Jeremia 6 - Angami Naga CL (Re-edited) Bible (BSI)

Jerusalem mu Juda Kepeka

¹ He-i Benjamin nuonuoko, kelalieketuo la Jerusalem nunu tatalie! Sidi Tekoa nunu ketsüu khoushülie, mu Bet-hakerem nu zasiu piesieshülie; kekreilamonyü mha kesuo mu kepeka kemeriekecü pesotsa nu partatie.

² Ae Zion nuopfü pie nha kepejo kezivithopfü puo ze kemejüshü.

³ Kuopfheko u kuokro ze vor di puo petsoutuo. Ukoe u pfhekiko pethoupie puo houlietuo; uko mia puopuokecü puo chü nunu mhacütuo.

⁴ “Puo ze terhü chütuoü dojülie; sielie, sidi úko khinhie gei vo puo re khe!” “Úko we ce, chülietie, kekreilamonyü teisozhau votazhie, tsiu teizei khrüu chü pechaliete!”

⁵ “Sielie, sidi úko pezei ze vo puo re khe, tsiu puo kedikiko peka khe!”

⁶ Krodiko Jihovae puya: Puo seiboko wiwalie; sidi Jerusalem kepetsou dahouu chücie. Siazha pie tsü morosuokeba nadi hau zo; puo donu mha pesekecü sie mha kekrei puorei ba sa mo.

⁷ Dzükhou nu dzü bu rheirhiepfü bayakezha tuoi, puoe puo kesuo kechüko rheirhiepfü ba; mia pekakecü mu mha bie pesuokecü pfhe puo nou nu si; kesuokenyü mu rüzapfü a mhodzüki ba seite.

⁸ He-i Jerusalem, pethapfüliecie, moro a nyieta di n kinu rüreitatuo, mu n chü kemethuowatuo, sidi mha lhoulie kemo kijü chüwatuo.

⁹ Krodiko Jihovae puya: Israel lhiekelieko khube tuoi bie kemesa mpouwatuo; khubesi papie mekho nu shülieyakezhako tuoi, n dzie kerei lapie puo coko gei shücie.

¹⁰ Rünyülieketuo la a suomia ki die pu, tsiu kemichie vorkezhü dze pushütuo ga? Harie, uko nyietoe puo ki cie mo, ukoe rünyülieya mo. Jihova die-e uko la krekenyü vie; uko sünu u neilie mo.

¹¹ Derei a gei Jihova noupfhüu tshu bate; ae süu pukecü la a nyiete. Süu rupie cha nu keba nuonuoko gei shücie, mu khriesamia vo kengu kebako gei rei shüwacie; siro thenuthepfu tsiu ketsamia mu tsatoketako sa di zetatuo.

¹² Uko kiko pie mia kekreimia tsüwatuo, uko lieko mu uko kimianuoko rei sa di; kekreilamonyü a dzie yhapie kijüu nu lhou kebako gei shütuo, Jihovae siya.

¹³ Kekreilamonyü kecütho nunu vo kezhatho ketso, pete rei mha mehou di puotou kemo nunu ngukelie le; siedzekesiu nunu vo zievo-u ketso, pete rei meda di mhachü phre.

¹⁴ Ukoe, “Vitho, vitho” isikecü pu, vitho tuo mo zorei, sidi a themiako rüza theke menuoshü mote.

¹⁵ Uko thengatho chü, ukoe kerütsekecüko chü; sirei ukoe mengalie mo, mu uko zie merie reilie mo. Süla ukoe tetsuketako ze di tetsutatuo; a uko pechükeshü ki, uko kelhouwatuo, Jihovae siya.

¹⁶ Jihovae puya: Nieko chadzako nu tha di, mehoshücie, sidi thiedzü chako ketsocie, cha kevi kezhüra; sidi sünu tuo volie, sitse nie ruopfü la kerülei ngulietuo. Derei ukoe sie, “Hie sünu tuo lho,” sita.

¹⁷ Sizomoü a n la kepfhemia pesieshü: “Ketsü kekhou pfhe rünyücie!” si Derei uko sie, “Hie rünyü lho,” sita.

¹⁸ Süla rünyülie, he-i seyieko, mu siliecie, he-i kehouko, uko gei kikecüpuo chüshütie shi.

¹⁹ Rünyülie, he-i kijüu; ae mha kesuo se themia hako gei vorshütuo üzhie, uko mharhü siko, kekreilamonyü uko a die rünyü mvü; mu ae pethakeshüko, ukoe meliewate.

²⁰ Kedipuo la üdi Sheba nunu puore kethengu se a ki vor, morei kijü kepetse nunu mhare kevi vor ga? Nie kethe ruosuoko lielie kenjü, morei nie ruosuoko a neilie mote.

²¹ Süla Jihovae puya: Harie, a themia mhodzünu thephi kemesü tsieko khapie zhü ho, puo krü rei puo nuo rei sa di süko gei tetsutuo, u siezanuomia tsiu puo khriethomia kaüjütatuo.

²² Jihovae puya: Harie, kijü pesotsa nu themia kro puo vorzhie, siro kijü kepecie nunu seyie kezha mhakeboukecü puo siertuo.

²³ Ukoe theü mu rüngou se tuo, uko zho suo mu mia ngumezhieya mo, uko pfhe-e dzükezha rüpfhü tuoi; uko kierko gei tuoya, terhümiavimia terhü la dojü seketuo tuoi, di n perhietuo, he-i Zion nuopfü!

²⁴ “Hie uko dze site, hie dzie thachüte; thenoukemezhiekecü hie gei vor, thenumia nuonuovachü ki kemezhiekecü mhie di kemezhie.

²⁵ Lie nu tuo vo hie, morei cha nu tuo hie; kekreilamonyü ngumvümia zhiecha se tuo, tsiu lutsahatsa pete nu kemichie bate.”

²⁶ He-i a themia mhakejüko, gakhropfhe seliecie, mu mige nunu nie kephrelie; kralie nuo puo zokecüu la kekra tuoi, thekrü chü kemerieliecie: kekreilamonyü kepekamia mhai u gei vortuo.

²⁷ A n chüpie themiako donu kedojüu mu chü kemesayakezhau chüshü süusü n bu uko mhatho silie tsiu kevikesuo telieketuo la.

²⁸ Uko pete rei mia perhie kemerie chü tuoyakezhamia phre, sieüchü di tuoya, ukoe mese tsiu thegi zo, uko mha kesuo kechümia phre.

²⁹ Mimhepou mhe kemerie chüshü, miu nunu guli thewate; süu thepekru thedochü, kekreilamonyü kelhiecümia chüwa mote.

³⁰ Mia uko üse, “Meliekewa rakachü” üdi kietuo, Jihova uko meliewaketa la.