Jeremia 52 - Angami Naga CL (Re-edited) Bible (BSI)

Jerusalem Pekakewa

¹ Zedekia kedi chükelie ki puoe cie mepfüepuota, puoe Jerusalem nu teicie kerepuokrü kedi chü. Puo zuo za Hamutal, Libnau Jeremia nuopfü.

² Puoe Jehoiakim mhiei Jihova mhodzünu mha kesuo shüüko chü.

³ Ketho zo, Jerusalem mu Judae Jihova nou bie kemeyiewa di puo mhodzü nunu uko whuowa. Zedekiae Babilon kediu perhie.

⁴ Siro puoe kedi chükelie cie thepfü cie, khrü ker-u nu, zha ker nhie, Babilon kediu Nebukadnezar puo chüpahi pete ze vor di Jerusalem perhie, sidi ukoe sünu razhü chülie, dahou chüpie süu houlie.

⁵ Süla nadiu whuo zo ba Zedekia kedi cie kerepuokrüu tso.

⁶ Khrü diau nu zha thepfü nhie nadiu nu pekrie kriedi vorta süla kijü süu nu themiako la kecüca ba mota.

⁷ Siro nadi dahouu prota, sidi rüpfhünuo pete tata mu pezeize kediu tezie khieki sozha kenie donu kharu chau ze di tuo prata, Chaldiamia thuo nadiu houpfü ba rei. Sidi ukoe Araba kevatsa vota.

⁸ Derei Chaldiamia chüpahikoe kediu whuo zo vo, sidi Jeriko razhau nunu Zedekia tsolie; mu chüpahi pete puo kinu ta cüre tuota, sidi puo khawata.

⁹ Sitse uko kediu telie, di puo ze Hamat kijü nu Ribla nu Babilon kediu ki vor, sidi puoe puo dienya kecü.

¹⁰ Siro Babilon kediue Zedekia mhingu nunu puo nuonuoko dukhriwa, siro puoe Ribla nu Juda kezhako pete rei sa dukhriwa.

¹¹ Puoe Zedekia mhinie kerülawa, sidi thegi kedoukecü ro pie puo phalie, mu Babilon kediu puo ze Babilon nu vota, sidi puo siata kemochie puo khapie kedieki nu bawa.

¹² Siro thekhrü pengouu nu, zha ker nhie, süu Babilon kediu Nebukadnezar kedi chükelie cie kerethepfü cie Nebuzaradan, kepfhekezhau, Babilon kediu lie chüyakezhau, Jerusalem nu vor.

¹³ Puoe Jihova kiu thewa, mu kediu ki mu Jerusalem ki pete, tsiu kezhamia ki pete rei mi pie thewa.

¹⁴ Sitse Chaldiamia chüpahi pete, kepfhekezhau ze ketuoko, Jerusalem khieümhou houpfü keba tsiepfheko pete biemewa.

¹⁵ Siro kepfhekezhau Nebuzaradan-e themia kejüthoko tsiu nadi nu keba themiako mu uko kitsatie nu ta Babilon kediu ki vorketako siro themia mhachükesimiako teze kedie chü vota.

¹⁶ Derei kepfhekezhau Nebuzaradan-e mhakejüko huo bu khubebo kemehomia chü mu lieciemia chütuoü khapie bawa.

¹⁷ Siro Jihova ki nu mese pie kechü coko, mha khrü kebako siro Jihova ki nu keba mese dzükezhau, Chaldiamiakoe biephrophawa, sidi mese süko pete toupfü Babilon nu vota.

¹⁸ Ukoe galiko, nyopfhükhouko, mhakebeko, mhabouko, kecieko, mu mesekhouko ruosuo kechü nu seyakezhako chüseta.

¹⁹ Siro kepfhe kezhaue shüthuoli, dzieteikhou, galiko, mu mitubako, kecieko, tehieko, tsiu mhabouko suna se kechüko rei mu rakachü se kechüko rei se tuota.

²⁰ Co kenie, dzükezha puo, mha khrü se keba khro keba mese pie kechü thudo kerekenie, Solomon kediue Jihova kinu chükeshü, mhabouko mese pie kechü hako pete mejü hulie kelho chü zo.

²¹ Siro coko liro, co puo rükrie-e thu kerethetha, siro mha lhopie süu ketsokecü thu kerekenie süu whi vo; tsiu puo keshüe u dziezhü dia mese, süu puo ki cie.

²² Siro mese pie kechü co puo süu gei ba, siro co puoe puo rükrie thu pengou, coko gei mha kedoukecü mu touraü rhikecü, mese pie chü phre di houpfü ba. Co kenieu rei touraü rhikecü hako mhie.

²³ Siro tietsapuo touraü hiethepfüesorourou; mu kedoukecü gei keba touraü rhikecüko lutsahatsa krie puopuo houpfü ba.

²⁴ Sitse kepfhekezhau phichü kezhatho-u Seraia, mu zievokezha süsieso-u Zefania, tsiu kikha kepfhe mia seko zelie;

²⁵ mu puoe nadiu nunu iunukmia puo, terhü themia seyakezhau, siro kediu kehou nu mia thenie nadiu nunu ngukelieko; siro rüpfhünuoko donu kethuu kijü nu themiako phrüyakezhau; mu kijü nu themia hiesorou nadiu nu ngukelieko zelie.

²⁶ Sidi kepfhekezhau Nebuzaradan-e süko zelie di, uko ze Ribla nu Babilon kediu ki vor.

²⁷ Sitse Babilon kediu uko biewa di Hamat kijü nu Ribla nunu uko bu siata. Sidi Judae puo thuo puo kijü nunu teze kedie chü vota.

²⁸ Nebukadnezar-e teze kedie chü voketa themia hade: teicie thenie cie, Judamia nyie se di mepfüese,

²⁹ cie kerethetha cie Nebukadnezar-e Jerusalem nunu mia krie thetha di serekenie teze kedie chü vota,

³⁰ Nebukadnezar dikelie cie mepfüese cie, kepfhekezhau Nebuzaradan-e Judamia krie thenie di hiediaepengou teze kedie chü vota; themia pete kesa nyie dia di krie sorou.

Jehoiakin-e Kedie Chü Ketuo ki Therhu Ngukelie

³¹ Juda kediu Jehoiakin kedie chüketa cie serethenie cie khrü kerekenieu khrü zha mepfüepengou nhie, Babilon kediu Evil-merodak, puoe dikelie cie therieki, Juda kediu Jehoiakin gei tseiüvikecü thashü sidi kedieki nunu puo ze parwa;

³² siro menuo di puo rüchü, sidi puo bu Babilon nu puo ze di keba kedimia kekreiko mho bata.

³³ Süla Jehoiakin-e puo kedie pfheneiko kediwa, sidi puo kerhei chie teisonhie kediu ze mhacümhakrie sei bata.

³⁴ Puo se morokesuo la, Babilon kediu kinu teisonhie se morokesuoko khashü puo tsü sei zo, puo kerhei chie, vo puo se ketso, teisonhie puoya khashü seiya.