Jeremia 8 - Angami Naga CL (Re-edited) Bible (BSI)

¹ Jihovae puya, süteiki Juda kediko ru, puo kedinuoko ru, zievoko ru, siro siedzekesimiako ru, mu Jerusalem nu kelhou themiako ru mekhruko nunu se partuo,

² sidi ukoe süko kelhapie uko khrie kevor mu uko lie chü kevor tsiu uko medzi kevor, tsiu uko pfhü voketa mu rüsuoketa niaki, khrü siro teigei ketuo krodiko mhodzünu shütuo, mu uko pa kengulie lho, morei khru reilie lho; uko pie kijü zieu gei nyorhu mhiewatuo.

³ Sidi seyie kesuo hau nunu lhiepie kebakoe a uko whuokeshü thechü pete nu kerhei ki rei kesia mengukuotatuo, krodiko Jihovae siya.

Kephouma mu Ketsokecü

⁴ No uko ki pushülie, Jihovae puya: Themia tetsuketa ki, uko la sielie motaya me? Mhanuü uko rütsita ro, uko rürei la vorlieya mo üme?

⁵ Di siliro themia hako kidi kechachie tsiesie tuotuo ga? Ukoe mha sekedokecüu thezetsate, uko rürei la mvüte.

⁶ Ae a nyie kedeishü di rünyüshü, derei ukoe dietho-u pu mo; miapuorei puo rüzhü nunu puo noukedilie mo, sidi sie, “A kedipuo chüwata ga!” iya. Mia pete rei puo thuo puo medo nu vote, kier-e terhü nu thu voketa tuoi.

⁷ Teira zemvüü thuo rei u teiu silieya; siro khruleinuo, dzükhu mu kitienuo rei u thuo kevor teiu meho baya; derei a themiako we Jihova khakeshü zho si mote.

⁸ Thezhokepethakoe kekrükecü kethusei se, süu chü kemedawata rei, nie kiüdi, “Hie si ba, mu Jihova zho-u hie ze tuo zo,” iya ga?

⁹ Mhakesimia pie thenga nu shüwatuo, uko bu uzie jüta di tezetatuo; ukoe Jihova dieu meliewaketa la, siro kedipuo mhasi uko nou ba ga?

¹⁰ Süla a uko nupfünuoko pie mia kekreimia tsüwatuo tsiu uko lieko pie welieketuomia tsüwatuo, kekreilamonyü kecütho nunu vo kezhatho ketso uko pete rei puotou mo di ngukelie mehoumengu; siedzekesiu nunu vo zievo-u ketso uko pete rei medate.

¹¹ Ukoe a themiako rüzapfü chü kemene dakeshü zo, sidi, vitho jü zorei, “Vitho, Vitho,” iya.

¹² Ukoe kemenga thoko chü, ukoe kerütsekecü chü; sizoürei ukoe mengalie moto zo, uko zie merielieketuo rei si mo. Süla ukoe tetsuketako ze tetsutuo; a siazha pie uko ketsü teiki, uko kelhouwa zotuo, Jihovae siya.

¹³ A uko pfhü kengulietuoü kesieki, Jihovae siya, khubebo gei khubesi zha mo, chiedebo gei chiedesi zha mo; seinyüko thuo rei rüwita, siro a khapie uko ketsüko uko ki nunu tate.

¹⁴ Kiüdi úko kemekrie bata ga? Vo kenguliecie, úko kuda houpie keba nadiko nu le khe, sidi kata khe; kekreilamonyü Ukepenuopfü Jihovae u bu katatuo üdi u khapie bawate, sidi therei dzü pie u bu krietuoü khashü, kekreilamonyü we Jihova gei jowatacü la.

¹⁵ We vitho pfhü, derei mha kevi puorei ngulie mo, shürhokelie tei pfhü, derei süu sou nu kemeriekecü rübei.

¹⁶ Kier nyhü kekhau pfhe Dan nunu si; puo kierko keruo pfhe sikeshü ki kijü pete rünieta. Ukoe vor di kijüu pekawa, mu sünu keba pete rei, nadiu mu sünu lhou keba pete.

¹⁷ Harie, tinyhü kerhu pethalie kelho, ketsepie nie donu shütuo, pethalie kelho nyhübvü mu sükoe nie medutuo, Jihovae siya.

Themiako la Siedzekesiu Krakecü

¹⁸ A kenei jüte, nousuo a gei bate, a melou mhachü bate.

¹⁹ Rünyüshücie, kijü ketsekethou nunu a themiako krakecü pfhe: “Jihova Zion nu ba mote me? Puo kediu puo ze ba mote me?” (“Kiüdi ukoe terhuorhiko, siro seyie kekreimia rhuoko se a nou chü kemeyieya ga?”)

²⁰ “Lieyie teiu vote, metsü teiu tseite, derei hie kelalie mote.”

²¹ A themia kemezhiekelie la a kemezhielie, a thekrü chü, theziekejü a gei vor bate.

²² Gilid nu daru ba mote me? Sünu darukesimia ba mote me? Di siro kiüdi a themia ketsopfhüko shürholie mo ga?