Jeremia 7 - Angami Naga CL (Re-edited) Bible (BSI)

Jeremiae Kepenuopfü Seyieu Ketsoketuo

¹ Jihova die Jeremia ki kevor:

² Jihova kiu care nu thalie, sidi die hau pie shieshülie, sidi sie, Nie Juda peteko, care hako nunu Jihova rüsuotuo üdi leyakezha khe, nie Jihova die rünyüliecie.

³ Krodiko Jihova, Israel Kepenuopfüe puya: Nie zhoko mu nie thoko nunu rüdiliecie, sitse a nie bu thechü hanu lhou balietuo.

⁴ Nie kemeda die: “Haue Jihova rüsuokiu, Jihova rüsuokiu, Jihova rüsuokiu,” icüko peleta hie.

⁵ Kekreilamonyü niekoe nie zhoko mu nie mhathoko chü kemezhü lalie mu nie mia puoe mia puo ze mezhü lalie liro,

⁶ solhimia, merünuomia, samipfümia morei kejo kejümia zie thechü hanunu pekru molie mu nie thuo kemezhietuo üdi terhuo kekrei siemedzita molie liro,

⁷ a nieko bu thechü hau, a pie nie puonuoko bu telhekechachie lhoutuo üdi khakeshü kijüu nu balietuo.

⁸ Harie, niekoe kemeda die kemevi kejü dieko pele tuote.

⁹ Nie mha rügu, mia dukhri, mu pieü chü, tsiu tijü di rüse, mu kethengu thepie Baal tsü, mu nieko si kemo rhuo kekreiko siemedzi,

¹⁰ sidi ki hau nu a za kieyakezhau nu a mhodzüki vor thalie di sie, “Hie kelaliete,” iya, sidi mha kerütsekecü hakoha chü tuo zotieya me?

¹¹ Ki hauha, a za nunu kieyakezhau, nieko mhinguki mia vie sekecümia bou chüte me? Nieko si ba, a rei meho bawe, Jihovae siya.

¹² Nieko vo Shilo nu a ba mehocie, a sünu a za khapie ba kerietho chü, sidi a themia Israel kerügekerüzhü la a süu gei kedipuo chüshü shiü mehoshücie.

¹³ Siro tsie, nie mhatho hako pete chükecü la, Jihovae siya, a nie ki pu tha zo, derei nie rünyü mote, mu a nie kekie ki, nieko a pfhekho mote,

¹⁴ Süla a ki hau a za nunu kieyakezhau, nieko peleyakezhau, tsiu a khapie nieko mu nie puonuoko ketsü thechüu, ae Shilo nu chükeshüu kemhiewatatuo.

¹⁵ Sidi a mhinguki nu nieko kelhouwatuo, ae nie siezedzürieko, Efraim yie pete khawaketa mhiewatuo.

Themiako Dieze Chülie Moketa

¹⁶ Süla no we, themia hako la kecha chü hie, uko sou nu n pfhephra morei cha hie, tsiu a ki n mezhiemelo hie, a n pfhe rünyülie lhokecü la.

¹⁷ Ukoe Juda nadiko nu mu Jerusalem chaüko nu kedipuo chüshü ba shi no nguya mo üme?

¹⁸ Unuonuokoe sei pfhü kengushüya, sidi u puonuoko mi chü petushüya, tsiu thenuko niekhrüda nelie, sidi pie teigei kedipfü tsütuoü; tsiu kekrie ruosuo perupie terhuo kekreiko tsütuo üdi a nou chü kemeyietuoüya.

¹⁹ Ukoe a nou chü kemeyieya üme? Jihovae siya. Ukoe uko thuo uko nou chü kemezhielieta mo üme?

²⁰ Süla Jihovae puya: A nei kemo mu a nouyie rupie thechü hanu, themia gei, khunuo gei, tsiu lie nu seiboko gei mu kijüu chiebie gei shütuo; süu thetuo tsiu tshülie lho.

²¹ Krodiko Jihova, Israel Kepenuopfüe puya: Nie kethe ruosuoko pie nie ruosuo kechüko sa kesawalie, sidi puochü cülie.

²² Kekreilamonyü a nie puonuoko Ijipt kijü nunu ze kepar nhie, kethe ruosuo dze morei rüsuo chükecü dze uko ki pu mo morei chünu di diekhashü mo zo.

²³ Derei ae die hau khapie uko ki shü, “A pfhe zelie, sitse a nieko Kepenuopfü chütuo, tsiu niekoe a themia chütuo, siro a nie bu chünu di khakeshü zhoko rübei nu tuolie, sitse nieko la vituo.”

²⁴ Derei ukoe rünyülie mote, morei uko nyieto kereilie mo, derei, uko noule kesuo kekhrüu se di u thuo medokelieu nu tuo, sidi tsiesie miemie voketau sie pedzü volie mo.

²⁵ Nieko puonuoko Ijipt kijü nunu parkelie teiso yawinu vor thie ketso, a a kituo siedzekesimiako pete ketsepie uko ki shü zo, puo sie puopuo idi;

²⁶ sirei ukoe a pfhe rünyü mo, morei uko nyieto kereishü mo, derei uko vo meteithor. Ukoe uko puonuoko ki rei suokuokecü chüta.

²⁷ Süla no die hako pete pie uko ki pushülie, derei ukoe n pfhe rünyülie lho. No uko kietuo, derei uko n pfhekho lho.

²⁸ Noe uko ki putuo: seyie hauha uko Kepenuopfü Jihova pfhe zeya mo, mu pethakeshü lielieya mo; ketho-u tuo mote; süu uko tie nunu jüte.

²⁹ N tsütha bewalie di süu kelhouwacie; thechü kerükrie geinu thekrü chücie, kekreilamonyü Jihovae puo nou bie kerüpekeshü seyieko meliewa tsiu khawate.

³⁰ Kekreilamonyü Juda themiae a mhinguki nu mha kesuo chü, Jihovae siya; ukoe a za nunu kieyakezha kinu uko vie kerütsekecüko khapie ba, sidi süu perhuwa.

³¹ Siro ukoe Tofet thechü kerükrieu chüzhü zo, süu Hinom nuou razha nu ba, uko nuonuo thepfumiako mu thenumiako mi nunu thetuo üdi süu ae uko bu chünushü mo, morei a nou ki rei vor mo.

³² Süla, teisozhako vorzhie, Jihovae siya, süu üse Tofet üdi kie salie lho, morei Hinom nuou razhau ülie lho, derei Kedukhri razhau üdi kietuo: kekreilamonyü ukoe Tofet nunu mia khrutuo thechü ba sa mota kemochie si ba zotuo.

³³ Themia hako kesiamo pie teirako, tsiu kijüu nu khunuoko vachütuo; sidi miapuorei süko kechü peta lho.

³⁴ Sitse ae Juda nadiko nu, mu Jerusalem chaüko nu, thenou kemvü pfhe mu kenei pfhe, yasau pfhe, mu yasapfü pfhe bu ba sa motatuo, kekreilamonyü kijüu kemethuo chütatuo.