie uko whuotuo.

Themiako Kepechü nunu Krakecü

¹⁷ Krodiko Jihovae puya: Mha leshücie, sidi thenupfüko kie ze vorlie thekrü chüketuo la; thenupfümia thekrü chü kesiko ze vorlieketuo la mia ketseshücie;

¹⁸ uko bu rükri sie u la thekrü chüshülie, sitse u mhi nunu mhidzü krütatuo, tsiu u mhinhe geinu dzü kru tsurtuo.

¹⁹ Kekreilamonyü Zion gei thekrü kechü pfhe site: “Kimhie di u pekawate shi! U bie kethenga tseiwate, kekreilamonyü hie kijüu khawaketa la, kekreilamonyü ukoe hie lhou kebachüko vawate,” si.

²⁰ He-i thenupfüko, rünyüliecie, Jihova dieu, tsiu nie nyie pie puo tie nu dieko rünyüliecie; nie nuopfüko ki thekrü kechü pethashülie, tsiu mia puopuokecü thekrü kechü pie puo zanuomia pethashülie.

²¹ “Kesiae vor u khirkiko tso bate, süu u kedikiko nu lerte, chaüko nunu nhicuko dukhriwatuoü tsiu ziekeko nunu khriekesako dukhriwatuo üdi,”

²² Pushülie! Jihovae puya: “Kesiamo zorei thubuo tuoi phouyo nu zhütatuo, liekeremia sieu lhakhro tuoitatuo, tsiu miapuorei uko chü kengulie lho,” siya.

²³ Jihovae puya: Mhakesimia bu puo mhasi la kemiako hie, kekuomia bu puo kekuo la kemiako hie, kenyimia bu puo kinyi la kemiako hie;

²⁴ derei kemholiekezhau bu hau nu kemholieliecie, süusü puo a dze si mu a sikecü nunu lie, ae Jihova, ae kijüu gei rüdirüliya kemo kekhrie se mia khrieya, kethoca, tsiu kemezhüu chüya, a hako nu a neiyacü la, Jihovae siya.

²⁵ Teisozhako vor tou zotuo, Jihovae siya, süu ae u chü geinu rübei zhükereko siazha khashütuo:

²⁶ Ijipt, Juda, Edom, Ammonko, Moab, tsiu vo ketsekethou rayha nu ketuoko. Kekreilamonyü seyie hako pete u zhürekemomia, tsiu Israel kinuko pete u melou nu u zhüreliekemomia zo.